រាជធានីភ្នំពេញ ៖ រថយន្តម៉ាកហ៊ីណូ ពណ៌ត្រេអ៊ីមួយគ្រឿង បានបើកបុកម៉ូតូពីក្រោយរួចកិនជាប់ក្រោមរថយន្តអូសចំនួន១២ ម៉ែត្រ ទើបទៅមុខលែងរួច ។ គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង៦និង៣៥នាទី ព្រលប់ថ្ងៃទី១ ឧសភា នៅមុខក្រុមហ៊ុនណូគា តាមផ្លូវលេខ២៧១ សង្កាត់ទឹកល្អក់ទី៣ ខណ្ឌទួលគោក បណ្តាលឱ្យម៉ូតូម៉ាកហុងដាឌ្រីមសេ១២៥ ពណ៌ខ្មៅស៊េរី២០១០មួយគ្រឿងរងការខូចខាតស្ទើរតែទាំងស្រុង ឯអ្នកបើកបររងរបួសស្រាល ។
តាមសាក្សីនៅកន្លែងកើតហេតុបានឱ្យដឹងថា នៅមុនពេលកើតហេតុ ម៉ូតូហុងដាឌ្រីមសេ១២៥ខាងលើបានធ្វើដំណើរតាមផ្លូវលេខ២៧១ ក្នុងទិសដៅពីត្បូងទៅជើងស្របគ្នាជាមួយរថយន្តម៉ាកហ៊ីណូ ពណ៌ត្រេអ៊ី ។ នៅពេលធ្វើដំណើរមកដល់ស្តុបមុខក្រុមហ៊ុនណូគា ម៉ូតូបានឈប់ស្តុបហើយនៅពេលភ្លើងខៀវម៉ូតូប្រុងបើកចេញស្រាប់តែ រថយន្តនោះមកបុកពីក្រោយហើយកិនជាប់ក្រោមរថយន្តនិងអូសប្រវែង ១២ម៉ែត្រទើបឈប់ ។ ចំណែកអ្នកជិះម៉ូតូសំណាងល្អបានខ្ទាតចេញពីមុខរថយន្តរងរបួសស្រាល ។
ក្រោយពេលកើតហេតុ ចរាចរណ៍នៅទីនោះបានកកស្ទះប្រមាណកន្លះម៉ោង ហើយត្រូវបានប៉ូលិសគោលដៅនិងប៉ូលិសមូលដ្ឋានខណ្ឌទួលគោកចុះទៅវាស់ វែងអូសម៉ូតូចេញពីក្រោមរថយន្តដើម្បីសម្រួលចរាចរណ៍ឡើងវិញ ។ រថយន្តនិងម៉ូតូត្រូវបានសមត្ថកិច្ចជំនាញនៃការិយាល័យចរាចរណ៍ ផ្លូវគោករាជធានីភ្នំពេញយកទៅរក្សាទុករង់ចាំដោះស្រាយតាមច្បាប់ ៕
ដោយ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]