ខេត្តបាត់ដំបង ៖ សមត្ថកិច្ចនិយាយថា យ៉ាងហោចណាស់មានមនុស្សម្នាក់បានស្លាប់ និង២នាក់ទៀតរងរបួសធ្ងន់ដោយសារគ្រោះថ្នាក់ ចរាចរណ៍ចំនួន២លើកនៅក្នុងស្រុកសង្កែ និងនៅក្នុងក្រុងបាត់ដំបង ។
មន្រ្តីជំនាញប្រាប់ថា លើកទី១ បានកើតឡើងកាលពីវេលាម៉ោង៧និង២០នាទីយប់ថ្ងៃទី១២ ឧសភា លើកំណាត់ផ្លូវជាតិលេខ៥ ត្រង់ចំណុចភូមិជំនីក ឃុំអន្លង់វិល ស្រុកសង្កែ ដែលបង្កឡើងដោយរថយន្តដឹកស៊ីម៉ង់ត៍របស់ក្រុមហ៊ុន«ប៉ាស៊ីហ្វិច»បុកអ្នក ថ្មើរជើងម្នាក់បណ្ដាលឲ្យស្លាប់ហើយអ្នកបើកបររថយន្តនោះបាន រត់គេចខ្លួនបាត់ ។ មន្ត្រីនគរបាលមូលដ្ឋានបាននិយាយថា ករណីនេះគឺជនរងគ្រោះស្ថិតក្នុងស្ថានភាពស្រវឹង និងមានសតិមិនប្រក្រតីផង បានរត់ចូលកង់រថយន្តក្នុងគ្រាដែលរថយន្តកំពុងធ្វើដំណើរ ពីទិសខាងលិចឆ្ពោះទៅទិសខាងកើតដោយមានផ្ទុកស៊ីម៉ង់ត៍ជាង៣០តោនផង។
សាក្សីដែលឃើញហេតុការណ៍នេះនិយាយដែរថា ដំបូងគេឃើញបុរសនោះអង្គុយម្នាក់ឯងក្បែរចិញ្ចើមផ្លូវ លុះពេលឃើញរថយន្តបើកមកដល់ ស្រាប់តែគាត់រត់ចូលកង់រថយន្តខាងក្រោយបណ្ដាលឲ្យកង់រថយន្តដែលមើលទៅ ដូចជើងម្រើមព្រះកិនខ្ទេចត្រឹមដើមទ្រូងចុះក្រោមស្លាប់ភ្លាមមួយរំពេច ។
រីឯករណីទី២ សមត្ថកិច្ចនិយាយថា បានកើតឡើងកាលពីវេលាម៉ោង៥និង១០នាទីព្រឹកថ្ងៃទី ១៣ឧសភា នៅចំណុចចុងស្ពានថ្ម (អតីតស្ពានដែកចាស់)ត្រើយខាងកើត ក្នុងភូមិរំចេក៤ សង្កាត់រតនៈ ក្រុងបាត់ដំបង បង្កឡើងរវាងរថយន្តដឹកដីនិងម៉ូតូសណ្ដោងរ៉ឺម៉កដឹកបន្លែ ។
សមត្ថកិច្ចប្រាប់ថា រថយន្តនោះពាក់ស្លាកលេខ ក ៣៩០១ ភព៣ បើកបរដោយឈ្មោះគង់ សុវណ្ណ ភេទប្រុស អាយុ២២ឆ្នាំ នៅភូមិរំចេក៤ សង្កាត់រតនៈ។ រីឯអ្នកជិះម៉ូតូមានគ្នា២នាក់ជាស្រ្តី បានរងរបួសធ្ងន់ទាំងអស់គ្នា តែមិនទាន់ស្គាល់ឈ្មោះទេ។សមត្ថកិច្ចនិយាយថា គ្រោះថ្នាក់នេះកើតឡើងដោយសារតែការបើកបរកាត់ទទឹងផ្លូវគ្នា មើលគ្នាមិនឃើញដោយសារបាំងផ្ទះលក់ដូរបែបអនាធិបតេយ្យនៅកាច់ ជ្រុងរបងវត្តកណ្ដាល ។
សាក្សីនិយាយថា រថយន្តនោះបើកមកពីទិសខាងជើងទៅទិសខាងត្បូង រីឯអ្នកជិះម៉ូតូអូសរ៉ឺម៉កដឹកបន្ថែធ្វើដំណើរពីកើតទៅលិច លុះមកដល់ចំណុចផ្លូវបំបែកក៏ត្រូវរថយន្តបុកអ្នកជិះម៉ូតូនោះពេញទំហឹង ហើយអូសប្រហែល១០០ម៉ែត្រទើបឈប់ បណ្តាលឱ្យអ្នកជិះម៉ូតូទាំង២នាក់រងរបួសធ្ងន់ និងបន្លែត្រូវខូចខាតទាំងស្រុង។
មន្ត្រីនគរបាលចរាចរបាននិយាយដែរថា ករណីទី១-គឺបង្កឡើងដោយអ្នកថ្មើរជើងដែលបានរត់ចូលរថយន្តខ្លួនឯងក្នុងចេតនា ចង់ស្លាប់ ។ រីឯករណីទី២-គឺជាការធ្វេសប្រហេសពេលបើកបរ ប៉ុន្តែកំហុសមួយផ្នែកធំត្រូវបានស្ដីបន្ទោសទៅលើក្រុមអ្នកលក់ដូរបែប គ្មានសណ្ដាប់ធ្នាប់នៅផ្លូវកាច់ជ្រុងក្បែររបងវត្តកណ្ដាល ។ សមត្ថកិច្ចបញ្ជាក់ថា អ្នកធ្វើដំណើរមកពីទិសខាងជើងនិងមកពីកើតទៅលិចមិនអាចមើលគ្នាឃើញទេ ដល់ចំណុចផ្លូវបំបែកនោះ ព្រោះបាំងនឹងអ្នកលក់ដូរនៅកាច់ជ្រុងរបងវត្តកណ្ដាលនោះ ។
ដូច្នេះសមត្ថកិច្ចជំនាញនិងអាជ្ញាធរគួរតែមានវិធានការ ចំពោះសំណង់អនាធិបតេយ្យទាំងនោះ ព្រោះនៅចំណុចនោះមានគ្រោះថ្នាក់ចរាចរណ៍ស្ទើររាល់ថ្ងៃមិនដែលខានទេ ។ ទោះបីជាបែបណា រថយន្តបង្កគ្រោះថ្នាក់ទាំង២ករណីនេះត្រូវបានសមត្ថកិច្ចជំនាញយកទៅ រក្សាទុកនៅការិយាល័យជំនាញរង់ចាំដោះស្រាយតាមផ្លូវច្បាប់ ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]