ភ្នំពេញ : តារាសម្តែង និងចម្រៀងស្រីកម្ពុជាមួយចំនួនដែលជាអ្នកដើមទ្រូងពើងធំនិយម កំពុងដេកមិនលក់បក់មិនល្ហើយ ព្រួយខ្លាចដើមទ្រូងកែកុនរបស់ខ្លួនត្រូវទទួលរងការវាយប្រហារ ដោយជំងឺមហារីក។
ក្តីបារម្ភនេះ បានកើតមានឡើងក្រោយពេលដែល ភ្នំពេញ ប៉ុស្តិ៍ បានចេញផ្សាយអត្ថបទមួយកាលពីថ្ងៃទី២៨ ខែធ្នូ ឆ្នាំ២០១១ថា ក្រសួងសុខាភិបាលប្រទេសបារាំងបានចេញបម្រាមប្រើប្រាស់នៃស៊ីលីកូន PIP ហើយសុំឲ្យស្ត្រីបារាំងប្រមាណ៣ម៉ឺននាក់ ដែលមានផ្ទុកស៊ីលីកូនប្រភេទនេះក្នុងទ្រូង ឲ្យយកថង់ស៊ីលីកូននោះចេញ និងប្រើប្រាស់នូវស៊ីលីកូនប្រភេទថ្មីជំនួសវិញ ក្រោយពីរកឃើញមាន ករណីមហារីកសុដន់កើតឡើងលើស្ត្រី៨នាក់។
តារាចម្រៀង និងសម្តែងស្រីមួយក្តាប់ធំដែលតែងតែឡើងចុះ ហើយស្ទើរតែចាត់ទុកប្រទេសថៃ ឬប្រទេសជិតខាងមួយចំនួនទៀតជាឆ្នាំងបាយនៃការកែសម្ផស្សទៅហើយ នោះ កំពុងញញឹមគ្មានសំណើម ភ័យព្រួយរឿងសម្ផស្សនិយម ដែលនាំទៅរកជំងឺមហារីកដ៏ធ្ងន់ធ្ងរមិនអាចព្យាបាលបាន។
តារាសម្តែងមានឈ្មោះបោះសំឡេងបង្គួរម្នាក់ដែលតែងគិតថា ការកែសម្ផស្សផ្សេងៗ ពិសេសការកែកុនដើមទ្រូងឲ្យពើងធំមូលក្បំ ជាសម្រស់ជីវិតដ៏ផូរផង់នោះ បានឲ្យដឹងដោយសុំមិនបញ្ចេញឈ្មោះថា នាងបានចំណាយប្រាក់កាសមួយចំនួនធំដើម្បីកែកុន និងជួសជុលសម្រស់របស់នាងឲ្យមានភាពទាក់ទាញ ហើយអ្វីដែលនាងគិតថា ពិសេសដែលមិនអាចមើលរំលងបានគឺដើមទ្រូងដ៏សិចស៊ី។ តារាលាក់អត្តសញ្ញាណរូបនេះ បានបន្តថា រូបនាងបានទៅសម្រាកកែសម្ផស្សជាញឹកញាប់នៅប្រទេសថៃ ហើយក្នុងនោះក៏មានអ្នកសិល្បៈ និងអ្នកក្រៅសិល្បៈជាច្រើនរូបទៀតក៏បានទៅត្រដំត្រសងនឹងគ្នានោះ ដែរ។
អ្នកសិល្បៈរូបនេះ បាននិយាយថា៖ «ខ្ញុំគិតថា នារីមានដើមទ្រូងធំស្អាត ពិតជាសិចស៊ី អ៊ីចឹងហើយបានជាខ្ញុំទៅថៃហ្នឹងកែវា (ដាក់ស៊ីលីកូន) តែមិនមែនមានតែខ្ញុំទេ មានអ្នកសិល្បៈ និងអ្នកសាមញ្ញៗជាច្រើនទៀតដែលទៅកែសម្ផស្សនៅហ្នឹង»។
ខណៈដែលប្រទេសបារាំងបានប្រកាសអាសន្នពីអ្នកកែដើមទ្រូងដោយដាក់ ថង់ស៊ីលីកូន ឬអ៊ីមភ្លែន (Implant) ប្រភេទ PIP (Poly Implant-Prothese ) កំពុងប្រឈមនឹងជំងឺមហារីកនោះ តារាស្រស់ស្រីរបស់កម្ពុជាឯណេះវិញក៏កំពុងជ្រួលជ្រើម និងបារម្ភស្ទើរដេកមិនលក់ដែរ ខ្លាចសប្បាយក្លាយជាទុក ចង់ស្អាតបែរជាស្លាប់ខ្លួននោះ។
តារាសម្តែងសុំមិនបញ្ចេញឈ្មោះខាងលើបានថ្លែងថា៖ «មែនបង! ពេលខ្ញុំបានដឹងពីព័ត៌មានហ្នឹង ខ្ញុំភ័យណាស់ ហើយខ្ញុំក៏បានទៅឲ្យពេទ្យពិនិត្យរួចដែរ ព្រោះមិនទុកចិត្ត តែមិនទាន់ដឹងនៅឡើយទេ»។
ការស្រាវជ្រាវបានបង្ហាញថា អ៊ីមភ្លែនរបស់ PIP បានប្រើប្រាស់នូវស៊ីលីកូន ដែលបង្កើតឡើងសម្រាប់ធ្វើជាពូកជ័រ ហើយវាមានតម្លៃថោកជាង១០ដងបើធៀបទៅនឹងស៊ីលីកូនដែលអនុញ្ញាតឲ្យ ប្រើប្រាស់ក្នុងវិស័យវេជ្ជសាស្ត្រវះកាត់កែសម្ផស្ស។
