ខេត្តកំពង់ស្ពឺ ៖ ក្រុមមន្ត្រីជំនាញរបស់សមត្ថកិច្ចបារាំង និងកម្ពុជានៅតែបន្តព្យាយាមស្វែងរកអាថ៌កំបាំងនៃការស្លាប់បុរសពោះម៉ាយជនជាតិបារាំងលោកឡូរ៉ង់ វ៉ាលីយេ៉ និងកូនទាំង៤នាក់របស់លោកនៅឡើយ ។ ទោះបីជាបែបណា សម្រាប់សមត្ថកិច្ចបារាំងនៅតែប្រកាន់ថា ល្គឹកណា អត្តសញ្ញាណឆ្អឹងទាំងអស់ដែលរកឃើញក្នុងរថយន្តត្រូវបានបញ្ជាក់ ទើបអាចកំណត់បានថា លោកវ៉ាលីយ៉េ និងកូនទាំង៤នាក់ពិតជាស្លាប់មែន ។
ជុំវិញការស្លាប់នេះតាមប្រភពពីមន្ត្រីនានាបានធ្លោយឱ្យដឹងថា រកមិនឃើញតម្រុយនៃការធ្វើឃាតណាមួយទេ រហូតមកដល់ពេលនេះ ។ អ្វីដែលមុននេះត្រូវបានសង្ស័យថា ជាឃាតកម្មនោះគឺដោយសារតែគេបានប្រទះឃើញឆ្អឹងក្បាលសង្ស័យក្បាលលោកវ៉ាលីយ៉េនៅក្នុងវ៉ាលីសដែលចំហមាត់នៅបាំងក្រោយរថយន្ត ទើបមានការសន្មត់ថា លោកត្រូវឃាតកសម្លាប់ដោយកាត់ក្បាល ។ ប៉ុន្តែការសង្ស័យលើកដំបូងៗ ខណៈពេលប្រទះឃើញសាកសពនៅក្នុងរថយន្តពិតជាអាចសន្និដ្ឋានខុសដោយសារតែមានសន្និដ្ឋានថា មូលហេតុដែលលលាដ៍ក្បាលរបស់លោកវ៉ាលីយ៉េដាច់ពីកនោះអាចដោយសារតែការស្ទូចទាញរថយន្តចេញពីក្នុងត្រពាំងទឹក ហើយរបេះធ្លាក់ដោយចៃដន្យចូលទៅក្នុងវ៉ាលីស ដែលចំហមាត់នោះ ។
ប្រសិនបើស្ថិតក្នុងស្ថានភាពបែបនេះមែន ការមន្ទិលសង្ស័យទៅលើឃាតកម្ម ក៏ត្រូវងងឹតឈឹងដដែល ។ មិនខុសពីព័ត៌មានដំបូងៗដែលមានការសង្ស័យថា អាចជាការធ្វើអត្តឃាតពីព្រោះតែលោកវ៉ាលីយ៉េក៏មានប្រភពព័ត៌មានកន្លងមកបានកត់សម្គាល់ថា មានស្មារតី មិនប្រក្រតី ហើយជាមួយនេះប្រសិនបើជាឃាតកម្មមែននោះ ប្រហែលជាមិនមានធាតុប្រពន្ធខ្មែររបស់លោកនៅក្នុងរថយន្តនោះទេ ។ តែពេលដែលត្រូវបានស្ទូចឡើងយកមកធ្វើការពិនិត្យ ឃើញមានធាតុមួយរបស់ភរិយាលោកនៅក្នុងនោះដែរ ។
ថ្វីបើមានការសន្និដ្ឋានបែបណា ក៏បញ្ហាចម្ងល់នៅតែមានជុំវិញមរណភាពរបស់គ្រួសារបារាំងមួយនេះ ខណៈពេលការធ្វើកោសល្យវិច័យរបស់សមត្ថកិច្ចប៉ូលិសបារាំងនៅតែបន្តស្វែងរកការពិត ។ តាមមន្ត្រីស្ថានទូតឱ្យដឹងថា រឿងក្តីមួយនេះប្រព័ន្ធយុត្តិធម៌បារាំងបានបើកការស៊ើបអង្កេតដោយមានការតែងតាំងចៅក្រមស៊ើប អង្កេតផង ។ ជាលទ្ធផលនៃការសិក្សាស្រាវជ្រាវត្រូវបានមន្ត្រីស្ថានទូតបារាំងនិយាយថា មិនទាន់មានការវាយតម្លៃ ឬសន្និដ្ឋានយ៉ាងណានៅឡើយទេ ។ មន្ត្រីកម្ពុជាដែលកំពុងសហការជាមួយសមត្ថកិច្ចបារាំងបាននិយាយថា បានជារឿងរ៉ាវនេះស្មុគស្មាញ ដោយសារតែប៉ុន្មានសបា្តហ៍មុនពេលគ្រួសារបារាំងបាត់ខ្លួន គឺពួកគេហាក់ដូចជាកាត់ផ្តាច់ទំនាក់ទំនង ឬមានការទាក់ទងតិចតួចជាមួយអ្នកជិតខាង ៕
ដកស្រង់ ពីគេហទំព័រ កោះសន្តិភាព
សូមមិត្តទាំងអស់ជួយចុច Add a comment ដើម្បីផ្តល់ជាមតិ និងជួយ Share នៅលើ Facebook របស់អ្នក។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]