ខេត្តរតនគិរី ៖ ទូមាសមួយនៅផ្សារបានលុង ត្រូវក្រុមចោរប្រដាប់អាវុធមួយក្រុមបានចូលប្លន់យកគ្រឿងអលង្ការ សរុបអស់ជាង១០០តម្លឹងមាស ហើយរត់គេចខ្លួនបាត់ដោយសុវត្ថិភាព ។ អំពើប្លន់នេះបានកើតឡើងខណៈជនរងគ្រោះជាអាជីករកំពុងអង្គុយលក់ គ្រឿងអលង្ការនៅមុខផ្ទះម្នាក់ឯងនាវេលាម៉ោងប្រហែល៤និង៣០នាទី ល្ងាចថ្ងៃទី៩ ឧសភា ។
សាក្សីលក់ដូរនៅជិតខាងទូមាសនិយាយថា ក្រុមចោរប្រដាប់ដោយកាំភ្លើងមានគ្នា៦នាក់ និងបានបាញ់គម្រាមចំនួនពីរគ្រាប់ ព្រមទាំងកាប់នឹងពូថៅផងដែរ បណ្តាលឱ្យម្ចាស់ទូមាសរងរបួសក្បាលត្រូវបានបញ្ជូនទៅសង្គ្រោះ ភ្លាមៗ ។
តាមប្រភពពីកន្លែងកើតហេតុបានឱ្យដឹងថាម្ចាស់ ទូមាសដែលរងគ្រោះឈ្មោះឡុង សំណាង ហៅតាម៉ាប់ ភេទប្រុស អាយុជាង៥០ឆ្នាំ ជាអាណិកជនខ្មែរ នៅអូស្ត្រាលីមករកស៊ីនៅស្រុកខ្មែរ ដោយប្រកបរបរលក់មាស ដូរប្រាក់នៅផ្សារបានលុង ហើយផ្ទះដែលស្នាក់នៅបានបើកកន្លែងលក់មាសនៅមុខផ្ទះ មានចំនួនពីរគ្រួសារ ១-ឈ្មោះឡុង សំណាង ជនរងគ្រោះ និងក្រុមគ្រួសារ ២-ឈ្មោះសុខ គីមសន ភ្នាក់ងារទូរទស្សន៍បាយ័នប្រចាំខេត្តរតនគិរី ដែលត្រូវជាប្អូនថ្លៃជនរងគ្រោះ ហើយមានមុខរបរជាអ្នកលក់គ្រឿងអលង្ការដែរ នៅក្នុងផ្សារបានលុង ។
គួរកត់សម្គាល់ថា នៅចំណុចកើតហេតុនោះមានផ្ទះលក់មាសតែមួយកន្លែងនេះទេ ។ នៅជុំវិញនោះមានលក់របស់របរផ្សេងជាច្រើនទៀត នៅជាប់ៗគ្នា ។ តាមការរៀបរាប់របស់ជនរងគ្រោះបាននិយាយថា មុនពេលកើតហេតុការណ៍ប្លន់នេះ គាត់អង្គុយលក់មាសម្នាក់ឯង នៅមុខផ្ទះស្រាប់តែឃើញមនុស្សមួយក្រុមមានគ្នា៦នាក់ សម្រុកចូលមកសំដៅរូបគាត់ រួចជនម្នាក់បានយកកាំភ្លើងភ្ជង់គាត់ ហើយម្នាក់ទៀតចូលទៅភ្ជង់ប្រពន្ធរបស់គាត់នៅក្នុងផ្ទះ។ ឯពីរនាក់ទៀត កាន់ពូថៅ ម្នាក់មួយបានវាយបំបែកកញ្ចក់ទូរមាសលាន់ប្រាវអត់ញញើតដៃ រួចប្រមូលយកគ្រឿងអលង្ការក្នុងទូដាក់ស្បោង និងម្នាក់ទៀតប្រវាយប្រតប់ជាមួយម្ចាស់ទូមាសឈ្មោះឡុង សំណាង ដែលគាត់តដៃ និងកាប់ចំក្បាលត្រូវបញ្ជិតបន្តិច ។ មានគ្នាម្នាក់ទៀត កំពុងឈរបញ្ជេះម៉ូតូចាំនៅមាត់ច្រកចេញចូលផ្ទះកើតហេតុជាស្រេច ។ សាច់ញាតិជនរងគ្រោះបានបន្តថា ក្រុមចោរប្លន់វាយបំបែកទូយកគ្រឿងអលង្ការ ប្រាក់ដុល្លារ និងប្រាក់រៀលសរុបអស់ចំនួនជាងមួយរយតម្លឹងមាស ។
