ខេត្តព្រៃវែង ៖ យុវជនម្នាក់ដោយសារតែយប់ងងឹត ភ្លើងចង្កៀងម៉ូតូមិនសូវភ្លឺមិនហ៊ានជិះលឿន និងមិនហ៊ានបើកនៅកណ្តាលផ្លូវទេ ខ្លាចគ្រោះថ្នាក់សុខចិត្តជិះម៉ូតូយឺតៗ អែបខាងហើយនៅតែបុកគំនរថ្មនៅចិញ្ចើមផ្លូវទៀត បណ្តាលឱ្យដួលបែកប្រអប់ជើងឆ្វេង ។ គ្រោះអកុសលមិនចង់ជួបបែរជាជួបនេះបានកើតឡើងកាលពីវេលាម៉ោង៩យប់ ថ្ងៃទី១ ឧសភា នៅតាមបណ្តោយផ្លូវជាតិលេខ៨ ក្នុងឃុំកំពង់អំពិល ស្រុកពារាំង ។
យុវជនរងគ្រោះជាអ្នកបើកម៉ូតូឈ្មោះ អ៊ុន សំអាង អាយុ២០ឆ្នាំ ជានិស្សិតវិស្វករឆ្នាំទី១ នៃវិទ្យាស្ថានបច្ចេកវិទ្យាកម្ពុជា ស្នាក់នៅសង្កាត់អូរឫស្សី ខណ្ឌ៧មករា មានស្រុកកំណើតនៅភូមិឆ្អឹងជំនីរ ឃុំកញ្ជ្រៀច ស្រុកកញ្ជ្រៀច ខេត្តព្រៃវែង របួសបែកប្រអប់ជើងខាងឆ្វេង ។ ចំណែកអ្នកជិះពីក្រោយឈ្មោះ អូន យូអុី ភេទប្រុស អាយុ១៩ឆ្នាំ ជានិស្សិតរៀន និងស្នាក់នៅជាមួយគ្នា មានទីលំនៅភូមិព្រាលទី២ ឃុំថ្មពួន ស្រុកកញ្ជ្រៀច របួសលាត់ដៃជើងតិចតួច ។
ជនរងគ្រោះបានឱ្យដឹងថា ថ្ងៃកើតហេតុជាថ្ងៃបុណ្យទិវាពលកម្មអន្តរជាតិ ពួកគេទាំង២នាក់ បានជិះម៉ូតូគុបជ្រុង៩០ ពណ៌ទឹកប្រាក់ ឌុបគ្នាទៅលេងស្រុកកំណើតរហូតដល់ល្ងាចមេឃត្រជាក់ បន្តិចទើបជិះម៉ូតូឌុបគ្នាមករាជធានីភ្នំពេញវិញ ។ ខណៈពេលជិះម៉ូតូត្រឡប់មកវិញដោយសារតែខ្លាចមានគ្រោះថ្នាក់ចរាចរណ៍ ជាយថាហេតុដោយប្រការណាមួយព្រោះយប់ងងឹតភ្លើងម៉ូតូមិនសូវភ្លឺផង មិនហ៊ានជិះម៉ូតូលឿនទេ ហើយក៏មិនហ៊ានជិះនៅកណ្តាលផ្លូវដែរ ជិះអែបខាងក្បែរចិញ្ចើមផ្លូវ លុះដល់កន្លែងកើតហេតុក៏បានបុកគំនរកម្ទេចថ្មបណ្តាលឱ្យដួល និងរងរបួសបែបនេះទៅ ។
ក្រោយពេលកើតហេតុជនរងគ្រោះត្រូវបាន ប្រជាពលរដ្ឋទូរស័ព្ទហៅរថយន្តសង្គ្រោះមកដឹកយកទៅព្យាបាលនៅមន្ទីរពេទ្យ បង្អែកស្រុកពារាំង ហើយបានបញ្ជូនបន្តទៅព្យាបាលនៅមន្ទីរពេទ្យព្រះកុសុមៈ ឯរាជធានីភ្នំពេញ ៕
ដោយ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
