ខេត្តកំពង់ស្ពឺ-កំពត ៖ រថយន្តកាមរី ធុនបាឡែន ១គ្រឿង ត្រូវបានចោរបង្ខំចិត្តបោះបង់ចោល ហើយរត់គេចចូលព្រៃនៅវេលាម៉ោងជាង៨យប់ ថ្ងៃទី១០ ឧសភា នៅភូមិសាស្រ្តស្រុកភ្នំស្រួច ខេត្តកំពង់ស្ពឺ ដោយសារសមត្ថកិច្ចដេញតាមប្រកិតពេក ។
ប្រតិបត្តិការដេញស្ទាក់ឃាត់រថយន្តកាមរី ធុនបាឡែន មួយគ្រឿង បន្ទាប់ពីទទួលបានព័ត៌មានពីអំពើប្លន់រថយន្តនៅទីរួមខេត្តកំពត ដោយចោរបានបាញ់សម្លាប់ម្ចាស់ ហើយបានបើកគេចចេញពីខេត្តកំពត តែក៏ត្រូវស្ទាក់ឃាត់បាននៅខេត្តកំពង់ស្ពឺ ។ ទោះបីជាបែបណាក្តី ដោយសារវេលាយប់ការរត់គេចរបស់ចោរមិនត្រូវចាប់ខ្លួនបានទេ តែកម្លាំងសមត្ថកិច្ចមានប៉ូលិស និងកងរាជអាវុធហត្ថ បានធ្វើការឡោមព័ទ្ធនៅតាមចំណុចសង្ស័យមួយចំនួន ដើម្បីប្រមាញ់ចោរដែលរត់គេចខ្លួននោះ ។
តាមប្រភពព័ត៌មានពី កន្លែងដែលស្ទាក់ចាប់ចោរទាំងយប់នេះ សមត្ថកិច្ចខេត្តកំពង់ស្ពឺបានឱ្យដឹងថា ក្រោយពីមានការប្លន់បាញ់សម្លាប់ ម្ចាស់រថយន្តនៅក្នុងខេត្តកំពត នាយប់ថ្ងៃទី១០ ឧសភា ចោរបានបើករថយន្តរត់គេចចេញពីខេត្តកំពតដោយឆ្លងកាត់ផ្លូវជាតិ លេខ៣ ដែលលាតសន្ធឹងកាត់ខេត្តតាកែវ ខេត្តកណ្តាល និងឆ្លងកាត់តាមខេត្តកំពង់ស្ពឺ ឆ្ពោះទៅក្រុងព្រះសីហនុ ក៏ត្រូវបានកម្លាំងកងរាជអាវុធហត្ថខេត្តកំពង់ស្ពឺ បើកប្រតិបត្តិការតាមប្រមាញ់យកបានរថយន្តមកវិញនៅវេលាម៉ោង៨ និង៣២នាទីយប់ ថ្ងៃដដែល នៅចន្លោះគីឡូម៉ែត្រលេខ៦៩និង៧០ លើកំណាត់ផ្លូវជាតិលេខ៤ ក្នុងភូមិសាស្ត្រភូមិក្រាំងតាតន់ ឃុំអូរ ស្រុកភ្នំស្រួច ។
មេបញ្ជាការកងរាជអាវុធហត្ថខេត្តកំពង់ស្ពឺ លោកឧត្តមសេនីយ៍ត្រីម៉ែន ស៊ីប៊ន មានប្រសាសន៍ថា ក្រុមចោរប្លន់ប្រដាប់អាវុធមានគ្នាពីបីទៅបួននាក់ បានបាញ់ប្លន់សម្លាប់ម្ចាស់រថយន្តម៉ាកកាមរី ធុនបាឡែន ពណ៌ស្ករ ពាក់ស្លាកលេខភ្នំពេញ ២K១៨៨៤ ជារបស់ឈ្មោះសើ ដៀត ភេទប្រុស អាយុ៤២ឆ្នាំ រស់នៅភូមិកំពង់បាយខាងជើង សង្កាត់កំពង់បាយ ក្រុងកំពត ជាអ្នករត់ឈ្នួលដឹកភ្ញៀវ ។ ក្រោយពេលប្លន់សម្លាប់ម្ចាស់រថយន្តបានហើយ ពួកគេបានបើករថយន្តនោះក្នុងគោលដៅត្រឡប់ទៅខេត្តកណ្តាលដោយ ឆ្លងកាត់ខេត្តតាកែវ និងខេត្តកំពង់ស្ពឺ ។
