ខេត្តកំពង់ធំ ៖ កាលពីវេលាម៉ោង១១និង៣០នាទីយប់ថ្ងៃទី១១ ឧសភា សមត្ថកិច្ចនគរបាលក្រុងស្ទឹងសែន បានចាប់ខ្លួនជនសង្ស័យម្នាក់ ឈ្មោះលួន វីរៈ ហៅម៉ាប់ នៅផ្ទះសំណាក់ ហេង ឡាយ ស្ថិតក្នុងភូមិអាចារ្យលាក់ សង្កាត់អាចារ្យលាក់ ក្រុងស្ទឹងសែន ក្រោមការបញ្ជារបស់លោកផាន់ សុផេង ស្នងការនគរបាលខេត្ត ដឹកនាំកម្លាំងដោយលោកញ៉ែម ឈុនលី អធិការក្រុង និងមន្ត្រីក្រោមឱវាទ ពីបទលួចម៉ូតូម៉ាកឌ្រីម សេ១២៥ កាលពីថ្ងៃទី៦ ឧសភា ។
នៅចំពោះមុខសមត្ថកិច្ច ជនសង្ស័យសារភាពថា គេបានជួបម្ចាស់ម៉ូតូឈ្មោះឡេង ប៊ុនធឿន នៅជិតសណ្ឋាគារអរុណរះក៏ប្រើល្បិចធ្វើហាក់ដូចជាធ្លាប់ ស្គាល់គ្នា ។ ក្រោយពីបាននិយាយលេងជាមួយគ្នារួចមក គេសុំម្ចាស់ម៉ូតូទៅដេកជាមួយក្រែងមានបងប្អូន ឬ មិត្តភក្តិមានផ្ទះនៅកំពង់ធំ ។ ការប្រើល្បិចនេះបានសមដូចបំណងគឺម្ចាស់ម៉ូតូយល់ព្រមឱ្យទៅ ដេកជាមួយ ។
ម្ចាស់ម៉ូតូមានមិត្តម្នាក់ឈ្មោះនឹម ជុប មានផ្ទះនៅភូមិអាចារ្យលាក់ សង្កាត់អាចារ្យលាក់ ហើយម្ចាស់ផ្ទះនោះយល់ព្រមឱ្យអ្នកទាំងពីរនាក់ស្នាក់នៅ ដោយនឹកស្មានថាពួកគេជាសាច់ញាតិ ឬមិត្តភក្តិនឹងគ្នា ។ជនសង្ស័យសារភាពទៀតថា នៅវេលាម៉ោង១១និង៣០នាទីយប់ថ្ងៃទី៦ ឧសភា នៅពេលម្ចាស់ម៉ូតូកំពុងដេកលក់ គេលូកហោប៉ៅខោយកកូនសោម៉ូតូ រួចហើយជិះម៉ូតូគេចខ្លួនបាត់ ។ គេយកម៉ូតូនេះជិះដើរលេង ហើយយកទៅលក់ជាច្រើនកន្លែង តែគ្មានអ្នកណាហ៊ានទិញទេ ពីព្រោះគ្មានប័ណ្ណសម្គាល់ទោចក្រយានយន្ត និងសំបុត្រស្នាមអ្វីទាំងអស់ ។ ដោយរូបគេទាល់តំរិះរហូតដល់យប់កើតហេតុក៏ទៅជួលផ្ទះសំណាក់ ហេង ឡាយ ដេក ហើយត្រូវសមត្ថកិច្ចចាប់ខ្លួនតែម្តង ។
មន្ត្រីប៉ូលិសឱ្យដឹងទៀតថា ជនសង្ស័យឈ្មោះលួន វីរៈ អាយុ២៤ឆ្នាំ រស់នៅភូមិសាលាវិស័យកើត ឃុំសាលាវិស័យ ស្រុកប្រាសាទបល្ល័ង្ក ខេត្តកំពង់ធំ ។ក្រោយពីកសាងកសំណុំរឿងចប់សព្វគ្រប់ជនសង្ស័យត្រូវបានបញ្ជូន ទៅស្នងការដ្ឋាននគរបាលខេត្ត ដើម្បីចាត់ការតាមនីតិវិធី ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
