រាជធានីភ្នំពេញ ៖តារាចម្រៀងសាសា កាលពីពេលថ្មីៗនេះ អះអាងប្រាប់កោះសន្តិភាពថា នាងទទួលបានជោគជ័គយ៉ាងខ្លាំងក្នុងពេលស្ថិតនៅក្នុងផលិតកម្មថោន ហើយកំពុងត្រៀមចេញវ៉ុលថ្មីមួយទៀតក្នុងពេលឆាប់ៗខាងមុខនេះ ។
ការអះអាងរបស់កញ្ញាសាសា ធ្វើឡើងខណៈពេលបទចម្រៀងរបស់នាងភាគច្រើនកំពុងទទួលបានការគាំទ្រយ៉ាងខ្លាំងពីទស្សនិកជន ពិសេសស្រទាប់យុវវ័ដែលនិយមបទសម័យថ្មី ។ តាមពិតសាសាមិនគ្រាន់តែជោគជ័យលើការងារសិល្បៈប៉ុណ្ណោះទេ តែបញ្ហាស្នេហាវិញក៏ទទួលបានជោគជ័យដែរ ។ នេះបើតាមព័ត៌មានដែលទទួលបានពីអ្នកសិល្បៈដូចគ្នា ។ ព្រោះតែដូច្នេះហើយបានជាសព្វថ្ងៃនេះសាសាមិនគ្រាន់តែបង្ហាញរូបរាងស្រស់ស្អាតបង្កប់ដោយគ្រឿងអលង្ការមានតម្លៃនោះទេ តែរថយន្តដែលនាងជិះក៏ទំនើប និងមានតម្លៃថ្លៃទៀតផង ក្នុងពេលដែលលេចឮថា នាងកំពុងតែមានទំនាក់ទំនងយ៉ាងស្អិតរមួតជាមួយពាណិជ្ជករម្នាក់ ។
សាសានិយាយថា បន្ទាប់ពីទទួលបានជោគជ័យបទចម្រៀងកន្លងមក នាងកំពុងតែត្រៀមចេញនូវវ៉ុលថ្មីមួយទៀតក្នុងពេលឆាប់ៗ ខាងមុខនេះ ។ បទចម្រៀងក្នុងវ៉ុលថ្មីដែលសាសារំពឹងថានឹងទទួលបានជោគជ័យនោះគឺបទ«សង្សារខ្ញុំជាប្រុសស្អាត» និងបទ «២០១២ទៅហើយ»ដែលជាបទពីរោះជក់ចិត្តនិងទាន់សម័យសម្រាប់យុវជន ។
តារាចម្រៀងវ័យ២២ឆ្នាំរូបនេះ ទើបតែបានចូលច្រៀងនៅផលិតកម្មថោនប្រមាណជាងមួយឆ្នាំប៉ុណ្ណោះ ប៉ុន្តែស្ថិតនៅទីនោះនាងហាក់ដូចជាមានឱកាសច្រើនក្នុងការបញ្ចេញសមត្ថភាពក្នុងពេលដែលក្រុមហ៊ុនមានគោលការណ៍ច្បាស់លាស់សម្រាប់តារាចម្រៀងទាំងអស់ ពិសេសគឺរូបនាងតែម្តង។
ដូច្នេះហើយបានជាបទចម្រៀងរបស់នាងត្រូវបានចេញជាបន្តបន្ទាប់ និងមានការគាំទ្រគួរឱ្យមានមោទនភាពសម្រាប់រូបនាង។
ពាក់ព័ន្ធបញ្ហាស្នេហាសាសាធ្លាប់លេចឮព័ត៌មានថា នាងមានទំនាក់ទំនងជិតស្និទ្ធជាមួយបុរសម្នាក់ដែលគេគិតថា ជាអតីតសង្សារបណ្តូលចិត្តរបស់នាង ប៉ុន្តែនាង បដិសេធថារវាងនាងនិងបុរសម្នាក់នោះ គឺគ្រាន់តែជាអ្នករាប់អានគ្នាក្នុងលក្ខណៈមិត្តភាពប៉ុណ្ណោះ។
បច្ចុប្បន្ន សាសា ត្រូវគេកត់សម្គាល់ឃើញថា កំពុងតែស្និទ្ធស្នាលជាមួយបុរសសង្ហាម្នាក់ដែលគេស្គាល់ថា ជាអ្នកជំនួញមានមុខមាត់់ក្នុងសង្គម ។ គេឧស្សាហ៍ឃើញសាសា និងបុរសម្នាក់នោះបណ្តើរគ្នាចូលរួមក្នុងកម្មវិធីជប់លៀងញឹកញាប់ ។ ប៉ុន្តែដូចកាលមុនដែរ សាសានៅតែប្រកែកថា បុរសអ្នកជំនួញរូបនោះនិងរូបនាង មិនទាន់ឈានដល់លក្ខណៈជាគូសង្សារនៅឡើយទេ ដោយគ្រាន់តែរាប់អានជាធម្មតាដូចបុរសមុនៗដែរ ។
សាសាព្យាយាមលាក់អត្តសញ្ញាណបុរសម្នាក់នោះ បើទោះជាមានការជជីកសួរពីអ្នកកាសែតក៏ដោយចុះ ៕
ដកស្រង់ពី គេហទំព័រ កោះសន្តិភាព
សូមមិត្តទាំងអស់ជួយចុច Add a comment ដើម្បីផ្តល់ជាមតិ និងជួយ Share នៅលើ Facebook របស់អ្នក។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]