រាជធានីភ្នំពេញ ៖ បុរសអ្នកបើកបររ៉ឺម៉កម៉ូតូដឹកទឹកកកម្នាក់ បានរងរបួសបាក់ជើងឆ្វេង ដោយសារតែត្រូវម៉ូតូវីវ៉ាបុកពេញទំហឹងបណ្ដាលឱ្យរ៉ឺម៉កម៉ូតូ ក្រឡាប់ កាលពីវេលាម៉ោង១១និង២០នាទីព្រឹកថ្ងៃទី៨ ឧសភា នៅតាមបណ្តោយផ្លូវលេខ១៥០ ស្ថិតក្នុងសង្កាត់មនោរម្យ ខណ្ឌ៧មករា ។ ហេតុការណ៍នេះ កើតឡើងខណៈរ៉ឺម៉កម៉ូតូកំពុងដឹកទឹកកកធ្វើដំណើរពីកើតទៅលិច លុះដល់ចំណុចខាងលើក៏បត់ឆ្វេងទៅទិសខាងត្បូង ពេលនោះក៏បុកគ្នាជាមួយម៉ូតូវីវ៉ាដែលធ្វើដំណើរពីត្បូងទៅជើងតែ ម្ដង។
ប្រភពព័ត៌មាននៅកន្លែងកើតហេតុឱ្យដឹងថា រ៉ឺម៉កម៉ូតូដឹកទឹកកកបើកបរដោយបុរសម្នាក់ តាមបណ្ដោយផ្លូវលេខ១៥០ ពីកើតទៅលិច ហើយបានបត់ឆ្វេងទៅទិសខាងត្បូង ។ ខណៈបត់នោះក៏បានបុកគ្នាជាមួយម៉ូតូវីវ៉ាដែលបើកបរដោយបុរស ម្នាក់ធ្វើដំណើរពីត្បូងទៅជើងពេញទំហឹង បណ្ដាលឱ្យអ្នកបើករ៉ឺម៉កម៉ូតូដឹកទឹកកកបាក់ជើងឆ្វេង ហើយរ៉ឺម៉កម៉ូតូដឹកទឹកកក ក៏ក្រឡាប់ធ្លាក់ទឹកកកដុំរាយប៉ាយពេញផ្លូវ ។
ជនរងគ្រោះត្រូវបានគេបញ្ជូនតាមម៉ូតូយកទៅ ព្យាបាលនៅមិនឆ្ងាយប៉ុន្មានពីកន្លែងកើតហេតុ ឯអ្នកបើកបរម៉ូតូវីវ៉ា គ្រាន់តែរងរបួសស្រាលប៉ុណ្ណោះ។ ក្រោយពីកើតហេតុ ប៉ូលិសចរាចរខណ្ឌ៧មករាបានចុះមកវាស់វែង ហើយយកម៉ូតូវីវ៉ានិងម៉ូតូអូសរ៉ឺម៉កទៅរក្សាទុក ដើម្បីរង់ចាំការដោះស្រាយជាក្រោយ ៕
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]