រាជធានីភ្នំពេញ ៖ មន្ត្រីប៉ូលិសម្នាក់ត្រូវខ្មាន់កាំភ្លើងជិះម៉ូតូជាមួយគ្នាភ្ជង់ពីក្រោយបញ្ជាឱ្យទៅកន្លែងណាមួយ...រួចហើយបាញ់២គ្រាប់ចំក្បាលបង្កឱ្យមានការភ្ញាក់ផ្អើលលើកំណាត់ផ្លូវលេខ២៧១ ម្តុំផ្សារហេងលី ប៉ុន្តែប៉ុន្មាននាទីក្រោយមកជនដៃដល់រត់មិនរួចទេត្រូវសមត្ថកិច្ចចាប់បាន...ចំណែកបុរសរងគ្រោះជាមន្ត្រីប៉ូលិសបានស្លាប់បាត់បង់ជីវិតគួរឱ្យសោកស្តាយ និងរន្ធត់ដែលហេតុការណ៍នេះបានកើតឡើងកាលពីវេលាម៉ោង២និង៤០នាទីថ្ងៃទី១១ ឧសភា ២០១២ លើកំណាត់ផ្លូវ២៧១ ស្ថិតក្នុងសង្កាត់ទឹកល្អក់ទី៣ ខណ្ឌទួលគោក ។
បុរសរងគ្រោះឈ្មោះម៉ន សាវឌី អាយុជាង៣០ឆ្នាំ ជាមន្ត្រីប៉ូលិសការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលរាជធានីភ្នំពេញ មានរហស្សនាមទិវា៥២ ត្រូវបានសមត្ថកិច្ចធ្វើកោសល្យវិច័យពិនិត្យឃើញថាគេបាញ់ត្រូវក្បាល២គ្រាប់ ស្លាប់ក្នុងថ្លុកឈាម ។ ចំណែកជនដៃដល់ឈ្មោះងួន រតនា ហៅអូន ក្រោយពេលកើតហេតុត្រូវប៉េអឹមចាប់ជាប់ និងនាំយកទៅកាន់ទីបញ្ជាការរាជធានីភ្នំពេញភ្លាមៗ ដូច្នេះគេនៅមិនទាន់ដឹងអត្តសញ្ញាណជននេះនៅឡើយទេ ។
តាមប្រភពព័ត៌មានបានឱ្យដឹងថា មុនពេលកើតហេតុអ្នកទាំង២ជាអ្នកស្គាល់គ្នាបានកើតទំនាស់គ្នាខ្លាំងក្លាក្នុងរឿងលាភសក្ការៈអ្វីមួយ ហើយបានណាត់គ្នាចរចា... លុះចរចាមិនត្រូវគ្នាក៏ឡើងជិះម៉ូតូទៅកន្លែងណាមួយទៀតជាមួយគ្នា ដោយជនដៃដល់ជាអ្នកបង្ខំ គឺភ្ជង់កាំភ្លើងពីក្រោយជាប់ លុះដល់ខាងជើងផ្សារហេងលីបន្តិច ជនដៃដល់ក៏បាញ់មន្ត្រីប៉ូលិសដែលជាអ្នកបើកម៉ូតូ២គ្រាប់ ធ្លាក់ខ្ពាកពីលើម៉ូតូដេកដួលក្នុងថ្លុកឈាម។ ការបាញ់ប្រហារនេះអាចផ្តើមឡើងពីទំនាស់ចែកលាភសក្ការៈមិនស្មើគ្នាក្នុងកិច្ចការអ្វីមួយ...។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]