រាជធានីភ្នំពេញ ៖ កញ្ញាពុំ ដាលក្ខណ៍ ទើបតែរះឡើងក្នុងពិភពសិល្បៈសម្តែងកាលពីពេលថ្មីៗនេះ តែនាងមានមហិច្ឆតាចង់មានកេរ្តិ៍ឈ្មោះល្បីឆាប់ៗ ។ ក្នុងវ័យ១៨ឆ្នាំ ទឹកមុខញញឹមជានិច្ច មានរូបសម្ផស្សស្រស់ស្អាត ដាលក្ខណ៍ រៀបរាប់ឱ្យដឹងថា ដោយនាងស្រលាញ់សិល្បៈសម្តែងតាំងពីកុមារភាពមក នៅឆ្នាំ២០១០ ទោះបីកំពុងតែសិក្សាចំណេះទូទៅក៏ដោយ ក៏នាងឆ្លៀតពេលវេលាចូលហាត់រៀនសម្តែងនៅក្នុងក្លឹបសិល្បៈ ។
ក្រោយមកនាងបានចូលរួមសម្តែងកាយវិការខារ៉ា អូខេឱ្យផលិតកម្មក្រៅប្រទេសជាច្រើនដូចជា ផលិតកម្មនាគហោះ រៃមាស ម៉ៃសាម៉េត តោមាស និងបុប្ផាជាដើម ។កញ្ញាពុំ ដាលក្ខណ៍ នៅឆ្នាំ២០១២នេះ បានចូលរួមសម្តែងក្នុងខ្សែភាពយន្តរឿង«សាលតម្កល់សព» និងរឿង«ស្នេហ៍ខ្ញុំអុីចឹងសោះ» ជាតួអង្គគ្រូពេទ្យ និងជាតួរាយរង ។
នៅពេលប្រឡងបាក់ឌុបរួចនាងដាលក្ខណ៍ ប្តេជ្ញានឹងខិតខំហាត់រៀនសម្តែងបន្តទៀត ដើម្បីឈានទៅរកភាពល្បីឈ្មោះក្នុងពិភពសិល្បៈ ។ ពេលនេះទោះបីជាមិនទាន់មានគេស្គាល់ជាទូទៅក៏ដោយ ក៏នាងមានចិត្តសប្បាយរីករាយដែរ ដោយបានក្លាយជាតារាសម្តែង និងជាអ្នកដើរបង្ហាញម៉ូដដូចក្តីប្រាថ្នារបស់នាងពីកុមារភាពមក។
ទៅថ្ងៃអនាគតនាងនឹងខិតខំប្រឹងប្រែងបញ្ចេញទេពកោសល្យ សម្តែងឱ្យអស់ពីសមត្ថភាពដែលនាងធ្លាប់ហាត់រៀនកន្លងមក ។
កញ្ញា ពុំ ដាលក្ខណ៍ ជាកូនកំព្រាម្តាយ មានតែឪពុកឈ្មោះពុំ ផល្លី ជាមន្ត្រីស៊ីម៉ាក់ ។ នាងជាកូនស្រីពៅក្នុងចំណោមបងប្អូនស្រី២នាក់ ។ ដាលក្ខណ៍ មានស្រុកកំណើតនៅភូមិព្រៃព្រីងខាងត្បូង សង្កាត់ចោមចៅ ខណ្ឌដង្កោ រាជធានីភ្នំពេញ ។
តារាសម្តែងថ្មីនេះ អះអាងថា នាងមិនទាន់មានសង្សារទេ ហើយក៏មិនទាន់ចង់មានដែរ ព្រោះជាប់រវល់សិក្សារៀនសូត្រ ។ នាងនិយាយថា «ចំពោះរឿងស្នេហាចាំនាងខ្ញុំមានអាយុច្រើនបន្តិចសិន ព្រោះសព្វថ្ងៃនាងខ្ញុំមានមហិច្ឆតាចង់ក្លាយជាតារាសម្តែង និងជាតារាបង្ហាញម៉ូដដែលមានមហាជនគាំទ្រច្រើន ហើយមានកេរ្តិ៍ឈ្មោះល្បី» ។ កញ្ញាពុំ ដាលក្ខណ៍ និយាយថា ការចូលសិល្បៈធ្វើឱ្យយើងដឹងពីអ្វីដែលល្អៗច្រើន ហើយក៏ជាស្ពានចម្លងយុវវ័យឱ្យក្លាយទៅជាពលរដ្ឋល្អ និងបានដើរកម្សាន្តនៅតំបន់ទេសចរណ៍ បុរាណ តំបន់ទេសចរណ៍ធម្មជាតិទូទាំងប្រទេសទៀតផង៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]