បុរស​​ម្នាក់​ប៉ុន​ប៉ង​លោត​ទឹកសម្លាប់ខ្លួន​ លើ​​ស្ពាន​ព្រះ​មុនីវង្ស​​ថ្មី តែមិន​បាន​​សម្រេច

រាជធានីភ្នំពេញ ៖ បុរសម្នាក់ព្រោះតែមានវិបត្តិក្នុងគ្រួសារ បានជិះម៉ូតូម៉ាក សេ១០០កូរ៉េមួយគ្រឿង មកលោតទឹកសម្លាប់ខ្លួន លើស្ពានព្រះមុនីវង្សថ្មី តែមិនបានសម្រេច ដោយសារសមត្ថកិច្ចឈរជើង យាមការពារស្ពានឃើញទាន់ជួយចាប់ទាន់ ។

ហេតុការណ៍នេះកើតឡើង កាលពីវេលាម៉ោង១រំលងអធ្រាត្រ ឈានចូលថ្ងៃទី២១ តុលា ២០១៣ នេះ ស្ថិតនៅចំណុចលើស្ពានព្រះមុនីវង្សថ្មី ។

ប្រភពបានឱ្យដឹងថា ជនរងគ្រោះឈ្មោះភ័ក្ត្រ អាយុ២២ឆ្នាំ មានទីលំនៅក្នុងភូមិអូរអណ្តូង សង្កាត់ព្រែកប្រា ខណ្ឌមានជ័យ ។ បន្ទាប់ពីសមត្ថកិច្ចឃាត់ខ្លួនហើយ បុរសរងគ្រោះបាននិយាយថា ខ្លួនមិនចង់រស់ទៀតទេ ដោយសារកន្លងមក ប្រពន្ធរបស់គេបានប្រមាថមើលងាយ និងយកទ្រនាប់ជើងវាយក្បាល ហើយម្យ៉ាងទៀតប្រពន្ធរបស់ខ្លួនផិតក្បត់ទៀត ទើបរូបគេសម្រេចចិត្ត លោតទឹកសម្លាប់ខ្លួនបែបនេះ ។

សមត្ថកិច្ចបានធ្វើការអប់រំ និងបានជួយជូនជនរងគ្រោះ ដល់លំនៅឋានផងដែរ ។