រាជធានីភ្នំពេញ ៖ បុរស-ស្ត្រីពីរនាក់ប្តីប្រពន្ធ ត្រូវប៉ូលិសប៉ុស្តិ៍ផ្សារដេប៉ូ៣ចាប់អូសចេញពីក្នុងរថយន្ត បន្ទាប់ពីបើករថយន្តម៉ាកស៊ីអ័រវី ពណ៌ខ្មៅ មួយគ្រឿងក្នុងស្ថានភាពស្រវឹងបុករនាំងដែកបាក់រលំចំនួន៥កង់ ហើយមិនព្រមចុះពីលើរថយន្តទេ បែរជាស្រែកជេរប្រមាថនិងរកបុកប៉ូលិសទៀត ។
ហេតុការណ៍នេះបានធ្វើឱ្យមានការភ្ញាក់ផ្អើលកាលពីវេលាម៉ោង៩និង៤០នាទីយប់ថ្ងៃទី២ ឧសភា នៅតាមមហាវិថីសហព័ន្ធរុស្ស៊ី ស្ថិតក្នុងសង្កាត់ផ្សារដេប៉ូ៣ ខណ្ឌទួលគោក និងមានការប្រវាយប្រតប់គ្នាជាមួយប៉ូលិសចរាចរនៅតាមដងផ្លូវ ធ្វើឱ្យមានការភ្ញាក់ផ្អើលយ៉ាងខ្លាំង ។ នេះជាលើកទី១ហើយដែលអ្នកបើកបររថយន្តបុករនាំងដែកត្រូវចាប់ខ្លួន ព្រោះតែការជេរប្រមាថមកលើសមត្ថកិច្ច ។២នាក់ប្តី-ប្រពន្ធដែលត្រូវចាប់ខ្លួននេះ ប្តីឈ្មោះសុខ ម៉ារ៉ាឌី អាយុ៣០ឆ្នាំ ជាបុគ្គលិកក្រុមហ៊ុន មួយ ប្រពន្ធឈ្មោះសុខ លាង អាយុ២៨ឆ្នាំ ស្នាក់នៅផ្ទះជួលក្នុងសង្កាត់ព្រែកលៀប ខណ្ឌឫស្សីកែវ ។
តាមសាក្សីបានឱ្យដឹងថា រថយន្តម៉ាកស៊ីអ័រវី ពណ៌ខ្មៅ បើកបរដោយឈ្មោះសុខ ម៉ារ៉ាឌី រួមជាមួយប្រពន្ធ ធ្វើដំណើរតាមមហាវិថីសហព័ន្ធរុស្ស៊ីក្នុងទិសដៅពីលិចទៅកើត ។ នៅពេលមកដល់ចំណុចខាងលើ ស្រាប់តែរថយន្តរេចង្កូតទៅឆ្វេងដៃបុករនាំងដែកខណ្ឌចែកទ្រូងផ្លូវ បណ្តាលឱ្យដួលរលំចំនួន៥កង់ ហើយរថយន្តក៏បានដាច់កាឡេខូចទៅមុខលែងរួច ។ បន្ទាប់ពីបុករនាំងដែក ប៉ូលិសប៉ុស្តិ៍នៅក្បែរនោះបានចេញទៅអន្តរាគមន៍ តែអ្នកបើកបរពុំព្រមចុះពីលើរថយន្តទេ និងទូរស័ព្ទទាក់ទងរកអ្នកអន្តរាគមន៍ ហើយជេរប្រមាថមកលើសមត្ថកិច្ចទៀត ដោយមិនឱ្យប៉ូលិសចាត់ការតាមច្បាប់ទេ ។
តាមសាក្សីដែលបានឃើញនឹងភ្នែកបន្តទៀតថា នៅយប់នោះប៉ូលិសបានត្រឹមតែឈរមើលនិងទទួលការមាក់ងាយបុ៉ណ្ណោះ តែខណៈនោះក៏មានបទបញ្ជាពីលោកឧត្តមសេនីយ៍ត្រីទូច ណារ៉ុថ ស្នងការនគរបាលរាជធានីភ្នំពេញឱ្យចាប់ទាញចេញពីក្នុងរថយន្តយ៉ាងប្រទាញប្រទង់កណ្តាលផ្លូវដូចជាអាក្រក់មើលណាស់ទំរាំប៉ូលិសចាប់អូសបញ្ជូនទៅប៉ុស្តិ៍ដែលនៅក្បែរនោះបាន ។ នៅពេលចាប់ទាញចុះពីលើរថយន្ត ស្ត្រីជាប្រពន្ធបានយកស្បែកជើងមកវាយប៉ូលិសនិងវាយទម្លាក់ម៉ាស៊ីនថតរបស់អ្នកកាសែត ហើយយកជើងជាន់ទៀត ។ ហេតុការណ៍គួរឱ្យស្អប់ខ្ពើមនេះ ធ្វើឱ្យមានការភ្ញាក់ផ្អើលយ៉ាងខ្លាំង ហើយ២នាក់ប្តីប្រពន្ធត្រូវបានប៉ូលិសចាប់អូសកៀកទៅកាន់ប៉ុស្តិ៍ និងវាយខ្នោះបុរសជាប្តីទៀតផង ព្រោះតែរឹងទទឹងនិងក្រាញននៀលស្រែកឡាំប៉ា ដែលលោកអ្នកអានអាចមើលរូបភាពជាក់ស្តែងលើវេទិកាគេហទំព័រកោះសន្តិភាពកាន់តែច្បាស់ថែមទៀត ។
បុរសជាប្តីនិយាយថា មុនពេលកើតហេតុខ្លួនរួមទាំងប្រពន្ធទើបតែចេញពីផឹកស៊ី ហើយធ្វើដំណើរត្រឡប់ទៅផ្ទះវិញក៏ជ្រុលចង្កូតបុករនាំងដែកតែម្តង។ ភ្លាមៗនោះដែរ ប៉ូលិសការិយាល័យចរាចរផ្លូវគោកនៃស្នងការដ្ឋានរាជធានីភ្នំពេញបានចុះទៅស្ទូចយករថយន្តនិងបញ្ជូនប្តីប្រពន្ធប្រមឹកទាំង២នាក់នេះទៅកាន់ការិយាល័យ ដើម្បីដោះស្រាយតាមផ្លូវច្បាប់ ៕
វីដេអូពីកោះសន្តិភាព ៖
ដោយ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]