លោកឧត្តមសេនីយ៍ម៉ែន ស៊ីប៊ន បន្តថា ក្រោយពីបានទទួលព័ត៌មានជាបទបញ្ជាពីលោកនាយឧត្តមសេនីយ៍ មេបញ្ជាការប៉េអឹមផ្ទៃប្រទេសភ្លាម លោកបានដាក់ពង្រាយកងកម្លាំងតាមកំណាត់ផ្លូវជាតិលេខ៤ ចំនួន៣បារ៉ាស ។ បារ៉ាសទី១ដាក់នៅក្រុងច្បារមន ព្រំប្រទល់ស្រុកសំរោងទង ទី២-នៅភូមិត្រពាំងអត់ទឹក ទឹកដីស្រុកភ្នំស្រួច ទី៣-នៅអូរវែង(វាលស្រែ១០០) ក្នុងឃុំកាហែង ស្រុកសំរោងទង ។ លោកនិយាយថា លោកផ្ទាល់បានដឹកនាំកម្លាំងអន្តរាគមន៍កងរាជអាវុធហត្ថខេត្ត ស្រុកចំនួន៧២នាក់ ចុះប្រតិបត្តិការស្ទាក់រថយន្តនោះ ។
រថយន្តដែលចោរប្លន់បើករត់បានឆ្លងកាត់ចំណុច បារ៉ាស់ទី១របស់លោកមែន តែចោរបានព្យាយាមបើកបុកបារ៉ាស់រហូតដល់បារ៉ាស់ទី២ ក៏បុកបារ៉ាស់ស្ទាក់ទៀត ។ ជាមួយគ្នានោះចោរបានបាញ់គំរាមមកលើសមត្ថកិច្ចដែលតាមប្រមាញ់ ពីក្រោយជាច្រើនគ្រាប់ដោយកាំភ្លើងខ្លី ។ លោកមេបញ្ជាការកងរាជអាវុធហត្ថខេត្តបន្តថា នៅបារ៉ាស់ទី៣-ចំណុចមុខភូមិក្រាំងតាតន់ ក្នុងស្រុកភ្នំស្រួច ដោយសារមានរថយន្តកុងតឺន័រច្រើនបើកមកពីមុខ ចោរបានបង្ខំចិត្តបញ្ឈប់រថយន្តដោយពុំពន្លត់ម៉ាស៊ីនទេ ។ មានប្រភពថា ការតាមប្រមាញ់ពីក្រោយ សមត្ថកិច្ចបានឃើញមានចោរតែម្នាក់ បានបើកទ្វាររត់ចេញពីរថយន្តទាំងពុំពន្លត់ម៉ាស៊ីន ដោយរត់ទៅកាន់ចំណុចជើងភ្នំទាំងយប់ ហើយកម្លាំងសមត្ថកិច្ច ដែលដេញតាមប្រមាញ់បានឡោមព័ទ្ធតំបន់នោះរហូតដល់ព្រឹកថ្ងៃទី១១ ឧសភា ក៏នៅតែធ្វើការឡោមព័ទ្ធចាប់ចោរនៅឡើយ ។
តាមការផ្តល់ព័ត៌មានពីលោកឧត្តសេនីយ៍ត្រី ម៉ែន ស៊ីប៊ន បានឱ្យដឹងទៀតថា ការតាមប្រមាញ់រថយន្តដែលចោរប្លន់នេះ តាំងពីរថយន្តចូលទឹកដីក្រុងច្បារមន ចោរពុំព្រមឈប់តាមការព្យាយាមដាក់បារ៉ាស់ស្ទាក់ទេ ។ មិនតែប៉ុណ្ណោះ បានបាញ់គំរាមសមត្ថកិច្ចអស់ជាច្រើនគ្រាប់ទៀត តែពុំមានកម្លាំងកងរាជអាវុធហត្ថ ឬប៉ូលិសណាម្នាក់រងរបួសទេ ។ ជាមួយគ្នានេះ កម្លាំងកងរាជអាវុធហត្ថបានបាញ់តបចំនួន៤គ្រាប់ ត្រូវរថយន្តចំនួន៣គ្រាប់ ដែលគ្រាប់ទី១ចំពាក់កណ្តាលកញ្ចក់មុខ គ្រាប់ទី២ចំកណ្តាលទ្វារខាងឆ្វេងដៃ អាចចំអ្នកបើក ប៉ុន្តែគ្រាប់ពុំធ្លាយទេ និងគ្រាប់ទី៣ចំខាងក្រោមទ្វារឆ្វេងដៃ តែពុំទាន់ដឹងថា ចោរដែលព្យាយាមរត់គេចខ្លួនត្រូវរបួសដែរឬអត់នៅឡើយទេ ។
