រាជធានីភ្នំពេញ ៖ ឧកញ៉ាម្នាក់រួមជាមួយអង្គរក្សត្រូវបានកម្លាំងសមត្ថកិច្ចចម្រុះ ស្ទាក់ចាប់បាននៅចំណុចមុខសណ្ឋាគារភ្នំពេញ ស្ថិតក្នុងសង្កាត់ស្រះចក ខណ្ឌដូនពេញ បន្ទាប់ពីផ្ទុះអាវុធអានាធិបតេយ្យចំនួន២គ្រាប់នៅតាមផ្លូវ ជាតិលេខ៥ ក្នុងស្រុកពញាឮ ខេត្តកណ្តាល ហើយត្រូវសមត្ថកិច្ចដេញប៉ផាប់ចាប់ពភីងរហូតមកដល់ កណ្តាលរាជធានីភ្នំពេញ ។
បន្ទាប់ពីចាប់ខ្លួន និងដកហូតបានរថយន្តម៉ាក RANGE ROVER ពណ៌ខ្មៅ និងកាំភ្លើងខ្លីម៉ាកឡុកមួយដើមហើយ ត្រូវកងរាជអាវុធហត្ថខណ្ឌដូនពេញ នាំយកទៅកាន់ទីបញ្ជាការដណ្តើមយកស្នាដៃ ។ ទោះបីជាយ៉ាងណា កងរាជអាវុធហត្ថព្យាយាមលាក់ឈ្មោះ និងអត្តសញ្ញាណជនបង្កផ្ទុះអាវុធនោះ ប៉ុន្តែអ្នកដំណើរស្គាល់ច្បាស់ថា ជាឧកញ៉ាម្នាក់ (យើងមិនទាន់បញ្ចេញឈ្មោះទេ) និងជាថៅកែផ្លូវយកលុយរថយន្តនៅក្នុងរាជធានីភ្នំពេញ ។ ហេតុការណ៍ព័ទ្ធចាប់បានជនបង្កផ្ទុះអាវុធអនាធិបតេយ្យនេះបានធ្វើ ឱ្យមានការភ្ញាក់ផ្អើលកាលពីវេលាម៉ោង៩និង១៥នាទីយប់ថ្ងៃទី១៤ ឧសភា នៅមុខសណ្ឋាគារភ្នំពេញ ដោយសមត្ថកិច្ចមានការខ្វែងគំនិតគ្នា ដើម្បីដណ្តើមយកស្នាដៃរៀងៗខ្លួន ។
តាមព័ត៌មានឱ្យដឹងថា នៅមុនពេលកើតហេតុមានរថយន្តម៉ាក RANGE ROVER មួយគ្រឿងខាងលើ បើកបរដោយមន្ត្រីកងរាជអាវុធហត្ថលើផ្ទៃប្រទេសម្នាក់ជាអង្គ រក្សលោកឧកញ៉ាថៅកែផ្លូវម្នាក់នោះបានធ្វើដំណើរតាមផ្លូវជាតិ លេខ៥ ក្នុងភូមិសាស្ត្រស្រុកពញាឮ ហើយបានបាញ់លេងចំនួន២គ្រាប់ នៅពេលចុះបត់ជើងតូច ។ នៅក្នុងការផ្ទុះអាវុធនោះគាប់ជួនលោកអធិការស្រុកពញាឮ ឃើញក៏បានដេញ និងប្រកាសតាមវិទ្យុទាក់ទងមកអធិការដ្ឋានខណ្ឌឫស្សីកែវ ឱ្យជួយស្ទាក់ចាប់ ។ នៅយប់នោះសមត្ថកិច្ចខណ្ឌឫស្សីកែវ រួមទាំងកម្លាំងប៉ូលិសនៃ ស្នងការដ្ឋានរាជធានីភ្នំពេញ បានដេញស្ទាក់ចាប់យ៉ាងប៉ផាប់ចាប់ពភីង ហើយទីបំផុតចាប់បាននៅមុខសណ្ឋាគារភ្នំពេញ ។
ភ្លាមៗកម្លាំងកងរាជអាវុធហត្ថខណ្ឌដូនពេញ បានទៅដល់ហើយនាំខ្លួនជននោះមកកាន់ទីបញ្ជាការកងរាជអាវុធហត្ថ ខណ្ឌ ។ នៅយប់នោះមានការភ្ញាក់ផ្អើលដោយសមត្ថកិច្ចប្រទាញប្រទង់គ្នា ដណ្តើមយកអ្នកបាញ់បោះ ។ ពេលបញ្ជូនទៅដល់ទីបញ្ជាការ ប៉េអឹមព្យាយាមលាក់ឈ្មោះជនបង្ក។ ទោះបីជាយ៉ាងណាព័ត៌មានទំលាយថា ជនបង្កជាឧកញ៉ាថៅកែផ្លូវម្នាក់ និងអង្គរក្សម្នាក់ជាមន្ត្រីកងរាជអាវុធហត្ថលើផ្ទៃប្រទេសឈ្មោះ សុខ ហួត ។ គេពុំដឹងថា សមត្ថកិច្ចចាត់ការតាមច្បាប់ ឬដោះលែងនោះទេ ប៉ុន្តែបើព្យាយាមលាក់ឈ្មោះបែបនេះហើយ គឺអាចថា ដោះលែងច្រើនជាង ៕
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
