រាជធានីភ្នំពេញ ៖ រថយន្តមែរសឺដេស ពណ៌ខ្មៅមួយគ្រឿង បានជ្រុលទៅបុកគូទរថយន្តកាមរីគូទហើម ពណ៌ស្ករមួយគ្រឿង ដែលបើកបរដោយជនជាតិកូរ៉េ ខណៈពេលរថយន្តឈប់បន្តកន្ទុយគ្នានៅភ្លើងស្តុបក្បែរសណ្ឋាគារអាំង ទែរកុងទីណង់តាល់ បណ្តាលឱ្យបុរសវ័យចំណាស់ជនជាតិកូរ៉េម្នាក់ជិះក្នុងរថយន្តរង របួសថ្លោះចង្កេះ ។ គ្រោះថ្នាក់ចរាចរណ៍នេះកើតឡើងកាលពីវេលាម៉ោង២រសៀលថ្ងៃទី១៤ ឧសភា នៅលើមហាវិថីម៉ៅសេទុង កែងផ្លូវលេខ២០៥ ក្នុងសង្កាត់ទំនប់ទឹក ខណ្ឌចំការមន ។
ប្រភពព័ត៌មានពីកន្លែងកើតហេតុ បានឱ្យដឹងថា រថយន្តកាមរីគូទហើម ពណ៌ស្ករ ជិះគ្នា៤នាក់ ជាជនជាតិកូរ៉េ បើកតាមមហាវិថីម៉ៅសេទុង ពីជើងទៅត្បូងក្នុងទិសដៅស្របគ្នានឹងរថយន្តមែរសឺដេស ពណ៌ខ្មៅ ខណៈមកដល់ភ្លើងស្តុបមេឃងងឹតរកកល់ធ្លាក់ភ្លៀង ទើបធ្វើឱ្យអ្នកដំណើរតាមដងផ្លូវប្រញាប់ប្រញាល់គ្រប់គ្នា។ ចំណែករថយន្តកាមរីបានបើកទៅឈប់បន្តពីក្រោយរថយន្តពីរគ្រឿងទៀត ដែលឈប់នៅពីខាងមុខដោយជាន់ហ្វ្រាំងឈប់រង់ចាំភ្លើងស្តុបធ្វើឱ្យ រថយន្តមែរសឺដេស ដែលបើកលឿនជាន់ហ្វ្រាំងមិនទាន់ក៏ជ្រុលទៅបុកគូទរថយន្តកាមរី បណ្តាលឱ្យបុរសម្នាក់វ័យចំណាស់ជាងគេជិះក្នុងរថយន្តជាជនជាតិ កូរ៉េថ្លោះចង្កេះ ។ ចំណែករថយន្តមែរសឺដេសស្រុញខាងមុខ រីឯរថយន្តកាមរីក្រពឹតកាងក្រោយ និងរលាត់ថ្នាំ ។
ក្រោយពេលកើតហេតុ ជនរងគ្រោះបានទៅព្យាបាលនៅមន្ទីរពេទ្យ ហើយភាគីទាំងពីររង់ចាំអ្នកបកប្រែមកដល់ទើបនិយាយចរចាគ្នាដោយ មិនប្តឹងផ្តល់សមត្ថកិច្ចទេ ហើយម្ចាស់រថយន្តកាមរីបានឱ្យម្ចាស់រថយន្តមែរសឺដេសយករថយន្ត របស់ខ្លួនទៅជួសជុលឡើងវិញ ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]