នៅវេលាម៉ោង៩យប់ក្រោយពីរថយន្ត ដែលជនល្មើសបញ្ឈប់ចោលនោះ ត្រូវបាននាំមករក្សាទុកនៅទីបញ្ជាការកងរាជអាវុធហត្ថខេត្ត ហើយព្រឹកថ្ងៃទី១១ ឧសភា ព្រះរាជអាជ្ញារង អមសាលាដំបូងលោក ទង រតនៈ បានចូលរួមធ្វើការឆែកឆេរត្រួតពិនិត្យលើរថយន្តដែលចោរប្លន់ នោះ ក្រោមក្រសែភ្នែកអ្នករាយការណ៍ព័ត៌មាននានា មានវិទ្យុ ទូរទស្សន៍ និងសារព័ត៌មាន ។ សមត្ថកិច្ច បានរកឃើញសំបកគ្រាប់ក្នុងរថយន្តចំនួន៣គ្រាប់ ដែលជាប្រភេទសំបកគ្រាប់កាំភ្លើងឡុក ។
លោកឧត្តមសេនីយ៍មានប្រសាសន៍ថា ករណីនោះកម្លាំងកងរាជអាវុធហត្ថ និងប៉ូលិសកំពុងធ្វើការព័ទ្ធភ្នំ ដើម្បីចាប់ជនល្មើសនៅបរិវេណភ្នំភូមិក្រាំងតាតន់ ឃុំអូរនៅឡើយ ហើយរថយន្តត្រូវកសាងសំណុំរឿងបញ្ជូនជាវត្ថុតាងទៅទីបញ្ជា ការកងរាជអាវុធហត្ថ ខេត្តកំពត ដែលជាទីតាំងប្លន់សម្លាប់ម្ចាស់រថយន្ត ។
តាមសេចក្តីរាយការណ៍ពីខេត្តកំពត ទាក់ទិននឹងការប្លន់រថយន្តដោយការបាញ់សម្លាប់នេះបានឱ្យដឹងថា រថយន្តម៉ាកកាមរី បាឡែន រត់ឈ្នួលមួយគ្រឿងនេះ បានដឹកភ្ញៀវជាចោរចេញដំណើរពីភ្នំពេញឆ្ពោះទៅខេត្តកំពត តាមបណ្តោយផ្លូវជាតិលេខ៣ ។ លុះមកដល់ចំណុចខាងលិចអូរស្ពានចម្ងាយ៥០ម៉ែត្រ ខាងកើតសាលាឃុំថ្មី ចម្ងាយ១៥០ម៉ែត្រ ត្រូវបានចោរប្រដាប់អាវុធដែលជិះក្នុងរថយន្តបានបាញ់ម្ចាស់ រថយន្តសម្លាប់ រួចយករថយន្តបើកគេចចេញដោយសុវត្ថិភាព ។ ហេតុការណ៍នេះបានកើតឡើងកាលពីវេលាម៉ោង៦និង១០នាទី ល្ងាចថ្ងៃទី១០ ឧសភា នៅចំណុចកើតហេតុខាងលើ ស្ថិតក្នុងភូមិថ្មី ឃុំថ្មី ស្រុកទឹកឈូ ខេត្តកំពត ។