ដោយឡែកសម្រាប់តារាសម្តែងលើកពានជាច្រើនឆ្នាំជាប់ៗគ្នាផ្នែកដើម ទ្រូងធំសិចស៊ី នាង កុល ដាវី ដែលបានសារភាពថា នាងបានវះកាត់ដាក់ស៊ីលីកូននៅក្នុងសុដន់ទាំងគូនោះ ក៏កំពុងសម្តែងក្តីបារម្ភពីការកើតមានជំងឺមហារីកចំពោះរូបនាង ដែរ ខណៈដែលមានការប្រកាសទូទាំងពិភពលោកនោះ។
តារាសម្តែង និងជាពិធីការិនីវ័យ២៧ឆ្នាំ នាង កុល ដាវី បានឲ្យដឹងថា នាងបានទៅកែសម្ផស្សដោយវះកាត់ដាក់ស៊ីលីកូននៅក្នុងសុដន់នៅប្រទេស ថៃកាលពីប្រមាណ២ឆ្នាំមុន ពោលគឺតាំងពីពេលដែលនាងទើបតែមានឈ្មោះល្បីតិចតួចក្នុងវិស័យ សិល្បៈ។
នាងបានបន្តថា ក្រោយពេលដែលនាងបានទទួលព័ត៌មានស្តីពីជំងឺមហារីកដែលកើតចេញពី ការដាក់បញ្ចូលថង់ស៊ីលីកូននេះ នាងក៏មានការបារម្ភចំពោះខ្លួនឯងផងដែរ តែនាងបានបញ្ជាក់យ៉ាងមានទំនុកចិត្តថា រឿងអាក្រក់នោះនឹងមិនកើតមានចំពោះនាងឡើយ ខណៈដែលនាងក៏មានការវះកាត់តាមវេជ្ជសាស្ត្របានយ៉ាងត្រឹមត្រូវ នោះ។
កុល ដាវី បាននិយាយថា៖«ខ្ញុំភ័យបង! ខ្លាចកើតជំងឺមហារីកហ្នឹង តែពេទ្យដែលខ្ញុំធ្វើការវះកាត់ហ្នឹងជាពេទ្យកែសម្ផស្សធំជាងគេនៅបាងកក ខ្ញុំគិតថា ប្រហែលជាមិនអីទេ!»។
ទោះបីជាយ៉ាងណាក៏តារារូបនេះ បានប្រាប់ថា នាងនឹងទៅពិនិត្យសុខភាពរបស់នាងជាថ្មីម្តងទៀត ដើម្បីកុំឲ្យខ្លួនបន្តក្តីបារម្ភនេះ។
ដោយសារបញ្ហានៃការកែសម្ផស្សនៅតែកើតមានបញ្ហាមួយចំនួន ដូច្នេះតារាចម្រៀងសម្តែងមួយចំនួនក៏សុខចិត្តមិនសូវស្អាតក៏ហីចុះ ដោយពួកគេមានការព្រួយបារម្ភមិនព្រមទទួលយកការកែសម្ផស្សដែរ ដោយពួកគេមិនទុកចិត្តពីបច្ចេកវិទ្យាទោះបីជាទំនើប ដោយពួកគេខ្លាចបណ្តាលឲ្យប៉ះពាល់ដល់សុខភាព និងកើតមានជំងឺផ្សេងៗដូចជាមហារីកជាដើម។
ជាក់ស្តែងតារាចម្រៀងដែលឈរជើងនៅរស្មីហង្សមាសជិត១០ឆ្នាំ ពេជ្រ សោភា ធ្លាប់ប្រាប់ភ្នំពេញ ប៉ុស្តិ៍ ថា៖«ខ្ញុំធ្វើដូចសព្វមួយដង ស្អាតបែបធម្មតា ធ្វើខ្លួនបែបសាមញ្ញ មិនចាំបាច់បញ្ចេញលើ លេចក្រោមអីនោះទេ»។ នាងបានបញ្ជាក់យ៉ាងមធ្យ័តថា៖«ខ្ញុំអត់មានកែដើមទ្រូងអីផង ខ្ញុំមិនកែអីទេ ខ្លាចងាប់! វាមិនស្អាតអីពីអាដើមទ្រូងហ្នឹងទេ»។
តែជាការពិត កុល ដាវី ក៏បានទទួលភាពល្បីល្បាញមួយផ្នែកធំពីដើមទ្រូងដ៏ធំសខ្ចីទ្រលុក ទ្រលន់របស់នាងដែរ។ ទោះបីយ៉ាងណា នេះជាភាពក្លាហានមួយរបស់ កុល ដាវី ដែលនាងហ៊ានបង្ហាញពីការពិត និងអារម្មណ៍ពិត ខណៈដែលតារាស្រីមួយចំនួនមានការបារម្ភភ័យ តែមិនហ៊ាននិយាយ សូម្បីតែខ្លួនកែសម្រស់ក៏មិនព្រមទទួលដែរនោះ៕
ដកស្រង់ ពីគេហទំព័រ PostKhmer
សូមមិត្តទាំងអស់ជួយចុច Add a comment ដើម្បីផ្តល់ជាមតិ និងជួយ Share នៅលើ Facebook របស់អ្នក
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]