រាជធានីភ្នំពេញ ៖ ជនដៃដល់ជាចោរ៣នាក់ ក្នុងនោះមានស្រី២នាក់ ដែលប្រើដំបង និងដុំថ្មវាយសម្លាប់បុរសជាគូដណ្តឹង និងបៀតបៀនរូបរាងកាយនារីជាគូដណ្តឹងកាលពីមួយសប្តាហ៍កន្លងទៅនោះ ត្រូវបានកម្លាំងនគរបាលខណ្ឌពោធិ៍សែនជ័យ ដឹកនាំដោយលោកវរសេនីយ៍ទោ ប៊ន សំអាត អធិការនគរបាលខណ្ឌចុះបង្ក្រាបចាប់បានជាបន្តបន្ទាប់ កាលពីវេលាម៉ោងជិត៤ទៀបភ្លឺថ្ងៃទី២៤ មករា ២០១២ នៅភូមិព្រៃទា សង្កាត់ចោមចៅ ខណ្ឌពោធិ៍សែនជ័យ ខណៈពួកគេវាយប្លន់ម៉ូតូរបស់គូសង្សារផ្សេងទៀត ។
សូមបញ្ជាក់ថា មុនពេលឈានដល់ការចាប់ខ្លួនពួកចោរ គឺនៅវេលាពាក់កណ្តាលអធ្រាត្រថ្ងៃទី២៣ មករា ២០១២ មានគូសង្សារមួយគូបានស្កាត់ជួបគ្នាសាសងគ្នា និងអោបថើបគ្នា ហើយពេលនោះស្ត្រីបក្សពួកចោរឈ្មោះអាជីង (អ្នកដើរមើល ឬមើលផ្លូវ) ឃើញគេបញ្ឈរម៉ូតូថើបគ្នាបែបនេះ ក៏រត់ទៅប្រាប់គ្នារបស់នាងឱ្យមកប្លន់ ។ បានដូចចិត្តពួកចោរមានគ្នា៤នាក់ មកធ្វើសកម្មភាពប្លន់ប្រាកដមែន ដែលពេលនោះគេប្រើកាំបិតស្រួចភ្ជង់ប្លន់យកម៉ូតូទៅបាត់...មួយសន្ទុះក្រោយមកក៏ដឹងដល់ប៉ូលិសល្បាត ហើយតាមព័ទ្ធចាប់ពួកចោរបាន២នាក់ គឺស្រីម្នាក់ និងប្រុសម្នាក់ នាវេលាម៉ោងជិត៤ទៀបភ្លឺ និងបន្តមកដល់ព្រឹកឡើងចាប់បានស្រីម្នាក់ទៀត ។
ក្រោយពីចាប់ក្រុមចោរប្លន់នេះបានហើយ ទើបបែកធ្លាយដល់រឿងប្លន់វាយសម្លាប់គូដណ្តឹងវ័យក្មេងកាលពីមួយសប្តាហ៍កន្លងទៅ ។ ជនសង្ស័យ៣នាក់ដែលចាប់បានមាន ១-ឈ្មោះអាម៉ាប់ (ប្រុស) ២-ឈ្មោះវ៉ាន់ជីង (ស្រី) ជាអ្នកមើលផ្លូវ ឬដើរមើលឱ្យតែឃើញមានគូសង្សារណាចេញមកជួបគ្នានៅកន្លែងស្ងាត់ គឺនាងទូរស័ព្ទប្រាប់បក្សពួកនាងឱ្យមកប្លន់ និងម្នាក់ទៀតជាស្រីមិនទាន់ស្គាល់ឈ្មោះត្រូវជាប្រពន្ធចោរប្លន់យកម៉ូតូគេទៅបាត់យប់មិញ ។ បក្សពួកចោរទាំងអស់អាចមានគ្នាលើសពី៥នាក់ ។
