ភ្នំពេញៈ ចាប់ពីខែមករានេះទៅ រដូវកាលនៃការកើបប្រាក់របស់តារាចម្រៀង តារាសម្តែង អ្នករៀបចំកម្មវិធី និងពិធីករពិធីការិនីបានឈានមកដល់។ ខណៈពេលកំពុងវក់វីជាមួយនឹងការចេញច្រៀងកម្មវិធីនានាតាមខេត្ត ក្រុងនោះ មានការអះអាងថា អ្នកសិល្បៈ និងទស្សនិកជនមួយចំនួនដែលបានទៅចូលរួមកម្មវិធីបុណ្យសមុទ្រ និងឆ្លងឆ្នាំនៅខេត្តព្រះសីហនុបានទទួលនូវភាពភ្ញាក់ផ្អើលនៅ ក្រោយឆាកជាងលើឆាកតន្ត្រី នៅពេលពាក្យសម្តីតឹងសរសៃក និងការពាក់មុខយក្សដាក់គ្នារវាងអ្នករៀបចំកម្មវិធី ឌួង ហ្សូរីដា និងតារាចម្រៀង ពេជ្រ សោភា ផ្ទុះខ្លាំងៗស្របគ្នានឹងការបាញ់កាំជ្រួចឆ្លងឆ្នាំនោះ ពាក់ព័ន្ធនឹងការជំពាក់ប្រាក់តម្លៃខ្លួន។
ក្រៅពីអាជីពជាពិធីការិនី ម្ចាស់ហាងសម្លៀកបំពាក់ និងច្នៃម៉ូដហ្សូហ្វេសិន ម្ចាស់ក្រុមហ៊ុនដើរម៉ូដ Cambodia Super Models ឌួង ហ្សូរីដា បានចាប់មុខរបរថ្មីមួយបន្ថែមទៀតជាអ្នករៀបចំកម្មវិធីនានា មានការទាស់ពាក្យសម្តីគ្នាពីបញ្ហាលុយកាក់ដែលអ្នកសិល្បៈគ្រប់ គ្នាបានឃើញរវាងនាង និងតារាចម្រៀងហង្សមាស ពេជ្រ សោភា ហើយក៏ទាក់ទងនឹងអាជីពថ្មីមួយនេះផងដែរ។
ទោះបីជាការប៉ះពាក្យសម្តីគ្នាមួយប្រាវបានកន្លងហួសរួចហើយក្តី តែអ្នករៀបចំកម្មវិធី ឌួង ហ្សូរីដា បាននិយាយសម្រាលមកវិញថា បញ្ហានោះពិតជាបានកើតមាន តែមិនមែនធំដុំដូចគេនិយាយ និងការបំប៉ោងព័ត៌មានរបស់សារព័ត៌មានមួយចំនួននោះទេ។ ពិធីការិនីមានប្រភពពីនារីអាកាសចរណ៍ ឌួង ហ្សូរីដា បានឲ្យដឹងថា ក្នុងនាមជាអ្នករៀបចំកម្មវិធី នាងបានហៅ ពេជ្រ សោភា ឲ្យទៅច្រៀងក្នុងកម្មវិធីមួយរបស់ក្រសួងពាណិជ្ជកម្មដោយរូបនាង បានកក់តម្លៃខ្លួនយ៉ាងត្រឹមត្រូវ ហើយកម្មវិធីនោះ ពេជ្រ សោភា ក៏បានច្រៀងចប់រួចរាល់ហើយដែរ។
ពិធីការិនីរូបនេះបាននិយាយថា៖«ខ្ញុំបានហៅ ពេជ្រ សោភា ទៅច្រៀងក្នុងកម្មវិធីក្រសួងពាណិជ្ជកម្ម២ថ្ងៃ ហើយខ្ញុំក៏បានកក់ថ្លៃឡើងច្រៀងហ្នឹងពាក់កណ្តាលឲ្យគាត់ដែរ គឺនៅពាក់កណ្តាលចំនួន៧០០(ដុល្លារ)ទៀត មិនមែននៅ២០០០នោះទេ ហើយក៏មានបញ្ហានឹងអាពាក់កណ្តាលហ្នឹង»។
