ស្កុប​ពី​បើក​ទាក់​ដៃ​ម៉ូតូ​ជា​មួយ​កុង​តឹ​ន័រ​ ដួល​ម្នាក់​ចូល​ក្រោម​រថ​យន្ត​កិន​បែក​ក្បាល​ស្លាប់​ យ៉ាង​អណោច​អាធ័ម​

រាជធានីភ្នំពេញ ៖ យុវជនម្នាក់បានស្លាប់ភ្លាមៗ យ៉ាងអាណោចអាធ័ម ខណៈដែលម៉ូតូស្កុបពី ពណ៌ស ១គ្រឿង ពាក់ស្លាកលេខ ភ្នំពេញ 1AP-3004 ជិះដោយយុវជន ២នាក់ ទំនងជាស្រវឹងស្រា ធ្វើដំណើរតាមបណ្តោយផ្លូវជាតិលេខ២ ក្នុងទិសដៅពីត្បូងទៅជើង លុះមកដល់ចំណុចក្បែរវត្តចាក់អង្រែលើ ក៏បានទាក់ដៃម៉ូតូជាមួយនិងរថយន្តកុងតឹន័រ ១គ្រឿង ពណ៌ស ពាក់ស្លាកលេខ ភ្នំពេញ 3B-3663 ដែលបើកស្របគ្នា បណ្តាលឲ្យយុវជនម្នាក់ដែលជិះពីក្រោយ ធ្លាក់ចូលក្រោមរថយន្តកិនបែក ក្បាលធ្លាយខួរស្លាប់ភ្លាមៗ ចំណែកអ្នកបើកបររងរបួសស្រាល។

ហេតុការណ៍គ្រោះថ្នាក់ចរាចរដ៏រន្ធត់នេះ បានកើតឡើងកាលពីវេលាម៉ោង ៦ និង ២០នាទី ល្ងាចថ្ងៃទី២៦ តុលា ២០១៣ នៅចំណុចក្បែរវត្តចាក់អង្រែលើ ស្ថិតក្នុងភូមិទួលរកា សង្កាត់ចាក់អង្រែលើ ខណ្ឌមានជ័យ។ បន្ទាប់ពីកិនមនុស្សស្លាប់ហើយ រថយន្តខាងលើបានព្យាយាមរត់ប្រមាណជា ១គីឡូម៉ែត្រ ទើបត្រូវសមត្ថកិច្ចឃាត់ចាប់បាន។

ក្រោយកើតហេតុ សពយុវជនរងគ្រោះសមត្ថកិច្ចបានប្រគល់ឲ្យក្រុម គ្រួសារយកទៅធ្វើបុណ្យតាមប្រពៃណី ចំណែករថយន្ត និងម៉ូតូ សមត្ថកិច្ចបាននាំយកទៅរក្សាទុកនៅការិយាល័យ ចរាចរណ៍ជើងគោករាជធានីភ្នំពេញ ដើម្បីរង់ចាំធ្វើការដោះស្រាយតាមផ្លូវច្បាប់៕