រាជធានីភ្នំពេញ ៖ មានរយៈពេលជាង១០ថ្ងៃមកហើយដែលបុរសជាជនដៃដល់មិនទាន់ ត្រូវបានចាប់ខ្លួននៅឡើយទេ ពីបទចាក់សាំងដុតស្ត្រីមេម៉ាយស្រស់ប្រិមប្រិយម្នាក់ទាំង រស់បណ្តាលឱ្យរងគ្រោះធ្ងន់ធ្ងរបញ្ជូនមកសង្គ្រោះនៅ មន្ទីរពេទ្យកាល់ម៉ែត ហើយបន្ទាប់មកត្រូវបានក្រុមគ្រួសារបញ្ជូនបន្តទៅ ព្យាបាលនៅប្រទេសវៀតណាម ។
ក្រុមគ្រួសារស្រ្តីរងគ្រោះបានឲ្យកោះសន្តិ ភាពដឹងថា ស្រ្តីមេមា៉យកូនបីរូបនេះឈ្មោះ ស៊ុយ វ៉ាន់ឌី មានទីលំនៅភូមិ ឃុំថ្មស ស្រុកបទុមសាគរ ខេត្តកោះកុង ត្រូវជនអគតិឈ្មោះយក់វណ្ណៈ យកសាំងចាក់ស្រោចពីលើហើយយកដែកកេះឆួលដុតទាំងរស់នៅមុខផ្ទះកាលពី វេលាម៉ោង៩និង៣០នាទីយប់ថ្ងៃទី៦ ខែឧសភាឆ្នាំ២០១២បណ្តាលឲ្យឆេះរោលពេញខ្លួននិងត្រូវបានដឹកតាមអូប័រ បញ្ជូនទៅមន្ទីរពេទ្យខេត្តព្រះសីហនុ ។ ដោយរបួសធ្ងន់ពេកក៏បញ្ជូនបន្តមកមន្ទីរពេទ្យកាល់ម៉ែតរាជធានីភ្នំពេញ ។ សម្រាកព្យាបាលនៅមន្ទីរពេទ្យកាល់ម៉ែតបានបួនថ្ងៃ ដោយមើលឃើញស្រ្តីរងគ្រោះស្ថិតក្នុងសភាពធ្ងន់ធ្ងរពេកសាច់ញាតិក៏សម្រេច ចិត្តសុំគ្រូពេទ្យបញ្ជូនទៅមន្ទីរពេទ្យប្រទេសវៀតណាម ។
អស់រយៈពេល៥ថ្ងៃមកហើយដែលស្រ្តីរងគ្រោះឈ្មោះស៊ុយ វ៉ាន់ឌី កំពុងត្រូវបានសម្រាកព្យាបាលនៅមន្ទីរពេទ្យចារី ឯទីក្រុងហូជីមិញ ក៏ប៉ុន្តែអ្នករងគ្រោះរូបនេះស្ថិតក្នុងសភាពធ្ងន់ធ្ងរដដែល។ តាមរយៈលោកគ្រូពេទ្យនៅទីនោះបានប្រាប់ថា ជនរងគ្រោះរលាកទងសួតធ្ងន់ធ្ងរត្រូវប្រើរយៈពេលយូរក្នុងការ ព្យាបាលនិងសុំឲ្យក្រុមគ្រួសារត្រៀមប្រាក់ចាប់ពី៥ពាន់ដុល្លាដល់មួយ ម៉ឺនដុល្លារសម្រាប់ការចំណាយទិញឈាមបញ្ចូលនិងថ្នាំ ពេទ្យផ្សេងៗទៀតសម្រាប់ព្យាបាល ។ ក្រុមគ្រួសារស្រ្តីរងគ្រោះបានបញ្ជាក់ថា រហូតមកដល់ថ្ងៃទី១៥ ឧសភា នេះ ជនរងគ្រោះអាចនិយាយបានខ្លះៗនិងហូបបានបន្តិបន្តួចដែរ ។
ស្ថិតនៅក្នុងស្ថានភាពចំពោះមុខនេះក្រុម គ្រួសារស្រ្តីរងគ្រោះក៏ដូចជាកូនប្រុស ស្រីបីនាក់ដែលកំពុងកំព្រីកំព្រាខ្វះភាពកក់ក្តៅពីម្តាយបានលើកដៃប្រណម្យ សុំកិច្ចអន្តរាគមន៍ពីលោកជំទាវកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលតែងតែយកចិត្តទុកដាក់ដល់ស្រ្តីគ្រប់រូបដែលត្រូវគេរំលោភបំពាន ប្រើអំពើហិង្សានោះ មេត្តាជួយផង... ។
គួររំលឹកថា រឿងរ៉ាវដុតមនុស្សទាំងរស់នេះ គឺផ្តើមចេញពីស្នេហាត្រីកោណមួយបានផ្ទុះភ្លើងកំហឹងកើតឡើង នៅភូមិថ្មស ឃុំថ្មស ស្រុកបទុមសាគរ រហូតឈានដល់ការចាក់សាំងដុតមនុស្សទាំងរស់ ដោយចោទថាអ្នកមេម៉ាយរូបស្រស់ក្បត់ពាក្យសន្យាថា នឹងរៀបការខែឧសភា ឆ្នាំ២០១២ តែបែរជាដោះដៃទៅវិញ ធ្វើឱ្យខាងប្រុសលែងប្រពន្ធខក។
