រាជធានីភ្នំពេញ ៖ ស្ត្រីជាម្តាយឈ្មោះនួន ពៅ រស់នៅភូមិបឹងលើ ឃុំធ្លកអាទាវ ស្រុកលើកដែក ខេត្តកណ្តាល បានកាន់រូបថតកូនស្រីដ៏ក្មេងខ្ចីឈ្មោះសិត ស្រីពេជ្រ អាយុ១៩ឆ្នាំ ដែលបាត់ពីផ្ទះតាំងពីថ្ងៃទី៦ ឧសភា ឆ្នាំ២០១២ រហូតដល់ថ្ងៃទី២០ ឧសភា នៅតែមិនទាន់ឃើញវិលត្រឡប់ទៅវិញឡើយ ជាហេតុធ្វើឱ្យគាត់មានការភ័យព្រួយអំពីសុវត្ថិភាពរបស់នាង ដើរសួរគេឯងគ្រប់ច្រកល្ហក ពិសេសគឺនៅម្តុំផ្សារច្បារអំពៅខណ្ឌមានជ័យ ។
ជួបជាមួយអ្នកយកព័ត៌មានកោះសន្តិភាពនៅក្នុងហាង កាហ្វេកៀនចិញ្ចើមផ្លូវតូចមួយក្បែរអធិការដ្ឋាននគរបាលខណ្ឌមានជ័យ អ្នកស្រីនួន ពៅ រៀបរាប់ថា កូនស្រីរបស់គាត់ចេញបាត់ពីផ្ទះដោយគ្មានមូលហេតុក្រោយពេលរូប នាងទើបតែរៀបការរួចហើយបាន៦ថ្ងៃ។ រយៈពេលជាងកន្លះខែមកហើយ កូនប្រសាគាត់នៅរង់ចាំប្រពន្ធជានិច្ច ។
ស្ត្រីដដែលបានរៀបរាប់ថា កូនប្រសាគាត់ឈ្មោះសុខ ជា អាយុ៣១ឆ្នាំ មានស្រុកកំណើតនៅខេត្តបាត់ដំបង។ គេបានចូលស្តីដណ្តឹងកូនស្រីគាត់រៀបការត្រឹមត្រូវតាមប្រពៃណី ខ្មែរ ។ កូនស្រីគាត់ជាអ្នកសម្រេចចិត្តទទួលយកសុខ ជាដោយខ្លួនឯង ហើយគាត់ក៏រៀបចំអាពាហ៍ពិពាហ៍ឱ្យ ។ តាមរយៈកោះសន្តិភាពស្ត្រីឈ្មោះនួន ពៅ អង្វរចិត្តកូនស្រីរូបនោះឱ្យត្រឡប់ទៅផ្ទះវិញដ្បិតរូបគាត់ និងប្តីរបស់នាងព្រួយបារម្ភពីនាងខ្លាំងណាស់ ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
