ខេត្តស្វាយរៀង ៖ យុវជនម្នាក់ត្រូវខ្សែចរន្តអគ្គិសនីដែលដាច់ធ្លាក់ពីលើបង្គោលឆក់ ស្លាប់ ខណៈកំពុងភ្ជួរដីធ្វើស្រែ ។ ករណីនេះកើតឡើងកាលពីថ្ងៃទី២០ ឧសភា វេលាម៉ោង៩ព្រឹក នៅភូមិតាប៉រ ឃុំតាសួស ស្រុកស្វាយជ្រំ ។ យុវជនរងគ្រោះឈ្មោះយ៉ាន សុធន់ អាយុ២០ឆ្នាំ រៀនថ្នាក់ទី១២ នៅវិទ្យាល័យហ៊ុនសែន ស្វាយជ្រំ ។
ទាក់ទិននឹងករណីនោះ លោកអ៊ិន ស៊ីថា អាយុ៤២ឆ្នាំ ជាឪពុកប្រាប់កោះសន្តិភាពទាំងក្តុកក្តួលថា គាត់មានកូន៤នាក់ ស្រី២នាក់ ឯយុវជនរងគ្រោះឈ្មោះយ៉ាន សុធន់ គឺជាកូនច្បង។ នៅព្រឹកកើតហេតុកូនប្រុសឈ្មោះយ៉ាន ចាន់ថន អាយុ១៦ឆ្នាំ យកគោយន្តទៅភ្ជួរស្រែនៅខាងជើងផ្ទះចម្ងាយ៥០ម៉ែត្រ។ ពេលភ្ជួរស្រែជិតរួចហើយនោះបងប្រុសឈ្មោះយ៉ាន សុធន់ ចុះទៅប្តូរប្អូនភ្ជួរម្តង ដើម្បីឱ្យប្អូនឡើងហូបបាយ ។ ក្រោយពីហូបបាយរួចប្អូនប្រុសក៏ងើបត្រឡប់ទៅមើលបងភ្ជួរវិញ ស្រាប់តែឃើញបងប្រុសឈរញ័រនៅនឹងដៃគោយន្ត ឯគោយន្តរលត់។ គេនឹកស្មានថាបងប្រុសខ្យល់គរបម្រុងចុះទៅជួយក៏ឃើញបងប្រុសដួល ដាច់ផ្ងារចូលទៅក្នុងទឹកស្រែ។ ពេលមើលទៅឃើញខ្សែភ្លើងធ្លាក់ទៅលើដៃគោយន្ត ទើបដឹងថាបងប្រុសត្រូវចរន្តអគ្គិសនីឆក់ក៏រត់ទៅបិទបារ៉ែតភ្លើង រួចស្រែកឆោឡោ ។ ឪពុកនិងម្តាយនិងអ្នកភូមិផ្អើលនាំគ្នាទៅមើល និងលើកសពកប់ដី ធ្វើចលនាបេះដូង រួចហៅគ្រូពេទ្យឱ្យជួយ តែមិនអាចជួយសង្គ្រោះបាន ទេ គឺកូនគាត់ស្លាប់បាត់បង់ជីវិតទៅហើយ ។
មន្ត្រីអាជ្ញាធរនិយាយថា នោះជាគ្រោះដ៏អាក្រក់បំផុត ដោយពេលកំពុងតែភ្ជួរ ជិតរួចទៅហើយស្រាប់តែបង្គោលភ្លើងបាក់ចុងធ្លាក់ខ្សែមកចំដៃគោ យន្ត។ ដោយខ្សែភ្លើងពុករហែកស្រោមជ័រអស់ បណ្តាលឱ្យឆក់ជនរងគ្រោះជាប់នៅដៃគោយន្តរហូតអស់ឈាម ទើបរបូតដួលផ្ងារក្រោយគាំងបេះដូងស្លាប់តែម្តង ។
ការបាក់បង្គោលភ្លើងដើមអាកាស្យាដែល បង្កឱ្យមានការរងគ្រោះនេះ មានប្រតិកម្មពីក្រុមប្រជាពលរដ្ឋថា នេះមកពីក្រុមហ៊ុនម៉ៅការដែលទិញភ្លើងអគ្គិសនីពី ក្រុមហ៊ុនអគ្គិសនីកម្ពុជាស្វាយរៀង ទៅចែកចាយឱ្យប្រជាពលរដ្ឋមិនបានគ្រប់គ្រងត្រួតពិនិត្យ លក្ខណៈបច្ចេកទេសឱ្យបានត្រឹមត្រូវ។ គេតខ្សែភ្លើងតាមផ្លូវមុខផ្ទះដាក់បង្គោលថ្ម តូចៗ សឹងមិនផុតក្បាលដោយមានខ្សែទំាំងស្រណុំ ។ ពេលដាក់២ឆ្នាំហើយខ្សែភ្លើងពុក បង្គោលក៏ពុក ទើបបណ្តាលឱ្យមានគ្រោះថ្នាក់។ ក្នុងរដូវវស្សាឆ្នាំនេះ ភ្លៀងខ្យល់ខ្លាំងផងនោះ គឺអាចគ្រោះថ្នាក់ទៀត ដោយដួលបង្គោលធ្លាក់ខ្សែភ្លើងចូលទឹកក្នុងស្រែ ដូច្នេះពេលប្រជាពលរដ្ឋចុះភ្ជួរ ឬឆ្លុះកង្កែបត្រីពេលយប់មិនបានមើលអាចគ្រោះថ្នាក់ ខ្លាំងណាស់ ។ ក្រុមហ៊ុនត្រូវតែទទួូលខុសត្រូវក្នុងរឿងនេះ ។
លោក ម៉ាង សុភាព អ្នកម៉ៅការចែកចាយភ្លើងអគ្គិសនីពីក្រុមហ៊ុនអគ្គិសនី កម្ពុជា ខេត្តស្វាយរៀង ប្រាប់កោះសន្តិភាពថា ក្រុមហ៊ុនរបស់លោកមិនទទួលខុសត្រូវទេ ដោយក្រុមហ៊ុនបានធ្វើកិច្ចសន្យា មុននឹងតបណ្តាញអគ្គិសនីម៉្លេះ គឺក្រុមហ៊ុនទទួលខុសត្រូវ តែបណ្តាញខ្សែធំតាមបង្គោលថ្មពេលដាច់ដួលរលំឆក់មនុស្ស ក៏ប៉ុន្តែចំពោះខ្សែភ្លើងដែលអ្នកប្រើប្រាស់តខ្សែ ចេញពីបង្គោលថ្មទៅតាមផ្ទះ គឺម្ចាស់ខ្សែភើ្លងថែរក្សាបង្គោល និងខ្សែភ្លើងរបស់ខ្លួនបើមានដាច់ ឬឆក់ស្លាប់ត្រូវទទួលខុសត្រូវដោយខ្លួនឯង ឬការតភ្លើងយកទៅឆក់ត្រី បូមទឹក ហើយឆក់ស្លាប់ត្រូវទទួលខុសត្រូវដោយខ្លួនឯង ក្រុមហ៊ុនមិនទទួលខុសត្រូវឡើយ ។ ដូច្នេះការបាក់បង្គោលភ្លើងឆក់ស្លាប់នេះក្រុមហ៊ុនមិន ទទួលខុសត្រូវទេ ៕
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]