ខេត្តកំពត៖ ចោរដៃឆៅអាចមានគ្នា៤នាក់បានបាញ់សម្លាប់អ្នកបើកបររថយន្ដតាក់ស៊ីកាមរី បាឡែនច្រានទម្លាក់ចេញពីរថយន្ដដេកដួលកណ្ដាលថ្នល់ប្លន់យករថយន្ដ នោះរត់គេចខ្លួន បង្កឱ្យមានការភ្ញាក់ផ្អើល ធ្វើឱ្យប៉ូលិសដេញប៉ផាប់ចាប់ពភីង ដែលហេតុការណ៍នេះបានកើតឡើងកាលពីវេលាម៉ោង៦និង១០នាទីល្ងាច ថ្ងៃទី១០ឧសភា ២០១២ ស្ថិតក្នុងភូមិថ្មី ឃុំថ្មី ស្រុកទឹកឈូ គឺប៉ូលិសដេញតាំងពីខេត្តកំពតរហូតមកដល់ខេត្តកំពង់ស្ពឺ។
បុរសរងគ្រោះឈ្មោះសើ ឌៀត អាយុ៤២ឆ្នាំ ជាជនជាតិខ្មែរអ៊ិស្លាម ជាអ្នករត់តាក់ស៊ី រស់នៅភូមិកំពង់បាយខាងជើង សង្កាត់កំពង់បាយ ក្រុងកំពត... រថយន្ដដែលចោរប្លន់យកទៅនោះម៉ាកកាមរីបាឡែន ពណ៌ទឹកមាស។ តាមប្រភពព័ត៌មានបានឱ្យដឹងថា ក្រុមចោរ៤នាក់នោះបានជួលរថយន្ដរបស់លោកសើ ឌៀត ជិះ ដោយលោកសើ ឌៀត ជាអ្នកបើកបរជូនដំណើរពួកគេ លុះដល់កន្លែងកើតហេតុ ពួកចោរបានប្រើល្បិចថា ឈប់ឡានមួយភ្លែតដើម្បីបត់ជើងតូច។ ពេលឡានឈប់មិនបានប៉ុន្មានផង ចោរម្នាក់បានដកកាំភ្លើងបាញ់ម្ចាស់រថយន្ដ៤គ្រាប់តែម្ដង បណ្ដាលឱ្យត្រូវ៣គ្រាប់ រួចហើយ ច្រានសើ ឌៀត ទម្លាក់ពីលើរថយន្ដតែម្ដងឱ្យដេកដួលក្នុងថ្លុកឈាមកណ្ដាលថ្នល់។
ក្រោយបាញ់សម្លាប់ម្ចាស់ឡានហើយ ពួកចោរបានបើកឡានទៅមុខបានប្រហែល៣០០-៤០០ម៉ែត្រ ក៏ត្រឡប់ឡានមកក្រោយវិញ សំដៅទៅរាជធានីភ្នំពេញ ដែលខណៈនោះបានបែកការណ៍ផ្អើលឆោឡោដល់ប៉ូលិស និងប្រជាពលរដ្ឋ ហើយបានទាក់ទងទៅគ្រប់សមត្ថកិច្ចទាំងអស់ឱ្យស្ទាក់ចាប់។ រថយន្ដកាមរីបាឡែនដែលក្រុមចោរបើករត់ត្រូវបានគេប្រទះឃើញ នៅម្ដុំផ្សារថ្នល់ទទឹង ភូមិដំណាក់អម្ពិល ស្រុកអង្គស្នួល ខេត្តកណ្ដាល។ ប៉ូលិសដេញប្រមាញ់រហូតដល់ភូមិត្រពាំងពោធិ៍ ឃុំអូរ ស្រុកភ្នំស្រួច ខេត្តកំពង់ស្ពឺ ហើយពេលនោះក្រុមបានបើកទ្វាររថយន្ដចុះ និងបាញ់តដៃជាមួយប៉ូលិសមួយប្រាវ មុនពេលរត់ចូលព្រៃលាក់ខ្លួន។
រថយន្ដកាមរីបាឡែនដែលចោរទុកចោលកណ្ដាលផ្លូវ ត្រូវបានប៉ូលិសនាំយកមករក្សាទុកនៅទីបញ្ជាការកងរាជអាវុធហត្ថ ខេត្តកំពង់ស្ពឺ ដើម្បីស៊ើបអង្កេតបន្ដទៀត ព័ត៌មានលំអិតនឹងផ្សាយជូននៅពេលក្រោយ៕
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