ក្រុមគ្រួសារដែលរស់នៅក្នុងផ្ទះកើតហេតុនេះក៏ ធ្លាប់រងគ្រោះដោយក្រុមចោរប្រដាប់អាវុធប្លន់ចំនួន៣លើកមកហើយ ដែលលើកទី១ចោរប្លន់ផ្ទះកន្លែងកើតហេតុនេះ នៅឆ្នាំ២០០៧ តែក្រុមចោរប្លន់ក៏ត្រូវបានបង្ក្រាប។ លើកទីពីរប្លន់ផ្ទះលោកសុខ គឹមសន ភ្នាក់ងារទូរទស្សន៍បាយ័នក្នុងឆ្នាំ២០១០ ស្ថិតក្នុងភូមិ១ សង្កាត់ឡាបានសៀក ស្រុកបានលុង ដែលនៅខាងលិចផ្សារ រំលងមួយផ្លូវ ។ លុះក្រោយមកលោកសុខ គឹមសន បានជួលផ្ទះនោះឱ្យអ្នកផ្សេងរស់នៅ ឯខ្លួននិងក្រុមគ្រួសារបានមករស់នៅជាមួយបងថ្លៃ ដែលជាជនរងគ្រោះ ក៏ត្រូវក្រុមចោរចូលប្លន់ជាលើកទី៣នេះ ។
ប្រភពព័ត៌មានបន្តថា នៅពេលដែលក្រុមចោរកំពុងធ្វើសកម្មភាពប្លន់នោះ អ្នកនៅជុំវិញបានឃើញក្រុមចោរស្រែកគម្រាមអ្នកលក់នៅក្បែរនោះថា បើខ្លាចងាប់នាំគ្នាក្រាប កុំចូលមក ហើយមនុស្សម្នាក្បែរនោះខ្លះរត់ចេញ ខ្លះក្រាបនៅនឹងដី ព្រោះខ្លាចអំណាចចោរ ។ បន្ទាប់ពីប្រមូលបានគ្រឿងអលង្ការហើយក្រុមចោរបានបាញ់ឡើងលើចំនួន ពីរគ្រាប់ ហើយអាមេគ្រាប់កាំភ្លើងស្អុយដែលមិនផ្ទុះចេញចំនួន៥គ្រាប់ គឺជាគ្រាប់កាំភ្លើងAK ដែលគេសង្ស័យថា ជាកាំភ្លើងអាកាច្នៃដោយកាត់កាណុង កាត់ស្វាយ ។
សូមបញ្ជាក់ថា ក្រុមចោរប្លន់មានចំនួន៦នាក់ ជិះម៉ូតូចំនួនពីរគ្រឿង ពីរនាក់ភ្ជង់កាំភ្លើងប្តីពីចម្ងាយ ពីរនាក់ទៀតកាន់ពូថៅចូលទៅវាយទូមាស និងបានប្រវាយប្រតប់ជាមួយប្តីគាត់ ម្នាក់ទៀតភ្ជង់កាំភ្លើងប្រពន្ធ និងម្នាក់ទៀតបញ្ជេះម៉ូតូចំផ្លូវដែលពួកវាចាត់ចែងទុកមុន ជាស្រេច ។ ពេលវាយទូមាសបែកកញ្ចក់ហើយ ពួកវាប្រមូលគ្រឿងអលង្ការដាក់ស្បោងរួចរត់ប្រសេចប្រសាចខ្លាចមាន គ្រោះថ្នាក់ដល់អាយុជីវិត ។
