ភ្នំពេញៈ នាង តេង លក្ខិណា ពិធីការិនីកម្មវិធី A1 Concert ដែលកំពុងលេចមុខខ្លាំងតាមរយៈស្ប៉តពាណិជ្ជកម្មឈីតាមេហ្គាបៃ ជាមួយលោក ព្រាប សុវត្ថិនោះ បានសម្រេចចិត្តថានឹងមិនទទួលថតកម្មវិធីសិល្បៈផ្សេងៗដូចមុន ទៀតទេនៅក្នុងមួយរយៈពេលនេះ ដោយសារតែព្រះសង្ឃបានទស្សន៍ទាយឲ្យនាងថា នៅដើមឆ្នាំ២០១២នេះ រាសីនាងដាក់ អារក្ខវាធ្វើ និងត្រូវកាន់ត្រណមច្រើន បើមិនដូច្នោះទេ នាងនឹងមានគ្រោះថ្នាក់។
តារាសម្តែង និងជាពិធីការិនីប្រចាំស្ថានីយទូរទស្សន៍ My TV រូបនេះ បានឲ្យដឹងថា នាងជាជនជាតិខ្មែរ នាងតែងប្រកាន់ខ្ជាប់ជាមួយនឹងអបិ្បយជំនឿផ្សេងៗ ហើយនាងនឹងនៅឲ្យឆ្ងាយបន្តិចពីសិល្បៈក្នុងរយៈពេល២ខែនេះ ដោយសារតែជើងលេខរបស់នាងនៅដើមឆ្នាំ២០១២នេះ ស្រុតចុះខ្លាំង និងអាចបណ្តាលឲ្យមានគ្រោះថ្នាក់នោះ។
តារាសាច់សម៉ដ្ឋខៃវ័យ២២ឆ្នាំ តេង លក្ខិណា បានលើកហេតុផលថា៖«នៅដើមឆ្នាំហ្នឹង ខ្ញុំបានទៅវត្ត ទៅឲ្យលោកស្រោចទឹក ហើយព្រះសង្ឃបានប្រាប់ថា រាសីខ្ញុំមិនល្អទេ ត្រូវមានត្រណមបន្តិច»។ តារារូបនេះបានបន្តថា៖«នៅរយៈពេល២ខែ មករា និងកុម្ភៈ ហ្នឹង ខ្ញុំមិនអាចដើរថត ឬទៅណាបានឆ្ងាយទេ អ៊ីចឹងការងារសិល្បៈរបស់ខ្ញុំមួយចំនួនត្រូវបានពន្យារ ឬក៏ត្រូវផ្អាកសិន ហើយចាប់ពីខែ៣ទៅគឺខ្ញុំទទួល និងបានការងារធ្វើដូចដើម»។
ទោះបីជាមានសាច់សខ្ចីទំនងជាកូនកាត់ចិន តែតារារូបនេះ បានប្រាប់ថា នាងមានជំនឿលើការទស្សន៍ទាយយ៉ាងមុតមាំ ដូច្នេះតាមរយៈពាក្យព្រះសង្ឃ នាងត្រូវតែប្រតិបត្តិ មិនអាចល្មើសទៀតទេ ព្រោះបើល្មើសនាងអាចទទួលរងនូវផលអាក្រក់ផ្សេងៗជាក់ជាមិនខាន។
ការជឿស្លុងតាមការទស្សន៍ទាយនេះ ទំនងជានាងបានមើលគំរូកាលពីឆ្នាំ២០១១ ដែលនាងបានទទួលរងគ្រោះថ្នាក់ចរាចរណ៍ដ៏អាក្រក់មួយ ហើយតាមរយៈគ្រោះកាចនោះនាំឲ្យប្រជាប្រិយភាពរបស់នាងមានការ ធ្លាក់ចុះ។
ការផ្តោតអារម្មណ៍ជឿខ្លាំងលើពាក្យគ្រូនេះ ត្រូវបានគេមើលឃើញថា តារាដែលធ្លាប់ទទួលការងារសម្តែងច្រើន ក្រៅពីអាជីពពិធីការិនី តេង លក្ខិណា សុខចិត្តបោះបង់តំណែងជាតួឯកនៅក្នុងរឿងភាគ «បេះដូងអ្នកការពារ» របស់ទូរទស្សន៍ស៊ីធីអិន និងការថតចម្រៀងកាយវិការជាច្រើនទៀត។
តារាស្រីរូបនេះនិយាយថា៖«រឿងភាគរបស់ស៊ីធីអិន បេះដូងអ្នកការពារ ហ្នឹង ខ្ញុំអត់បានថតទេ ព្រោះព្រះសង្ឃឲ្យខ្ញុំសម្រាកបន្តិចសិន»៕
ដោយ សេត គឹមសឿន
ដកស្រង់ពី គេហទំព័រ Postkhmer
សូមប្រិយមិត្តទាំងអស់ជួយចុច Add a comment ដើម្បីផ្តល់ជាមតិ និងជួយ Share នៅលើ Facebook របស់អ្នក។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