ការប៉ះពាក្យសម្តី និងដំឡើងសំឡេងខ្លាំងជាងធម្មតា រវាងអ្នកសិល្បៈទាំងពីរត្រូវបានពិធីការិនី ឌួង ហ្សូរីដា បកស្រាយថា បន្ទាប់ពីច្រៀងចប់របស់កម្មវិធីក្រសួងពាណិជ្ជកម្ម នាងមិនទាន់បានផ្តល់ប្រាក់ចំនួន៧០០ដុល្លារនៅសល់ឲ្យ ពេជ្រ សោភា ទេ ដោយនាងគិតថា ចាំឲ្យនៅថ្ងៃបុណ្យសមុទ្រ ព្រោះ ពេជ្រ សោភា ក៏ត្រូវមកចូលរួមដែរនោះ។
តារាម្ចាស់ក្រុមហ៊ុនដើរម៉ូដ Cambodia Super Modelsរូបនេះ បន្តថា នៅថ្ងៃនោះ ពេជ្រ សោភា បានទូរស័ព្ទ និងបានមកយកប្រាក់ពីនាងនៅកន្លែងបន្ទប់ផ្លាស់ខោអាវនៅពេលយប់ ក្រោយឆាក តែនាងបានប្រាប់ថា កាលពីពេលថ្ងៃទើបនាងមានប្រាក់គ្រប់ចំនួន៧០០ដុល្លារឲ្យ ឥឡូវមានតែ២០០ដុល្លារទេ តែ ពេជ្រ សោភា មិនព្រមយក។ ដូច្នេះនាង និង សោភា ក៏បានប៉ះពាក្យសម្តីគ្នាតិចតួច តែអត់មានបញ្ហាធំដុំកើតឡើងនោះទេ។
ហ្សូរីដា បាននិយាយថា៖«ពេលច្រៀងចប់ហ្នឹង ខ្ញុំអត់បានឲ្យប្រាក់គាត់ភ្លាមទេ គឺចាំឲ្យថ្ងៃបុណ្យសមុទ្រតែម្តង។ អាភា បានមកទារលុយខ្ញុំនៅកន្លែងផ្លាស់ខោអាវពេលយប់ ខ្ញុំថាអត់មានលុយគ្រប់ទេពេលយប់អ៊ីចឹង គឺមានតែ២០០ អ្ហែងយកប៉ុណ្ណឹងសិនទៅ តែអាភាមិនព្រមទេ»។ នាងបន្តថា៖«បើពេលថ្ងៃ អាភា មកយកក៏ខ្ញុំអាចដក ATM ឲ្យបានដែរ តែពេលយប់វាពិបាក ព្រោះមនុស្សច្រើនផង។ ពេលហ្នឹងអាភា មិនព្រមយកលុយ២០០ហ្នឹងទេ គាត់នៅតែនិយាយថា ទាល់តែគ្រប់បានយក។ អាភា និយាយថា គាត់មកកំពង់សោមហ្នឹងអត់មានលុយម៉ារៀលទេ ហើយជិះតាក់ស៊ី(Taxi) ទៀត។ ខ្ញុំ និងអ្នកក្បែរចេះតែសើច ហើយនិយាយលេងថា អីអា តារាចម្រៀងល្បីអី អត់លុយជិះតាក់ស៊ីអ៊ីចឹង តែគាត់អត់លេងជាមួយយើងទេ»។
ទោះបីជាយ៉ាងណា តារារូបនេះ មិនបានចាត់ទុកបញ្ហាប៉ះពាក្យសម្តីគ្នានេះ ជាជម្លោះអ្វីធំដុំនោះទេ ដោយនាងបាននិយាយសម្រាលមកវិញថា វាគ្រាន់តែជាការជជែកគ្នាតែប៉ុណ្ណោះ។ ម្ចាស់ក្រុមហ៊ុនដើរម៉ូដល្បីក្នុងស្រុករូបនេះ បានឲ្យដឹងថា នៅពេលនេះ បញ្ហានេះ បានចប់សព្វគ្រប់ហើយ គឺមិនមានអ្វីត្រូវអូសបន្លាយយូរនោះទេ គ្រាន់តែប្រាក់៧០០ដុល្លារ ពោលគឺវាបានចប់តាំងពីយប់ថ្ងៃនោះមកម្ល៉េះ។