លោកឯម វុន អធិការនគរបាលក្រុងបានលុងបាននិយាយថា ក្រុមចោរប្លន់អាចមកពីស្រុកក្រោម ដែលពេលនេះលោកកំពុងចាត់កម្លាំងតាមស្រាវជ្រាវគ្រប់ច្រកល្ហក និងតាមបណ្តាខេត្ត ជាប់ព្រំប្រទល់។ លោកបានបង្ហើបថា ក្រុមចោរប្លន់អាចកំពុងរត់គេចទៅទិសខាងជើងផ្សារបានលុងត្រង់ ច្រកផ្លូវភូមិធួយអំពិល ក្នុងស្រុកអូរជុំ ហើយលោកកំពុងបន្តធ្វើការស្រាវជ្រាវ ។
ករណីប្លន់នៅវេលាល្ងាចបែបនេះមានពីរករណីហើយ ដូចជានៅចំណុចភូមិ៧ សង្កាត់ឡាបានសៀក ក្រុងបានលុង លើទួលកម្សាន្ត ប្រដាប់ដោយកំាភ្លើងAK យកបានខ្សែ.ក១តម្លឹង និងកាបូបលុយ គេចខ្លួនដោយសុវត្ថិភាព ។ជនរងគ្រោះឈ្មោះសាស សុខហ៊ាង ភេទស្រី អាយុ៣០ឆ្នាំ ត្រូវក្រុមចោរបាញ់ត្រូវពោះរបួសធ្ងន់ កំពុងសម្រាកព្យាបាលនៅប្រទេសវៀតណាម ។
ជុំវិញអំពើប្លន់ដ៏កក្រើកនៅក្រុងបានលុងនេះ នៅរសៀលថ្ងៃទី១០ ឧសភា មានព័ត៌មានឱ្យដឹងថា សមត្ថកិច្ចបានរកឃើញម៉ូតូចោរប្លន់២គ្រឿងលាក់ក្នុងព្រៃចំណុច ក្រោយវត្តស្វាយចម្ងាយ២ទៅ៣គីឡូម៉ែត្រ ស្ថិតក្នុងភូមិ៣ សង្កាត់កាចាញ ក្រុងបានលុង ជាតំបន់ព្រំប្រទល់ជាប់នឹងភូមិធួយអំពិល ឃុំចាអ៊ុង ស្រុកអូរជុំ ។ ម៉ូតូទាំង២គ្រឿងដែលបានប្រទះឃើញនេះមួយគ្រឿងម៉ាកវីវ៉ា ពណ៌ខ្មៅ និងមួយគ្រឿងទៀតម៉ាកវ៉េវ ពណ៌ក្រហមលាយខ្មៅ ។ ម៉ូតូទាំង២គ្រឿងនេះត្រូវបានពួកចោរកាច់ស្លាកលេខចេញ។ ក្រៅពីការប្រទះឃើញម៉ូតូចោរដែលលាក់ចោលក្នុងព្រៃ សមត្ថកិច្ចក៏បានរកឃើញអាវធំ១និងមួកសុវត្ថិភាព១ដែរ ។ អាវធំនោះគឺពួកចោរពាក់ងាយស្រួលលាក់កាំភ្លើង ។ បើគិតចម្ងាយពីផ្សារបានលុងទៅដល់ចំណុចព្រៃដែលចោរលាក់ម៉ូតូ គឺប្រមាណ៥ទៅ៦គីឡូម៉ែត្រ ។
អំពើប្លន់អ្នកលក់មាសនេះ បានធ្វើឱ្យក្រសួងមហាផ្ទៃបញ្ជូនក្រុមមន្ត្រីពីនាយកដ្ឋានកណ្តាល យុត្តិធម៌ទៅចូលរួមស្រាវជ្រាវយ៉ាងក្តៅគគុកក្នុងការតាម ប្រមាញ់ក្រុមចោរនោះផងដែរ ព្រោះសកម្មភាពរបស់ក្រុមចោរមានភាពកាន់តែព្រហើន ៕
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