តាមសម្តីប្រជាពលរដ្ឋនៅក្បែរកន្លែងកើតហេតុ បានឱ្យសមត្ថកិច្ចដឹងថា នៅវេលាម៉ោងជាង៦ល្ងាច គេឃើញរថយន្តមួយគ្រឿងម៉ាកកាមរី បាឡែន ពណ៌ស្ករ ពាក់ស្លាកលេខភ្នំពេញ ២K-១៨៨៤ បានឈប់នៅចំណុចខាងលើ រួចឃើញអ្នកបើកបានចុះមកបត់ជើងតូចនៅក្បែរផ្លូវ ព្រមទាំងកាន់ដបទឹកសុទ្ធមួយដបផង ។ ក្រោយពីបត់ជើងតូចរួច គេក៏ឮសូរមាត់និយាយជជែកគ្នាជាមួយអ្នកជិះម្នាក់ដែលចេញពី រថយន្ត ក្រោយពីបាត់សំឡេងជជែកគ្នា ក៏ស្រាប់តែឮស្នូរបាញ់បួនគ្រាប់ រួចជនម្នាក់ក៏បើករថយន្តបន្តទៅមុខបាត់ទៅ ។ ក្រោយពីរថយន្តចេញផុត ទើបប្រជាពលរដ្ឋនៅក្បែរកន្លែងកើតហេតុ សង្ស័យក៏នាំគ្នាមកមើល ទើបដឹងថាមានមនុស្សម្នាក់ស្លាប់ក្នុងថ្លុកឈាម ក៏ទូរស័ព្ទរាយការណ៍ជូនសមត្ថកិច្ចភ្លាមៗ ។ ក្រោយការមកដល់កន្លែងកើតហេតុ ក៏មានការទាក់ទងកម្លាំងគ្រប់ប៉ុស្តិ៍គោលដៅ ឱ្យត្រៀមស្ទាក់រថយន្ត ដែលមានភិនភាគដូចខាងលើ ។ រយៈពេលកន្លះម៉ោងក្រោយមកមានរថយន្តតាក់ស៊ីមួយគ្រឿងបានធ្វើ ដំណើរមកពីភ្នំពេញមកដល់កន្លែងកើតហេតុ ក៏ឈប់រថយន្តមើលហេតុការណ៍ ទើបស្គាល់ច្បាស់ថា ជនរងគ្រោះដែលត្រូវបាញ់សម្លាប់នេះ ជាម្ចាស់រថយន្តរត់ឈ្នួលដូចគ្នា ហើយពួកគេនិយាយថា មិញនេះបានឃើញរថយន្តរបស់ជនរងគ្រោះ ត្រូវគេបើកត្រឡប់ទៅទិសភ្នំពេញវិញ តាមផ្លូវជាតិលេខ៣ ដោយពួកគេជួបនៅចំណុចភ្នំនរាយណ៍ ស្ថិតក្នុងឃុំនរាយណ៍ ស្រុកឈូក ។ ក្រោយពីដឹងព័ត៌មាននេះភ្លាមៗ សមត្ថកិច្ចនគរបាលខេត្តកំពតរួមនឹងកងរាជអាវុធហត្ថក្រុង និងខេត្ត បានទូរស័ព្ទទាក់ទងទៅខេត្តតាកែវ ទៅខេត្តកំពង់ស្ពឺ និងរាជធានីភ្នំពេញផងដែរ ដើម្បីស្ទាក់ដំណើររថយន្តបាឡែននេះ ។ តាមរយៈសេចក្តីរាយការណ៍នេះ ហើយ ទើបសមត្ថកិច្ចស្រាវជ្រាវទៅឃើញក៏ដេញតាមរហូតដល់ខេត្តកំពង់ ស្ពឺ ទើបអាចបញ្ឈប់ដំណើររថយន្តបាន ។ ចំណែកចោរប្លន់ជាឃាតករនៅរកមិនទាន់ឃើញនៅឡើយទេ ។
សាកសពជនរងគ្រោះត្រូវបានសមត្ថកិច្ចធ្វើ ការពិនិត្យឃើញត្រូវគ្រាប់កាំភ្លើងខ្លីបាញ់ចំនួនបីគ្រាប់ចំ ដើមទ្រូង ស្លាប់នៅចំណ្តាលថ្នល់ ។ ជនរងគ្រោះឈ្មោះសើ ដៀត ភេទប្រុស អាយុ៤២ឆ្នាំ ជាខ្មែរអ៊ិស្លាម ជាអ្នករត់តាក់ស៊ី ដោយឡានទំនើបមានទីលំនៅបច្ចុប្បន្នភូមិកំពង់បាយខាងជើង សង្កាត់កំពង់បាយ ក្រុងកំពត ។ សពត្រូវបានសមត្ថកិច្ចប្រគល់ឱ្យក្រុមគ្រួសារយកទៅធ្វើបុណ្យតាម ប្រពៃណី ៕
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