ហ្សូរីដា បាននិយាយថា៖«តាមពិតអត់មានឈ្លោះគ្នាអីផង គ្រាន់តែជជែកគ្នាធម្មតាៗនៅក្រោយឆាក ហើយលុយហ្នឹង ខ្ញុំបានឲ្យអាភាតាំងពីយប់ថ្ងៃហ្នឹងម៉េ្លះ។ បើនិយាយទៅ៧០០ហ្នឹងមិនស្មើតម្លៃកាបូបខ្ញុំកាន់មួយផង តែពេលហ្នឹងវាយប់ ខ្ញុំមានតែ២០០ទេ ហើយនិយាយយូរទៅនៅតែស្តាប់គ្នាមិនបាន បងចន ច័ន្ទ(ចន ច័ន្ទលក្ខិណា) នៅជិតហ្នឹងគាត់ឮ គាត់បាននិយាយថា គាត់មានលុយរាយ៥០០ដែរ អ៊ីចឹងខ្ញុំក៏យកលុយបង ចន ច័ន្ទ ហ្នឹង ឲ្យអាភា គ្រប់តាំងពីហ្នឹងម្ល៉េះ»។
ទោះមានការអះអាងថា តារាទាំងពីរមានជម្លោះខ្លាំងក្លាក្តី តែប្រធានក្រុមហ៊ុនដើរម៉ូដ ឌួង ហ្សូរីដា នៅតែបដិសេធ ហើយនាងបានប្រាប់ថា សារព័ត៌មានមួយចំនួនមិនបានដឹងរឿងច្បាស់លាស់ផង ក៏ចេះតែចុះផ្សាយ ពិសេសនោះគឺសារព័ត៌មានទាំងនោះមិនបានសួរនាង និងពេជ្រ សោភា ឲ្យបានច្បាស់សិនមុននឹងចុះផ្សាយឡើយ។
យ៉ាងណាក៏ដោយការអះអាងនេះ មិនទាន់ប្រាកដថា ត្រឹមត្រូវ១០០ភាគរយនៅឡើយ ព្រោះនេះគ្រាន់តែជាការបកស្រាយតែម្ខាង រីឯតារាចម្រៀង ពេជ្រ សោភា មិនអាចទាក់ទងសុំការបកស្រាយបានទេ ព្រោះទូរស័ព្ទរបស់នាងអាចទទួលការហៅចូលបាន តែទូរស័ព្ទនោះបានប្រាប់ថា កំពុងជាប់រវល់៕
ដកស្រង់ ពី Post Khmer
ព័ត៌មានបន្ថែម ម៉ោង ១០ ល្ងាច ថ្ងៃ ១៨ ខែមករា ឆ្នាំ ២០១២
Duong Kozona ប្អូនស្រី របស់ ឌួង ហ្សូរីដា បានចូលរួម មតិ ក្នុង Khmerload និងបកស្រាយ ការយល់ច្រលំខ្លះ។ កញ្ញាថា មូលហេតុ ហ្សូរីដា មិនអាចដកលុយបាន ពី ATM ព្រោះកញ្ញាផ្ទាល់ខ្លួន បានដកលុយ ១០០០ដូល្លារ ពីATM នៅពេលព្រឹកនោះសំរាប់ចាយ ដូច្នេះ ហ្សូរីដា មិនអាចដកលុយបានទេ ព្រោះ ATM អោយដកតែ ១០០០ ដូល្លារក្នុងមួយថ្ងៃ។ កញ្ញា ក៏បាននិយាយថា អ្នកទាំងពីរ បាននិយាយ ទៅរក គ្នាទៅវិញ ទៅមកហើយ។ ជាចុងក្រោយ កញ្ញា អំពាវនាវ អោយឈប់ និយាយអ្វីដែល ធ្វើអោយអ្នកទាំង ពីរមិនសប្បាយចិត្ត។ សូមអាន Comment របស់កញ្ញានៅខាងក្រោម។
សូមមិត្តទាំងអស់ជួយចុច Add a comment ដើម្បីផ្តល់ជាមតិ និងជួយ Share នៅលើ Facebook របស់អ្នក។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
