រាជធានីភ្នំពេញ ៖ ដោយសារតែភាពអនាធិបតេយ្យនៃការចតរថយន្ដនៅលើចិញ្ចើមផ្លូវ ហើយថែមទាំងរត់ហៅម៉ូយលើផ្លូវគ្មានសណ្ដាប់ធ្នាប់ផងនោះ ជាហេតុបង្កឱ្យមានគ្រោះថ្នាក់ចរាចរណ៍មួយបានកើតឡើងកាលពីវេលា ម៉ោង៩និង១៥នាទីព្រឹកថ្ងៃទី៣០ មេសា ២០១២ នៅតាមបណ្ដោយផ្លូវសហព័ន្ធរុស្ស៊ីខាងលិចគល់ស្ពានអាកាស៧មករា ក្នុងសង្កាត់ទឹកថ្លា ខណ្ឌសែនសុខ រវាងម៉ូតូឌ្រីមសេ១២៥ បានបុកបុរសអ្នកហៅមូយម្នាក់យ៉ាងពេញទំហឹង បណ្ដាលឱ្យបុរសនេះសន្លប់មួយសន្ទុះនៅលើចិញ្ចើមផ្លូវ ខណៈបុរសរងគ្រោះកំពុងរត់ហៅម៉ូយដាក់រថយន្ដ។
ប្រភពព័ត៌មាននៅកន្លែងកើតហេតុបានឱ្យដឹងថា មុនពេលកើតហេតុម៉ូតូឌ្រីមសេ១២៥ពណ៌ខ្មៅ ឌុបស្ដ្រីម្នាក់ធ្វើតាមបណ្ដោយតាមផ្លូវសហព័ន្ធរុស្ស៊ី ពីលិចទៅកេិត ក្នុងទិសដៅបញ្ច្រាសទិស ក៏បុកបុរសម្នាក់ជាអ្នកហៅមូយដាក់រថយន្ដតាក់ស៊ីដែលចតរង់ចាំ ម៉ូយនៅខាងលិចគល់ស្ពាន៧មករាយ៉ាងពេញទំហឹង បណ្ដាលឱ្យបុរសរងគ្រោះដួលសន្លប់បាត់ស្មារតី។ ប្រភពបានឱ្យដឹងបន្ដថា ចំណែកអ្នកបើកម៉ូតូបានរងរបួសស្រាល។ គ្រោះថ្នាក់នេះ បណ្ដាលមកពីអ្នកបើកបរម៉ូតូបញ្ច្រាសទិសហើយលឿន ស្របពេលដែលអ្នកហៅម៉ូយនៅក្រោយគូទរថយន្ដរត់ចេញក៏វាក់អ៊ើ និងម៉ូតូជាន់ហ្វ្រាំងមិនទាន់ ក៏បុកតែម្ដង។
ក្រោយពីកើតហេតុប៉ូលិសប្រចាំការនៅគោលដៅនេះ បានលើកម៉ូតូ និងជនរងគ្រោះទៅដាក់ម្ខាង ហើយនាំទៅធ្វើការសម្របសម្រួលនៅអធិការដ្ឋានខណ្ឌសែនសុខ៕
ដោយ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
