រាជធានីភ្នំពេញ ៖ រថយន្តម៉ាកស៊ីអវី ពណ៌ឈាមជ្រូកមួយគ្រឿង បើកដោយស្ត្រីជនជាតិវៀតណាម បានរេចង្កូតបុករបាំងដែកពុះចែកផ្លូវបណ្តាលឱ្យរលំអស់៥ផ្ទាំង និងទ្រេត៥ផ្ទាំង នៅមុខក្រុមហ៊ុនទូរស័ព្ទណូគា តាមមហាវិថីព្រះសីហនុ ស្ថិតក្នុងក្រុម១ សង្កាត់បឹងកេងកង១ ខណ្ឌចំការមន កាលពីវេលាម៉ោង១២និង៥០នាទីរំលងអធ្រាត្រឈានចូលថ្ងៃទី២៣ ឧសភា ។
ប្រភពព័ត៌មានបានឱ្យដឹងថា រថយន្តស៊ីអវី ពណ៌ឈាមជ្រូក បើកដោយស្ត្រីជនជាតិវៀតណាមជិះគ្នា២នាក់ បើកតាមមហាវិថីព្រះសីហនុ ពីលិចទៅកើត ខណៈមកដល់ចំណុចកើតហេតុស្រាប់តែរថយន្តបែកកង់ ហើយក៏រេចង្កូតទៅបុករបាំងដែកពុះចែកផ្លូវបណ្តាលឱ្យខូចខាតអស់ ១០ផ្ទាំង ។
តាមសន្តិសុខដែលយាមនៅជិតនោះបានឱ្យដឹងថា មុនពេលកើតហេតុមិនដឹងជាអ្នកបើករថយន្តរវល់តែប្រឡែងគ្នា ឬក៏ងោកទេ ទើបរេចង្កូតទៅបុករបាំងដែកពុះចែកផ្លូវតែម្តង បណ្តាលឱ្យរថយន្តបែកកង់មុខខាងឆ្វេងនិងក្រពឹតចំហៀងខាងឆ្វេង ។
ក្រោយ ពេលកើតហេតុ ស្ត្រីទាំង២នាក់បាននាំគ្នាគេចខ្លួនបាត់ បន្សល់ទុករថយន្តនៅកន្លែងកើតហេតុត្រូវសមត្ថកិច្ចជំនាញស្ទួចយក ទៅរក្សាទុកនៅសាលារាជធានីភ្នំពេញ ដើម្បីសងការខូចខាតទ្រព្យសម្បត្តិសាធារណៈ ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
