ខេត្តតាកែវ ៖ ក្រុមចោរប្រដាប់ដោយកាំភ្លើងអាកាបានធ្វើសកម្មភាពប្លន់ ផ្ទះលក់និងជួសជុលទូរស័ព្ទ ខណៈពេលដែលក្រុមគ្រួសារម្ចាស់ផ្ទះកំពុងអង្គុយ ពិភាក្សាគ្នានៅពេលហូបបាយ រួច ។ ក្រុមចោរបានសម្រុកចូលប្លន់ ព្រមទាំងបាញ់គំរាមរកទ្រព្យសម្បត្តិពីម្ចាស់ផ្ទះផង ដែរ តែមិនបណ្តាលឱ្យមានគ្រោះថ្នាក់ដល់អាយុជីវិតទេ ។ ហេតុការណ៍ប្លន់នេះបានកើតឡើងកាលពីវេលាម៉ោង៨និង៤៥ នាទីយប់ ថ្ងៃទី១០ ឧសភា ស្ថិតនៅភូមិតាសូ ឃុំតាភេម ស្រុកត្រាំកក់ ។
លោកវរសេនីយ៍ត្រី ញ៉ែម សឿន អធិការនគរបាលស្រុកត្រាំកក់ឱ្យដឹងថា ផ្ទះជនរងគ្រោះដែលរងការប្លន់ពីចោរកាំភ្លើងអាកានេះ ប្តីឈ្មោះ កែវ ថុល អាយុ៤៤ឆ្នាំ និងប្រពន្ធឈ្មោះ ទឹម ស៊ីណា អាយុ៣២ឆ្នាំ មានកូន៥នាក់ និងមានមុខរបរជាជាងជួសជុលទូរស័ព្ទ ម៉ាញ៉េ ទូរទស្សន៍ កង្ហារនិងលក់គ្រឿងអគ្គិសនី បញ្ចូលភ្លើងអាគុយ ហើយទ្រព្យសម្បត្តិដែលក្រុមចោរប្លន់យកទៅមានទូរស័ព្ទដៃមួយ ទឹកចំនួន៦០គ្រឿង ។
លោកអធិការនគរបាលស្រុកបន្តទៀតថា មុនពេលកើតហេតុ ក្រុមគ្រួសាររងគ្រោះទើបតែហូបបាយរួច ហើយអង្គុយនិយាយគ្នាលេង ស្រាប់តែក្រុមចោរចំនួន៦នាក់បានរត់ចូលពីមាត់ទ្វារខាងមុខ ផ្ទះ និងបាញ់គំរាមឡើងលើចំនួន២គ្រាប់ រួចសម្លុតម្ចាស់ផ្ទះប្តីប្រពន្ធឱ្យប្រគល់មាសនិងលុយ ឱ្យពួកវា ហើយចាប់ចងស្លាបសេកប្តីឱ្យដេកផ្កាប់មុខ និងបានយកដំបងឈើវាយជាច្រើនដំបង សួររកមាសប្រាក់ ។
បុរសជាប្តីឈ្មោះ កែវ ថុល បាននិយាយប្រាប់ប៉ូលិសថា ក្រុមចោរមានគ្នាប្រមាណ៦នាក់ ប្រដាប់ដោយកាំភ្លើងអាកាកាត់ស្វាយចំនួន២ដើមមានម្នាក់ ពាក់ម៉ាស់បិទមុខ បានចាប់អូសគាត់ និងប្រពន្ធចូលទៅក្រោមផ្ទះ (ថ្មក្រោម ឈើលើ) ចងស្លាបសេកឱ្យដេកផ្កាប់មុខ និងយកកាំភ្លើងភ្ជង់ក្បាលគាត់ជាប់ ។ នៅពេលពួកចោរប្លន់រុករកមាសប្រាក់នៅក្រោមផ្ទះអត់ឃើញ ពួកវាបានចាប់អូសប្រពន្ធគាត់ឡើងទៅលើផ្ទះ ដើម្បីរុករកមាសប្រាក់ទៀត ។ ពួកវាបានទះកំផ្លៀងធ្វើឱ្យប្រពន្ធគាត់សន្លប់មួយសន្ទុះ ដោយសារតែការតក់ស្លុត តែការរុករកនោះគ្មានឃើញអ្វីនោះទេ ហើយពួកចោរប្លន់នៅតែសម្លុតគំរាមថា បើមិនព្រមប្រគល់មាសប្រាក់ឱ្យទេ ពួកវានឹងបាញ់សម្លាប់មួយពូជ ។ ពេលនោះរូបគាត់បាននិយាយអង្វរពួកវាទាំងកាំភ្លើងភ្ជង់ ក្បាលថា កុំធ្វើ បាបគាត់អី គាត់គ្មានលុយទេ ព្រោះធ្វើផ្ទះអស់ហើយ បើចង់បានរកមើលទៅយកអ្វីយកទៅ សុំទុកតែជីវិតបានហើយ ។
បុរសជាប្តីបានបន្តទៀតថា នៅពេលក្រុមចោរប្លន់រុករកអត់ឃើញមានអ្វីសោះ ពួកវាបានប្រមូលយកទូរស័ព្ទនៅក្នុងទូទាំងអស់សរុប៦០គ្រឿង ហើយបានដើរចេញតាមច្រកខាងមុខ ចុះមកខាងកើតផ្ទះ ទើបចុះមកខាងត្បូងវិញ ។ ពេលនោះក៏មានមនុស្សចុចភ្លើងពិលមកពីកើតក្រុមចោរប្លន់ បានបាញ់ចំនួន៣គ្រាប់ទៀត រួចរត់គេចខ្លួនបាត់ទៅ ។
លោក អ៊ួន សុខុម អធិការរងស្រុកត្រាំកក់បានប្រាប់កោះសន្តិភាពតាមទូរស័ព្ទ ថា ពីផ្ទះកើតហេតុទៅដល់ប៉ុស្តិ៍រដ្ឋបាលឃុំតាភេមមានចម្ងាយ ៣គីឡូម៉ែត្រ ផ្លូវលំបត់បែនច្រើន ។ នៅពេលក្រុមចោរប្លន់បាញ់នោះ ប៉ូលិសបានឮនិងបានសំដៅទៅរកកន្លែងកើតហេតុ តែដោយស្ថានភាពយប់ងងឹតគ្រាន់តែប៉ូលិសទៅដល់ក្រុមចោរប្លន់ ចេញផុតបាត់អស់ ។ បើតាមការសន្និដ្ឋានចោរម្នាក់ដែលបិទម៉ាស់មុខពិតជា មនុស្សស្គាល់ក្រុមគ្រួសាររងគ្រោះ ពេលធ្វើសកម្មភាពម្នាក់នោះកាន់កាំភ្លើងភ្ជង់បុរសជាប្តី និងបញ្ជាអ្នកឯទៀតឱ្យចូលរុករកមាសប្រាក់នៅក្នុងផ្ទះ ។ ប៉ូលិសរើសបានសម្បកគ្រាប់កាំភ្លើងអាកាចំនួន៥ ពិល១ និងដំបងឈើមូលប្រវែង៥តឹក១ ហើយពេលនេះកំពុងធ្វើការស្រាវជ្រាវដើម្បីកំណត់មុខសញ្ញា ក្រុមចោរ ៕
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]