បោះ​ពួយ​ម៉ូតូ​ស្គូពី​ទើប​នឹង​ទិញ ​បុក​បង្គោល​ភ្លើង​បំភ្លឺ​ផ្លូវ​ លើ​ស្ពាន​ជ្រោយ​ចង្វា​របួស​ធ្ងន់​២​នាក់​

រាជធានីភ្នំពេញ ៖ មនុស្សប្រុស ស្រី២នាក់បានរងរបួសធ្ងន់ ខណៈជិះម៉ូតូស្គូពីពណ៌សលាយខៀវ ទើបនឹងទិញមិនទាន់មានស្លាកលេខផង បានបោះពូយទៅបុកបង្គោលភ្លើងបំភ្លឺផ្លូវ នៅលើស្ពានជ្រោយ ចង្វា កាលពីវេលាម៉ោង១ និង៣០នាទីរំលងអធ្រាត្រ ឈានចូលថ្ងៃទី៣ វិច្ឆិកា ២០១៣ នៅលើស្ពានជ្រោយចង្វា សង្កាត់ស្រះចក ខណ្ឌដូនពេញ ។

ប្រភពព័ត៌មានបានឱ្យដឹងថា មុនពេលកើតហេតុគេឃើញ យុវជន៣នាក់ ក្នុងនោះស្រីម្នាក់បានជិះម៉ូតូម៉ាក ស្គូពីធ្វើដំណើរឆ្លងស្ពានពី លិចទៅកើត ខណៈមកដល់ចំណុចកើតហេតុ មិនដឹងមូលហេតុអ្វី ស្រាប់តែម៉ូតូបានរេចង្កូត ទៅបុកបង្គោលភ្លើងបំភ្លឺផ្លូវនៅលើ ស្ពានជ្រោយចង្វា បណ្តាលឱ្យដួលរបួសធ្ងន់២នាក់ ចំណែកយុវជនដែលជិះក្រោយគេ មិនមានរងរបួសទេ។

ក្រោយកើតហេតុអ្នករងរបួសធ្ងន់ត្រូវរថយន្ត សង្គ្រោះដឹកទៅកាន់គ្លីនិកឯកជន ចំណែកម៉ូតូដែលខូចខាត ផ្នែកខាងមុខ ត្រូវយុវជនម្នាក់ដែលរួមដំណើរ ជាមួយ ហើយមិនរងរបួសបានអះអាងថា ជាម៉ូតូរបស់ខ្លួន ប៉ុន្តែសមត្ថកិច្ចមិនបានប្រគល់ឱ្យទេ លុះត្រាតែយកឯកសារ មកបង្ហាញទើបប្រគល់ឱ្យ៕