ជ័យជំនះ ឃីម ឌីម៉ា នៅសិង្ហបុរី ប្រែក្លាយជាអាសាបង់

ភ្នំពេញៈ ជោគជ័យក្នុងប្រវត្តិសាស្រ្ដ ដែលកីឡាករកម្ពុជា ឃីម ឌីម៉ា ខំតស៊ូដណ្ដើមបានជ័យជំនះ លើកីឡាករហ្វីលីពីន អតីតជើងឯក វូស៊ូពិភពលោក ២សម័យ ក្នុងការប្រកួតកីឡា MMA នៃព្រឹត្តិការណ៍ One Fighting Championship នៅប្រទេសិង្ហបុរី កាលពីថ្ងៃទី១៨ ខែតុលា ឆ្នាំ២០១៣កន្លងមកនោះ បានរលាយ ទៅវិញហើយ ក្រោយពី គណៈកម្មការ រៀបចំការប្រកួតរកឃើញថា ឃីម ឌីម៉ា វាយខុសបច្ចេកទេសនោះ ។

គណៈកម្មការរៀបចំ ការប្រកួតនៃព្រឹត្តិការណ៍ One Fighting Championship បានចេញសេចក្ដីប្រកាសមួយ កាលពីថ្ងៃទី១៩ តុលានេះថា លទ្ធផលនៃការប្រកួត រវាងកីឡាករកម្ពុជា ឃីម ឌីម៉ា និងកីឡាករហ្វីលីពីន Rene Catalan មិនត្រូវទុកជាផ្លូវការនោះទេ ពោលគឺចាត់ទុកដូចជា គ្មានការប្រកួតកើតឡើងអញ្ចឹង ។

ការប្រកាសមិនទទួលស្គាល់ លទ្ធផលនៅលើគេហទំព័រ របស់ខ្លួនបែបនេះ ដោយសាតែក្រោយពី ការប្រកួតចប់ គណៈកម្មាការបានស្រាវជ្រាវ រកឃើញថា ឃីម ឌីម៉ា វាយខុសបច្ចេកទេស គឺវាយពីក្រោយចំកញ្ចឹងករ មុននឹងធ្វើឲ្យ កីឡាករហ្វីលីពីន Rene Catalan ដួលសន្លប់នៅ ចុងទឹកទី២នោះ ។

ប្រភពដដែលបានបន្ដទៀតថា បើសិនជាកីឡាករទាំង២(ឌីម៉ា និង Rene Catalan) មានបំណងចង់ជួបសាកល្បង គ្មានម្ដងទៀតនោះ គណៈកម្មការនឹងរៀបចំ ឲ្យពួកគេជួបគ្នាម្ដងទៀត បានក្នុងរយៈពេលដ៏ខ្លី ខាងមុខនេះ ដើម្បីស្រាយមន្ទិល សង្ស័យរបស់កីឡាករទាំង២ និងស្វែងរកកីឡាករ ដែលទទួលបានជ័យជំនះ ពិតប្រាកដ ៕