គួររំលឹកថា គូដណ្តឹងមួយគូពេលត្រឡប់មកពីដើរលេងវិញ ខាងប្រុសជូនខាងស្រីទៅកាន់លំនៅឋានបានពាក់កណ្តាលផ្លូវស្រាប់តែមានជនអន្ធពាលមួយក្រុមបើកម៉ូតូ២គ្រឿងកៀរឱ្យគូស្នេហ៍នោះឈប់ រួចហើយពួកគេព្រួតវាយដោយកំណាត់ឈើ និងដុំថ្មឥតត្រា ប្រណីបណ្តាលឱ្យយុវបុរសគូដណ្តឹងស្លាប់បាត់បង់ជីវិតនៅនឹងកន្លែង ឯយុវតីរងរបួសក្បាលធ្ងន់ធ្ងរត្រូវបានបញ្ជូនទៅសង្គ្រោះនៅមន្ទីរពេទ្យកាល់ម៉ែត និងភ្លាមៗនោះ ពួកជនដៃដល់ប្លន់យកម៉ូតូរបស់គូស្នេហ៍ទៅបាត់បន្សល់ទុកសោកនាដកម្មគួរឱ្យសោកស្តាយ និងឈឺចាប់ពីសំណាក់ប្រជាពលរដ្ឋ និងសាច់ញាតិ។
ហេតុការណ៍តាមស្ទាក់វាយប្លន់សម្លាប់នេះ បានកើតឡើងកាលពីវេលាម៉ោង៨យប់ថ្ងៃទី១៦ មករា ២០១២ នៅលើកំណាត់ផ្លូវបេតុង ស្ថិតក្នុងភូមិដំណាក់ សង្កាត់ភ្នំពេញថ្មី ខណ្ឌសែនសុខ ។យុវបុរសដែលស្លាប់ឈ្មោះឱក ចំរើន អាយុ២០ឆ្នាំ ជាកម្មកររោងចក្រកាត់ដេរ នៅម្តុំព្រៃទា សង្កាត់ចោមចៅ ស្នាក់នៅភូមិវិមានទ្រង់ សង្កាត់ក្រាំងធ្នង់ ខណ្ឌពោធិ៍សែនជ័យ ត្រូវក្រុមជនអន្ធពាលវាយបែកមុខបែកមាត់ បែកក្បាលស្លាប់នៅ នឹងកន្លែង ពេលនេះកំពុងធ្វើបុណ្យនៅវត្តក្រាំងធ្នង់ សង្កាត់ក្រាំងធ្នង់ ។ យុវតីជាគូដណ្តឹងរបស់យុវបុរសដែលស្លាប់ឈ្មោះ ស្រីនិច អាយុ២១ឆ្នាំ ជាកម្មការិនីរោងចក្រកាត់ដេរ នៅក្នុងសង្កាត់ទឹកថ្លា ត្រូវក្រុមជនដៃដល់វាយក្បាលនឹងដុំថ្មបណ្តាលឱ្យបែករងរបួសធ្ងន់ធ្ងរ កំពុងស្ថិតក្នុងភាពសង្គ្រោះបន្ទាន់នៅមន្ទីរពេទ្យកាល់ម៉ែត។
តាមប្រភពព័ត៌មានពីកន្លែងកើតហេតុ បានឱ្យដឹងថា ខណៈប៉ូលិសចុះទៅអន្តរាគមន៍ដល់កន្លែងកើតហេតុ ក្រុមជនដៃដល់បានគេចខ្លួនបាត់អស់ទៅហើយ ដែលគេប៉ាន់ប្រមាណថា ពួកគេមានគ្នាពី៣ទៅ៤នាក់ ។ ចំណែកយុវតីរងគ្រោះត្រូវបានគេឃើញអាក្រាតកាយ សន្លប់ស្តូកស្តឹង ហើយប៉ូលិសលើកដាក់រថយន្តសាមុយបញ្ជូនទៅសង្គ្រោះ ។ ព័ត៌មានលម្អិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព 87.75 ភ្នំពេញ, 87.5បាត់ដំបង៕
ដកស្រង់ ពីគេហទំព័រ កោះសន្តិភាព
សូមមិត្តទាំងអស់ជួយចុច Add a comment ដើម្បីផ្តល់ជាមតិ និងជួយ Share នៅលើ Facebook របស់អ្នក។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
