រាជធានីភ្នំពេញ ៖ ចោរមួយក្រុមគាស់ដំបូលការិយាល័យរដ្ឋបាលរោងចក្រកាត់ដេរមួយ ចូលទៅរើកកាយលួចយកលុយអស់ជិតពីរម៉ឺនដុល្លារ ដែលគេទុកនៅក្នុងថតតុ រួចគេចខ្លួនទៅបាត់ ដោយបន្សល់ទុកវត្ថុតាង គឺធុងខ្យល់ និងធុងហ្គាសសម្រាប់ផ្សារកាត់ទូដែកនៅនឹងកន្លែងកើតហេតុ ។
ហេតុការណ៍នោះបង្កឱ្យមានការភ្ញាក់ផ្អើលកាលពី វេលាព្រឹកថ្ងៃទី៦ ឧសភា ២០១២ នៅក្នុងរោងចក្រកាត់ដេរយីហោ ហុងតិច មានទីតាំងស្ថិតក្នុងភូមិត្រពាំងពោធិ៍ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ។ ស្រ្តីឈ្មោះឈិន លីជូ អាយុ២៨ឆ្នាំ ជាប្រធានរដ្ឋបាលរោងចក្រឱ្យដឹងថា កាលពីថ្ងៃទី៨ ឧសភា នាងត្រូវថៅកែប្រើឱ្យទៅបើកលុយពីធនាគារមួយ ដើម្បីយកទុកបើកឱ្យកម្មករកម្មការិនី ។ លុយបើកចេញពីធនាគារនោះមានចំនួន៦៤.០០០ដុល្លារ ។ បន្ទាប់ពីបើកលុយបាន និងនាំយកទៅដល់រោងចក្រដោយសុវត្ថិភាព ក៏បានរំលែកវេចខ្ចប់ដាក់ក្នុងស្រោមសំបុត្រតាមឈ្មោះកម្មករ -កម្មការិនី នីមួយៗសរុបជាង៥០០ស្រោមសំបុត្រ និងគិតទៅអស់ចំនួន៥១.០០០ដុល្លារ ។
ស្ត្រីរូបនោះបន្តទៀតថា ក្រោយពេលវេចខ្ចប់រួច ថៅកែបញ្ជាឱ្យយកលុយនោះទៅទុកនៅបន្ទប់ផ្សេងត្រៀមបើកឱ្យកម្មករ នៅថ្ងៃទី១០ ឧសភា ឯលុយដែលនៅសល់ពីការវេចខ្ចប់ជាង១ម៉ឺនដុល្លា រួមជាមួយលុយដែលមានស្រាប់មួយចំនួនទៀតសរុបជិត២ម៉ឺនដុល្លារ ទុកក្នុងថតតុក្នុងបន្ទប់រដ្ឋបាល ហើយក៏មានទូដែកមួយមានលុយជាង៨.០០០ដុល្លារ នៅក្បែរនោះដែរ ។ ដោយសារកន្លងមកមិនធ្លាប់មានការបាត់បង់បែបនេះ ទើបមិនមានការភ័យខ្លាច ហើយបន្ទាប់ពីចប់ម៉ោងធ្វើការ នាងបានទៅផ្ទះដូចសព្វដង ។ រហូតដល់វេលាព្រឹកថ្ងៃទី៩ ឧសភា ពេលដែលស្ត្រីជនជាតិភូមាម្នាក់ ដែលជាបុគ្គលិករដ្ឋបាលនៅទីនោះដែរ ចាក់សោទ្វារបន្ទប់ចូលទៅទើបមានការភ្ញាក់ផ្អើលឆោឡោឡើងតែម្តង ។
ប្រភពព័ត៌មានពីកន្លែងកើតហេតុឱ្យដឹងថា ក្រុមចោរមានគ្នាចាប់ពី២នាក់ឡើងទៅ និងស៊ើបដឹងយ៉ាងច្បាស់ថា នៅក្នុងបន្ទប់រដ្ឋបាលនោះមានទុកប្រាក់ ។ពេលមានការភ្ញាក់ផ្អើលមុនដំបូងគេបានប្រទះសម្ភារនៅក្នុងបន ្ទប់រដ្ឋបាលនោះមានសភាពរញ៉េរញ៉ៃ ឯថតតុមិនមានស្នាមគាស់ឡើយ គឺចោរមានសោចាក់ត្រូវ មិនតែប៉ុណ្ណោះកូនសោនោះគឺជាកូនសោពិសេស ដែលអាចចាក់ត្រូវស្ទើរតែគ្រប់សោទៀតផង ។ ប្រភពដដែលបន្តទៀតថា ក្រៅពីនេះ គេបានដឹងថា ក្រុមចោរគឺឡើងគាស់ដំបូល និងពិតានចូលទៅក្នុងបន្ទប់ដាក់លុយនោះ ព្រោះនៅក្នុងបន្ទប់នោះត្រូវគេពិនិត្យឃើញមានស្នាមគាស់ដំបូល និងពិតាន ។ ចំពោះលុយសម្រាប់ទុកបើកឱ្យកម្មករត្រូវបានគេយកទៅទុកនៅ កន្លែងផ្សេង បើទុកនៅក្នុងបន្ទប់ជាមួយគ្នាប្រាកដជាត្រូវក្រុមចោរលួចយក ទាំងអស់។ មិនតែប៉ុណ្ណោះក្រុមចោរបាននាំយកឧបករណ៍សម្រាប់កាត់ទូដែកចូល ទៀតផង ប៉ុន្តែដោយសារពួកគេលួចយកបានលុយមួយចំនួនធំនៅក្នុងថតតុហើយនោះ ទើបអត់កាត់ទូដែកនោះទេ ប៉ុន្តែបានយកចេញពីក្នុងបន្ទប់ទៅទុកចោលនៅក្បែររបងខាងក្រោយ បន្ទប់រដ្ឋបាល រួចយកតែលុយដែលងាយស្រួលយក ហើយគេចខ្លួនទៅបាត់ស្រមោលចោលឧបករណ៍ទាំងនោះតែម្តង។
ទាក់ទិនទៅនឹងហេតុការណ៍នោះ ខាងរដ្ឋបាលរោងចក្របានប្តឹងសមត្ថកិច្ចព្រហ្មទណ្ឌខណ្ឌពោធិ៍ សែនជ័យ ឱ្យទៅពិនិត្យរកមើលភស្តុតាងផ្សេងៗ ប៉ុន្តែហាក់ដូចជាមិនមានលទ្ធផលអ្វីទេ ហើយគេក៏គ្មានសង្ឃឹមថា ប៉ូលិសរកឃើញមុខចោរដែរ ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
