ចោរ​ឆក់​កាបូប​យ៉ាង​សកម្ម​នៅ​ក្រុង​កំពង់​ចាម​ អស់​លក្ខណ៍​ជាប់​អន្ទាក់​សមត្ថកិច្ច​

ខេត្តកំពង់ចាម ៖ ជនសង្ស័យចោរឆក់កាបូបយ៉ាង សកម្មម្នាក់នៅក្រុងកំពង់ចាម ត្រូវសមត្ថកិច្ចចាប់ក្របួចជាប់ភ្លាមៗ ខណៈធ្វើសកម្មភាពឆក់ កាបូបស្ត្រីម្នាក់បានសម្រេច ហើយព្យាយាមរត់គេចខ្លួន កាលពីវេលាម៉ោង ៧និង៤០នាទីព្រឹកថ្ងៃទី០២ វិច្ឆិកា ២០១៣ នៅចំណុចអណ្តូងជ្វា  ភូមិប្រសុំ ឃុំរអាង ស្រុកកំពង់សៀម ។

តាមលោកអនុសេនីយ៍ឯក ហង្ស វ៉ាន់ចន អធិការរងក្រុងកំពង់ចាម ទទួលផែនយុត្តិធម៌ បានប្រាប់ឱ្យដឹងថា ជនសង្ស័យចោរឆក់ ដែលសមត្ថកិច្ចចាប់ខ្លួនបានឈ្មោះ ឃិន តុលា ភេទប្រុស អាយុ២២ឆ្នាំ រស់នៅភូមិបឹងស្នាយ សង្កាត់សំបួរមាស ក្រុងកំពង់ចាម  ចំណែកម្ចាស់កាបូបឈ្មោះ ដន លីនណា ភេទស្រី អាយុ២៦ឆ្នាំ ហើយនៅក្នុងកាបូបនោះមាន លុយ៨ម៉ឺនរៀល ទូរស័ព្ទមួយគ្រឿង និងអត្តសញ្ញាណប័ណ្ណមួយសន្លឹក ។

ក្រោយពីឃាត់ខ្លួនជនសង្ស័យ សមត្ថកិច្ចដកហូតបានកាបូប ប្រគល់ឱ្យទៅម្ចាស់ដើមគេវិញ និងម៉ូតូម៉ាកឌ្រីមសេ១២៥ ពណ៌ខ្មៅ ស៊េរី២០១៣ ជិះធ្វើសកម្មភាពផងដែរ ៕