ខេត្តពោធិ៍សាត់ ៖ បុរសពីរនាក់ជាឪពុកនិងកូនបានត្រូវប៉ូលិសស្រុកបាកានឃាត់ខ្លួនកាលពីថ្ងៃទី២០ មករា វេលាម៉ោង៥ និង៤៥នាទីល្ងាចពីបទលាក់ទុក និងប្រើប្រាស់អាវុធខុសច្បាប់ ។ ការឃាត់ខ្លួនបានធ្វើឡើង ខណៈពេលជនសង្ស័យទាំងពីរនាក់កំពុងជិះម៉ូតូអោបការុងដែលក្នុងនោះមានកាំភ្លើងធុន AK បត់មួយដើម បង់១ មាន៣៩គ្រាប់ និងកាំបិត១ ។
លោកវរសេនីយ៍ត្រីប៉ែន ទុង អធិការនគរបាលស្រុកបាកាននិយាយថា បន្ទាប់ពីមានករណីប្លន់ប្រដាប់អាវុធយកម៉ូតូមួយគ្រឿងបាញ់មនុស្សស្លាប់ម្នាក់នៅវត្តរបត់រំដួល ឃុំផ្ទះរុង ស្រុកភ្នំក្រវាញ កាលពីយប់ថ្ងៃទី១៧ មករា ឆ្នាំ២០១២ មក យើងបានពង្រឹងកម្លាំងគ្រប់ប៉ុស្តិ៍ទាក់ទងគ្នាគ្រប់ស្រុក ដើម្បីស្វែងរកមុខសញ្ញាក្រុមចោរទាំងនោះ ។ លុះនៅល្ងាចថ្ងៃទី២០ មករា ឃើញជនសង្ស័យពីរនាក់ឪពុក និងកូនជិះម៉ូតូអោបការុងនៅចំណុចខាងត្បូងស្ពានវត្តបាកាន ឃុំត្រពាំងជង ស្រុកបាកាន ក៏ហៅឈប់ដើម្បីត្រួតពិនិត្យមើល ស្រាប់តែឃើញមានកាំភ្លើង AK ក៏ឃាត់ខ្លួនតែម្តង ។ ឪពុកឈ្មោះជុំ ជឿម អាយុ៥២ឆ្នាំ រស់នៅភូមិកោះកែវ ឃុំត្រពាំងជង រីឯកូនប្រុសឈ្មោះជុំ ចេង អាយុ៣០ឆ្នាំ នៅភូមិគៀន ឃុំកោះជុំ ស្រុកកណ្តៀង ។ ម៉ូតូម៉ាកហុងដា C125 ពណ៌ខ្មៅ ពាក់ស្លាកលេខពោធិ៍សាត់ 1B.0345 និងទូរស័ព្ទ១គ្រឿងត្រូវបានដកហូតទុក ។
នៅចំពោះមុខសមត្ថកិច្ចជុំ ជឿម បានសារភាពថា មុនប្លន់ម៉ូតូ៧ថ្ងៃខ្លួនបានរៀបចំកម្លាំងមានគ្នា៣នាក់ទៅប្លន់នៅខាងលិចវត្តបត់រំដួល តែមិនបានសម្រេចដោយសារផ្ទះដែលត្រូវប្លន់នោះបិទទ្វារជិត ហើយឆ្កែព្រូសខ្លាំងពេក ក៏នាំគ្នាដកថយវិញ ។ ចំណែកប្លន់ម៉ូតូនៅផ្សារបត់រំដួល កាលពីយប់ថ្ងៃទី១៧ នោះ ខ្លួនមិនបានចូលរួមទេ ប៉ុន្តែជាបក្សពួករបស់ខ្លួនដែរ ។ ជនសង្ស័យបន្តទៀតថា នៅថ្ងៃទី២០ មករា ខ្លួនបានរៀបចំកម្លាំងទៅប្លន់នៅស្រុកវាលវែង ដោយបានណាត់គ្នារួចអស់ហើយ ។ លុះទើបតែជិះម៉ូតូអោបការុងកាំភ្លើងពីរនាក់កូនប្រុសទៅដល់ខាងត្បូងស្ពានវត្តបាកាន ក៏ត្រូវសមត្ថកិច្ចស្ទាក់ឃាត់ខ្លួនតែម្តង ។
ជនសង្ស័យទាំងពីរនាក់ឪពុកនិងកូនត្រូវបានកសាងសំណុំរឿងបញ្ជូនទៅតុលាការនាថ្ងៃទី២២ មករា នេះ ដើម្បីចាត់ការទៅតាមនីតិវីធីដោយរួមទាំងវត្ថុតាងផងដែរ ។ មុខរបរស្របច្បាប់មានច្រើនគគោកមិនធ្វើ បែរជាដើរប្លន់បាញ់សម្លាប់មនុស្សដូចជីវិតសត្វ វាសមនឹងជាប់គុកទាំងឪពុក និងកូនបែបនេះហើយ ៕
ដកស្រង់ ពីគេហទំព័រ កោះសន្តិភាព
សូមមិត្តទាំងអស់ជួយចុច Add a comment ដើម្បីផ្តល់ជាមតិ និងជួយ Share នៅលើ Facebook របស់អ្នក
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]