ភ្នំពេញ ៖ យុវជនម្នាក់ដែលជាប់ពាក់ព័ន្ធទៅនឹងករណីឆបោកក្លែងបន្លំធ្វើជាម្ចាស់កម្មសិទ្ធិទូរស័ព្ទលេខ ០៦៦ ៥៥៦ ៩៦៤ មានបំណងចង់ទៅបើកយកម៉ូតូម៉ាក ហ្វីណូ ១គ្រឿងដែលគេត្រូវរង្វាន់ពីក្រុមហ៊ុន Beeline ត្រូវបានសាលាដំបូងរាជធានីភ្នំពេញ សម្រេចឃុំខ្លួនបណ្ដោះអាសន្ននៅល្ងាចថ្ងៃទី២០ ខែមករា ឆ្នាំ២០១២ ពីបទឆបោកតាមមាត្រា៣៧៧ និង៣៧៨នៃក្រមព្រហ្មទណ្ឌ ។
យុវជនរូបនោះមានឈ្មោះជន ចំណាន អាយុ១៩ឆ្នាំ ស្នាក់នៅផ្ទះគ្មានលេខ ផ្លូវជាតិលេខ២ ភូមិព្រែកហូរ ក្រុងតាខ្មៅ ខេត្ដកណ្ដាល ជាកម្មករធ្វើអណ្ដូងស្នប់ ។
គួររំលឹកថា បុរសរូបនេះត្រូវបានសមត្ថកិច្ចឃាត់ខ្លួននៅថ្ងៃទី១១ ខែមករា ឆ្នាំ២០១២ តាមពាក្យបណ្ដឹងរបស់ឈ្មោះឡុង សុធារិទ្ធ ភេទប្រុស អាយុ៣៦ឆ្នាំ មុខរបរជាទីប្រឹក្សាអ្នកច្បាប់ក្រុមហ៊ុន Beeline និងមានការឯកភាពពីលោកសុខ រឿន ព្រះរាជអាជ្ញារងអមសាលាដំបូងរាជធានីភ្នំពេញ។ ការឃាត់ខ្លួននេះធ្វើឡើងបន្ទាប់ពីឈ្មោះជន ចំណាន និងនារីម្នាក់បានទៅសុំបើកលេខទូរស័ព្ទ ០៦៦ ៥៥៦ ៩៦៤ ពីក្រុមហ៊ុន Beeline ដោយអះអាងថា លេខទូរស័ព្ទនេះជារបស់ខ្លួនតែត្រូវជ្រុះបាត់ ។
ជនសង្ស័យធ្វើបែបនេះមានបំណងបើកយកម៉ូតូម៉ាកហ្វីណូ១គ្រឿង ដែលក្រុមហ៊ុន Beeline បានប្រកាសតាមទូរស័ព្ទផ្ដល់រង្វាន់ដល់ម្ចាស់លេខទូរស័ព្ទដូចខាងលើ។ ប៉ុន្ដែអ្នកជំនាញផ្នែកច្បាប់របស់ក្រុមហ៊ុនមិនបានផ្ដល់រង្វាន់ទៅបុគ្គលនោះទេ ។
ក្រោយសិក្សាជាមួយក្រុមបច្ចេកទេសឃើញថាម្ចាស់ទូរស័ព្ទ លេខ ០៦៦ ៥៥៦ ៩៦៤ ពិតប្រាកដនៅមានសុពលភាពប្រើប្រាស់ និងជាអ្នកឈ្នះរង្វាន់ម៉ូតូនេះឈ្មោះណាំ និត ភេទស្រី មានអាសយដ្ឋាននៅខេត្ដបាត់ដំបងទើបសមត្ថកិច្ចសម្រេចឃាត់ខ្លួនតែម្ដង ។ ចំណែកនារីនោះត្រូវដោះលែងវិញ ព្រោះនាងគ្រាន់តែជាអ្នកទៅជាមួយប៉ុណ្ណោះ ៕
ដកស្រង់ ពីគេហទំព័រ នគរវត្ត
សូមមិត្តទាំងអស់ជួយចុច Add a comment ដើម្បីផ្តល់ជាមតិ និងជួយ Share នៅលើ Facebook របស់អ្នក
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
