ខេត្តកំពង់ឆ្នាំង ៖ កម្មករចិញ្ចឹមជ្រូកម្នាក់បានរងរបួសរលាកយ៉ាងធ្ងន់ ធ្ងរ ខណៈទៅបើកគម្របធុងទឹកម៉ាស៊ីនដែលកំពុងពុះមិនបានប្រុងប្រយ័ត្ន ។ ហេតុការណ៍នេះបានកើតឡើងកាលពីវេលាម៉ោង៨ និង៤៥នាទីព្រឹកថ្ងៃទី១០ ឧសភា នៅក្នុងកសិដ្ឋានចិញ្ចឹមជ្រូកមួយ ស្ថិតនៅភូមិបឹងកៅ ឃុំក្រាំងតាមុំ ស្រុកទឹកផុស ខណៈកម្មកររងគ្រោះកំពុងបាញ់ទឹកលាងជ្រូក។
តាមក្រុមគ្រួសារជនរងគ្រោះនិយាយថា ជនរងគ្រោះឈ្មោះកែវ ចាន់ណា អាយុ២៦ឆ្នាំ មានទីលំនៅជិតកន្លែងចិញ្ចឹមជ្រូកនោះដែរ។ ជារៀងរាល់ថ្ងៃក្រោយពីឱ្យចំណីជ្រូកហើយឈ្មោះចាន់ណា តែងតែបញ្ឆេះម៉ាស៊ីនបូមទឹកយកមកបាញ់លាងជ្រូក និងទ្រុងវា។ នៅថ្ងៃកើតហេតុជនរងគ្រោះបានបញ្ឆេះម៉ាស៊ីនបាញ់ទឹកដូចធម្មតា ប៉ុន្តែនៅពេលកំពុងបាញ់ទឹកឱ្យជ្រូកនោះស្រាប់តែធុងទឹកម៉ាស៊ីន បានឡើងកម្តៅយ៉ាងខ្លាំងហើយមានចេញផ្សែង ។ ពេលនោះជនរងគ្រោះបានទៅពន្លត់ម៉ាស៊ីន ហើយបន្ទាប់មកក៏ទៅបើកគម្របធុងទឹក ស្រាប់តែផ្ទុះទឹកក្តៅបាញ់ស្រោចចំផ្ទៃមុខ និងខ្លួន បណ្តាលឱ្យរលាកយ៉ាងធ្ងន់ធ្ងរ និងត្រូវបានដឹកមកកាន់មន្ទីរពេទ្យខេត្តដើម្បីសង្គ្រោះ ។
នៅឯមន្ទីរពេទ្យខេត្ត ក្រុមគ្រូពេទ្យដែលបានធ្វើការសង្គ្រោះនិយាយថា ការរលាកមានកម្រិតមធ្យម ប៉ុន្តែទឹកក្តៅបានបាចត្រូវភ្នែកទាំង២ដែលមិនទាន់ដឹងថា ស្ថានភាពបែបណានោះទេ គឺកំពុងតាមដាននៅឡើយ ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]