គួររំលឹកថា លោកអនុសេនីយ៍ទោ ហ៊ួយ តារា នាយប៉ុស្តិ៍នគរបាលឃុំថ្មស បានប្រាប់កោះសន្តិភាពតាមទូរស័ព្ទកាលពីថ្ងៃទី៧ ឧសភាថា រឿងនេះផ្តើមពីស្នេហាត្រីកោណ ។ លោកមេប៉ុស្តិ៍និយាយថា បុរសម្នាក់ឈ្មោះ យក់ វណ្ណៈ អាយុ៤២ឆ្នាំ ជាគ្រូពេទ្យតូចតាចម្នាក់មានទូរលក់ថ្នាំមួយនៅមុខផ្ទះ និងមានប្រពន្ធឈ្មោះ យ៉េង បាវ អាយុ៤១ឆ្នាំ ។ ក្នុងអំឡុងពេលប្រហែល១ឆ្នាំកន្លងផុតទៅគ្រូពេទ្យយក់ វណ្ណៈ បានតាមស្រឡាញ់ស្រ្តីមេម៉ាយកូន៣ ឈ្មោះ ស៊ុយ វ៉ាន់ឌី អាយុ៣៧ឆ្នាំ មានមុខរបរជាអ្នកលក់សាំងនិងគ្រឿងទេសបន្តិចបន្តួច ។ ស្នេហាត្រីកោណនេះបានអូសបន្លាយអស់ពេលជាង១ឆ្នាំ រហូតដល់អ្នកភូមិថ្មសបានដឹងឮស្ទើរមួយភូមិ ។
មន្ត្រីនគរបាលប៉ុស្តិ៍ដដែលបានរៀបរាប់ ទៀតថា ដោយសារការផ្អែមល្ហែមរវាងអ្នកមេម៉ាយកូន៣ និងពេទ្យណាក់មើលទៅដូចស្រមោចនិងស្ករ ធ្វើឱ្យប្រពន្ធដើមពេទ្យណាក់បានទៅជេរអ្នកមេម៉ាយដោយចោទថា ជាស្ត្រីដណ្តើមប្តីគេ ។ ពេលអ្នកមេម៉ាយឮដូច្នេះក៏បានរករឿងឈ្លោះជាមួយប្រពន្ធពេទ្យ ណាក់ដល់ផ្ទះ មិនតែប៉ុណ្ណោះ អ្នកមេម៉ាយបានកាប់ស្ត្រីជាប្រពន្ធដើម១កាំបិតចំដៃទៀតផង កាលពីអំឡុងពេលប្រហែល៨ខែកន្លងផុតទៅ ។ បន្ទាប់មករឿងនេះ ក៏បានក្តីក្តាំងរវាងប្រពន្ធប្តីរហូតដល់តុលាការចេញសាល ក្រមលែងលះគ្នា ទៀតផង ។ នៅក្នុងខណៈនោះដែរអ្នកមេម៉ាយកូន៣ ក៏បានសន្យាជាមួយពេទ្យណាក់ថា បើលែងលះដាច់ស្រឡះជាមួយប្រពន្ធដើម ខ្លួនព្រមរៀបការជាមួយនៅខែឧសភានេះ ។
ប្រភពដដែលបន្តទៀតថា រហូតដល់ថ្ងៃទី៦ ឧសភា ឆ្នាំ២០១២ មិនដឹងជាមានទំនាស់សម្តីគ្នាយ៉ាងម៉េច ទើបខាងស្រីប្រកែកថា មិនព្រមរៀបការ ហើយក៏មានការប្រតាយប្រតប់គ្នា រហូតដល់មានការខឹងសម្បាក៏យកសាំងដបដែលមាននៅនឹងផ្ទះស្រាប់ នោះជះទៅលើអ្នកមេម៉ាយរួចឆួលដែកកេះដុតស្ត្រីមេម៉ាយ កូន៣ជាគូស្នេហ៍របស់ខ្លួននោះតែម្តង ហើយគេចខ្លួនបាត់ ។ ដោយសាររាត្រីនោះមានភ្លៀងធ្លាក់ខ្លាំង អ្នកមេម៉ាយដែលត្រូវភ្លើងឆេះពេញរាងកាយក៏បានននៀលខ្លួន ទៅនឹងដីសើមផងនិងទឹកភ្លៀងជួយរំលត់ភ្លើងផង គឺននៀលរហូតដល់រលត់គ្មានអ្នកណាឃើញឡើយ ។ ឆ្លៀតពេលកំពុងភ្លៀងខ្លាំង បុរសអគតិនោះ ក៏គេចខ្លួនតាមអូប័របាត់ទៅ។
ទោះជាយ៉ាងណាក៏ដោយ ការចាក់សាំងដុតមនុស្សទាំងរស់បែបនេះជាការប៉ុនប៉ងធ្វើមនុស្ស ឃាតដោយចេតនា ជាបទឧក្រិដ្ឋ និងជាអំពើដែលមនុស្សស្អប់ខ្ពើមបំផុត ត្រូវតែចាប់ខ្លួននាំមកផ្តន្ទាទោសតាមច្បាប់ ដែលរហូតមកដល់ពេលនេះ មហាជនកំពុងរង់ចាំមើលស្នាដៃសមត្ថកិច្ចស្រុកបទុមសាគរ តើចាប់ឬអត់ ?
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
