រាជធានីភ្នំពេញ ៖ បុរសម្នាក់បានស្លាប់ម្នាក់ទៀត របួសធ្ងន់និងអ្នកបើករថយន្តរបួសធ្ងន់ដែរ ខណៈពេលបើករថយន្តបុកម៉ូតូSL ពេញទំហឹងផ្លោងទៅទើរលើកាបូរថយន្តទាំងពីរនាក់ ហើយរថយន្តជ្រុលទៅបុកបង្គោលភ្លើងរួចទៅបុកដើមអង្កាញ់រលើងទាំងឫសបណ្តាលឱ្យ ជនរងគ្រោះទាំងពីរនាក់ខ្ទាតចេញពីកាបូរថយន្តបោកទៅលើផ្លូវ ឯរថយន្តនៅតែបន្តទៅបុកផ្ទះលេខ២០៩Eo ផ្ទះលក់គ្រឿងសង្ហារិម និងទទួលធ្វើទ្វារ បង្អួចមួយកន្លែងទៀត ។ គ្រោះថ្នាក់ចរាចរណ៍នេះកើតឡើងនៅវេលាម៉ោង១២និង៣០នាទីរំលង អធ្រាត្រថ្ងៃទី៣ ឧសភា នៅស្តុបទេពផន តាមមហាវិថីម៉ៅសេទុងកែងវិថីទេពផន ស្ថិតក្នុងមណ្ឌល៧ សង្កាត់ផ្សារដេប៉ូទី១ ខណ្ឌទួលគោក។
តាមសម្តីអ្នកប៉ះកង់នៅជិតកន្លែងកើតហេតុបានឱ្យដឹងថា ម៉ូតូSL ពណ៌ទឹកប្រាក់ជិះគ្នា២ នាក់ តាមមហាវិថីម៉ៅសេទុងពីត្បូងទៅជើង ចំណែករថយន្តហាយប្រ៊ីតពណ៌សគ្មានស្លាក លេខ បើកតាមផ្លូវទេពផនពីលិចទៅកើត។ ខណៈមកដល់ចំណុចកើតហេតុម៉ូតូបម្រុងបើកឆ្លងកាត់ផ្លូវ តែដោយសារឃើញរថយន្តមួយគ្រឿងមិនស្គាល់ម៉ាកបើកតាមផ្លូវទេពផនពីលិច ទៅកើតជិតមកដល់ផ្លូវកែង ទើបម៉ូតូបន្ថយល្បឿនរង់ចាំឱ្យរថយន្តនោះបើកទៅមុខផុតសិន ស្រាប់តែមានរថយន្តហាយប្រ៊ីតមួយគ្រឿងទៀតបើកវ៉ារថយន្តនោះយ៉ាងលឿន ទៅបុកម៉ូតូSLពេញទំហឹងធ្វើឱ្យអ្នកជិះម៉ូតូទាំងពីរនាក់ហោះទៅបោក នឹងកញ្ចក់រថយន្តបែកហើយទើរលើកាបូរថយន្ត ចំណែកម៉ូតូផ្លោងទៅមុខរថយន្ត៩២,២ម៉ែត្រពីកន្លែងកើតហេតុ ។
ដោយឡែករថយន្តជ្រុលទៅមុខជាង៣០ម៉ែត្រ បុកបង្គោលភ្លើងឱ្យទ្រេតហើយជ្រុលទៅបុកដើមអង្កាញ់ទំហំ១,៣ម៉ែត្រ រលើងទាំងឫស បណ្តាលឱ្យហោះជនរងគ្រោះទាំងពីរដែលនៅលើកាបូ រថយន្តខ្ទាត៥ម៉ែត្រទៅមុខធ្វើឱ្យម្នាក់បោកបាក់កស្លាប់ និងម្នាក់ទៀតរបួសធ្ងន់ត្រូវបានបញ្ជូនទៅព្យាបាលនៅ មន្ទីរពេទ្យកាល់ម៉ែត។
ប្រភពដដែលបន្តទៀតថា ពេលរថយន្តបុកដើមអង្កាញ់ហើយនៅតែមិនទាន់អស់ល្បឿនទេ បន្តបើកកិនពីលើដើមអង្កាញ់ទៅបុកទ្វារផ្ទះលេខ២០៩Eo លក់គ្រឿងសង្ហារិម និងទទួលធ្វើទ្វារ បង្អួចយីហោយឹក ម៉េងអ៊ាងទៀតបណ្តាលឱ្យបាក់ទ្វារដែក និងបាក់សសរ ដំបូលសំយាបមុខផ្ទះ ទើបរថយន្តអស់ល្បឿនរេចង្កូតទៅទទឹងផ្លូវលេខ២៤១ ។
ប្រភពព័ត៌មានពីមន្ត្រីសមត្ថកិច្ចបានឱ្យដឹងថា តាមរយៈការវាស់វែង ម៉ូតូខ្ទាតពីកន្លែងកើតហេតុចម្ងាយ៩២,២ម៉ែត្រ ជនរងគ្រោះខ្ទាតទៅដល់ផ្លូវ២៣៧ ចំណែករថយន្តបន្តបុករះដល់ផ្លូវលេខ២៤១។ ដោយឡែករថយន្តបង្កបើកបរដោយក្មេងស្ទាវមានចំនួនមិនពិតប្រាកដខ្លះថា៣នាក់ ខ្លះថាបើកបរម្នាក់ឯង ហើយអ្នកបើកបររថយន្តរបួសធ្ងន់បានគេចខ្លួនបាត់មិនដឹងជាទៅទីណា ។ ក្រោយពិនិត្យសមត្ថកិច្ចយករថយន្តទៅរក្សាទុកនៅការិយាលយ័នគរបាល ចរាចរជើងគោក ។ សពជនរងគ្រោះត្រូវបានយកទៅតម្កល់ទុកនៅវត្ត លង្ការង់ចាំគ្រួសារមកទទួលយកទៅធ្វើបុណ្យតាមប្រពៃណី ៕
ដោយ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
