ខេត្តកំពង់ចាម ៖ ម៉ូតូម៉ាកវ៉េវអេស១គ្រឿង ពណ៌ទឹកប្រាក់ គ្មានស្លាកលេខបានបង្កគ្រោះថ្នាក់ដោយបើកទៅបុកម៉ូតូសេ១០០ ស៊េរីចាស់ពេញទំហឹងនៅលើកំណាត់ផ្លូវ ក្នុងភូមិទី៨ សង្កាត់កំពង់ចាម ក្រុងកំពង់ចាម កាលពីវេលាម៉ោង៩ព្រឹកថ្ងៃទី៨ ឧសភា បណ្តាលឱ្យអ្នកបើកម៉ូតូវ៉េវដួលប្រកាច់ប្រកិនរងរបួស ធ្ងន់បែកក្បាលហូរឈាមសន្លប់បាត់ស្មារតីត្រូវបានគេបញ្ជូន មកសង្គ្រោះនៅគ្លីនិកឯកជន«១១៥»ស្ថិតនៅក្បែរនោះ ។
តាមមន្ត្រីនគរបាលចរាចរក្រុងប្រាប់កោះ សន្តិភាពឱ្យដឹងថា កម្លាំងនគរបាលចរាចរជាច្រើននាក់ត្រូវបានលោកវរសេនីយ៍ត្រីសំ ផាត អធិការនគរបាលក្រុងដាក់ឱ្យយាមចល័តពីកន្លែងមួយទៅ កន្លែងមួយ ដើម្បីពង្រឹងច្បាប់ចរាចរណ៍នៅត្រង់ផ្លូវបំបែកជា៣ស្ថិត នៅក្នុងភូមិ-សង្កាត់ខាងលើ ។ ស្របពេលដែលកំពុងតែ យាមនោះ ស្រាប់តែមានម៉ូតូ១គ្រឿងម៉ាកវ៉េវអេស ជិះដោយឈ្មោះព្រហ្ម វាសនា ភេទប្រុស អាយុ៣០ឆ្នាំ មានទីលំនៅក្នុងភូមិថ្នល់កែង ឃុំកណ្តៀងរាយ ស្រុកស្វាយទាប ខេត្តស្វាយរៀងបានជិះបោះពួយយ៉ាងលឿនក្នុងទិសដៅពីត្បូង ទៅជើងដោយមិនពាក់មួកសុវត្ថិភាពទេ ។ លុះមកដល់ចំណុចកើតហេតុបានបុកម៉ូតូសេ១០០ មួយគ្រឿង ដែលជិះបញ្ច្រាសទិសគ្នាដោយលោកតាម្នាក់ឈ្មោះឈិន ឈាន អាយុ៧៧ឆ្នាំ រស់នៅភូមិទី៣ សង្កាត់វាលវង់ ក្រុងកំពង់ចាម ពេលកំពុងបត់ចូលកន្លែងលក់កង់-ម៉ូតូយ៉ាងពេញទំហឹងលាន់ឮ ដូចរន្ទះ ។ ក្នុងហេតុការណ៍នេះ បណ្តាលឱ្យបុរសបើកម៉ូតូវ៉េវផ្លោងខ្ទាចចេញពីម៉ូតូដួល ទៅលើផ្លូវថ្នល់រងរបួសបែកក្បាលហូរឈាមសន្លប់បាត់ស្មារតី ហើយភ្លាមៗត្រូវបានសង្ស័យថាស្លាប់ តែប្រហែលជា១០នាទីក្រោយមកបានដឹងខ្លួនឡើងវិញ ទើបត្រូវបាននាំទៅសង្គ្រោះនៅគ្លីនិកឯកជនមួយដែលស្ថិត នៅក្បែរនោះ ។ ដោយឡែកលោកតាឈ្មោះឈិន ឈាន សំណាងល្អគ្រាន់តែរបួសស្រាលប៉ុណ្ណោះ ។
មន្ត្រីនគរបាលចរាចរក្រុងបានបញ្ជាក់បន្ថែម ថា ចំពោះម៉ូតូដែលម្ចាស់បានរងគ្រោះថ្នាក់រហូតដល់សន្លប់នេះ ពុំត្រូវបានសមត្ថកិច្ចលើកសញ្ញាហៅឱ្យឈប់នោះទេ គឺបានប្រើប្រាស់ល្បឿនលើសកម្រិតដោយខ្លួនឯង ដោយឃើញជិះលឿនតាំងពីចំណុចរង្វង់មូលក្បាលស្ពាន គីហ៊្សុណាត្រើយខាងលិចក្រុងកំពង់ចាមម៉្លេះ ។ តាមការកត់សម្គាល់ម៉ូតូវ៉េវនេះ ត្រូវបានសង្ស័យជាម៉ូតូរត់ពន្ធដែលជិះមកពីខាងខេត្តស្វាយ រៀងមកលក់នៅក្រុងកំពង់ចាម ។
តាមបុរសរងគ្រោះឈ្មោះព្រហ្ម វាសនា វិញប្រាប់ឱ្យដឹងថា រូបគេពិតជាជិះម៉ូតូចេញមកពីខាងខេត្តស្វាយរៀងមែន ឆ្ពោះមកក្រុងកំពង់ចាម ដើម្បីជួបប្អូនប្រុស ។ គ្រាន់តែឆ្លើយបានត្រឹមនេះគេថា ដូចជាវង្វេង ហើយក៏ប្រះខ្លួនដេកតែម្តងនៅ កន្លែងសង្គ្រោះខាងលើ ៕
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
