ខេត្តស្វាយរៀង ៖ មនុស្សប្រុសស្រី៤នាក់ រងរបួសធ្ងន់រហូតសន្លប់រដូករណែលនៅលើថ្នល់ បណ្តាលមកពីគ្រោះថ្នាក់ចរាចរណ៍ដែលបង្កឡើងដោយបុរសស្រវឹងស្រា ជិះម៉ូតូឆ្លងថ្នល់មិនប្រុងប្រយ័ត្ន ។
ករណីនេះកើតឡើងកាលពីថ្ងៃទី១៤ ឧសភា វេលាម៉ោង១១និង៣០នាទីព្រឹក នៅលើកំណាត់ផ្លូវជាតិលេខ១ ត្រង់ចំណុចខ្លោងទ្វារវត្តសិលាចារឹក ហៅវត្តក្តីក្រឹប ភូមិបឹងស្នោ ឃុំល្វា ស្រុកព្រះស្តេច ខេត្តព្រៃវែង ។ បើតាមស្ត្រីរងគ្រោះប្រាប់ឱ្យដឹងថា នាងឈ្មោះបាន ម៉ាឡា អាយុ៣៥ឆ្នាំ នៅភូមិច្រកម្ទេស សង្កាត់ច្រកម្ទេស ក្រុងបាវិត ជិះម៉ូតូម៉ាកឌ្រីម សេ១២៥ ស៊េរី២០១០ ឌុនកូនស្រីឈ្មោះបាន ដាលីន អាយុ១៣ឆ្នាំ ទៅលេងរាជធានីភ្នំពេញ ក៏ជួបជាមួយប្អូនធម៌ឈ្មោះសៀង បុប្ផា ភេទស្រី អាយុ៣២ឆ្នាំ នៅខេត្តតាកែវ ទៅលេងភ្នំពេញដែរ ក៏ឌុបគ្នា៣នាក់បងប្អូន និងកូនដើរលេងនៅរាជធានីភ្នំពេញ២ថ្ងៃ ។ លុះដល់ថ្ងៃទី១៦ ឧសភា បបួលគ្នាទៅលេងផ្ទះនៅភូមិច្រកម្ទេស ក្រុងបាវិត ។ ពេលជិះឌុបគ្នាដល់ខ្លោងទ្វារវត្តក្តីក្រឹប ស្រាប់តែម៉ូតូសង់កូរ៉េ ១គ្រឿង ជិះពីទិសខាងត្បូងទៅជើងកាត់ទទឹងផ្លូវជាតិលេខ១ មកបុកពេញទំហឹង បណ្តាលឱ្យដួលបោកក្បាលសន្លប់ទាំងសងខាងដេករដូករណែលលើទ្រូង ថ្នល់។
ស្ត្រីរងគ្រោះបន្តថា នាងបាក់ជើងឆ្វេង រលាត់ខ្នងដៃសងខាង បែកចិញ្ចើម របួសផ្ទៃមុខខាងឆ្វេង ច្រមុះ សន្លប់នៅនឹងកន្លែង ឯឈ្មោះបាន ដាលីន ជាកូនបែកក្បាល ដាច់ផ្ទៃមុខ រលាត់ដៃជើង សន្លប់នៅនឹងកន្លែង និងឈ្មោះសៀង បុប្ផា ជាប្អូនរបួសបាក់ដងកាំបិតខាងឆ្វេង បែកក្បាលពីក្រោយផុងលលាដ៍ រលាត់ដៃជើងសន្លប់នៅនឹងកន្លែង ។ ដោយឡែកបុរសបង្កហេតុដួលបោកក្បាលសន្លប់នៅនឹងកន្លែងដែរ ត្រូវសមត្ថកិច្ចដឹកយកទៅមន្ទីរពេទ្យបង្អែកស្រុកកំពង់ត្របែក ។ ចំពោះរូបនាង៣នាក់ប្អូន និងកូនត្រូវគ្រូពេទ្យបញ្ជូនទៅកាន់មន្ទីរពេទ្យខេត្តស្វាយរៀង ដើម្បីសង្គ្រោះ ។
ម៉ូតូទាំងសងខាងត្រូវសមត្ថកិច្ចប៉ុស្តិ៍រដ្ឋ បាលឃុំល្វា យកទៅរក្សាទុកដើម្បីដោះស្រាយតាមច្បាប់ ។ សមត្ថកិច្ចប្រាប់ឱ្យដឹងថា ស្ត្រីរងគ្រោះជិះម៉ូតូពីទិសខាងលិចទៅកើតតាមស្តាំដៃ រីឯជនស្រវឹងស្រាជោកជាំជិះម៉ូតូមកពីទិសខាងត្បូងតាមផ្លូវ លំឡើងឆ្លងថ្នល់មកជើង ទើបបណ្តាលឱ្យបុកគ្នាបែបនេះ ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
