ខេត្តឧត្តរមានជ័យ ៖ រឿងរ៉ាវមួយដែលមានអាយុកាលចំណាស់បន្តិចទៅហើយ ព្រោះវាបានកើតឡើងតាំងពីពាក់កណ្តាលខែវិច្ឆិកា ឆ្នាំ២០១១ មកម៉្លេះ បើគិតមកដល់ថ្ងៃទី១៧ មករា នេះគឺមានរយៈពេល២ខែ មកហើយ ។ តែអ្វីដែលមិនទាន់ត្រូវបានកាត់សេចក្តីបែបណានោះគឺយុត្តាធិការមួយដែលស្ថិតនៅក្នុងដៃក្រសួងមហាផ្ទៃ ចំពោះចំណាត់ការរបស់នគរបាលស្រុកអន្លង់វែង ដែលបានចាប់ខ្លួនកូនកំលោះយកទៅដាក់ពន្ធនាគារអស់រយៈពេល៥ថ្ងៃ ធ្វើឱ្យឃ្លាតចាកពីរាត្រីទឹកឃ្មុំដោយគ្មានកំហុសអ្វីសោះ ជុំវិញរឿងរ៉ាវក្រុមក្មេងទំនើងទាស់គ្នាក្នុងពិធីរាំធុងបាស់ថ្ងៃអាពាហ៍ពិពាហ៍ នារាត្រីថ្ងៃទី១៧ វិច្ឆិកា គឺរហូតដល់ថ្ងៃទី២២ វិច្ឆិកា ទើបមានការដោះលែងពីពន្ធនាគារមកវិញ ។
ថ្វីបើមានការដោះលែងមកវិញក្តី តែឪពុកម្តាយខាងកូនប្រុស ដែលមានចេតនារកភាពស្អាតស្អំឱ្យកូនខ្លួនវិញនោះ បានដាក់ពាក្យបណ្តឹងមកក្រសួងមហាផ្ទៃដោយចោទប្រកាន់ដល់កងកម្លាំងប៉ូលិស ដែលបានចាប់កូនគាត់ដាក់ពន្ធនាគារថា ជាការរំលោភសិទ្ធិមនុស្ស ហើយមិនដឹងថា ក្រសួងមហាផ្ទៃនោះដោះស្រាយករណីនេះបែបណានោះទេ ។
គួររំលឹកថា អាពាហ៍ពិពាហ៍នេះកូនកំលោះឈ្មោះហ៊ាន ហាន អាយុ៣១ឆ្នាំ មានឪពុកឈ្មោះកើត ហ៊ាន អាយុ៥៥ឆ្នាំ និងម្តាយឈ្មោះយា សុខុម អាយុ៥៣ឆ្នាំ ជាគូនឹងកូនក្រមុំឈ្មោះហេង ស្រីពេជ្រ អាយុ២១ឆ្នាំ មានឪពុកឈ្មោះរី រឹម អាយុ៥៧ឆ្នាំ និងម្តាយឈ្មោះ ហេង ដា អាយុ៤៣ឆ្នាំ។ ទាំង២គ្រួសារនេះរស់នៅក្នុងភូមិព្រលាន ឃុំអន្លង់វែង ។ អាពាហ៍ពិពាហ៍នេះបានចូលរោងនៅថ្ងៃទី១៦ វិច្ឆិកា ហើយថ្ងៃរៀបចំពិធីពេញគឺថ្ងៃទី១៧ វិច្ឆិកា ឆ្នាំ២០១១ ។
ឪពុកម្តាយខាងកូនប្រុសបានរៀបរាប់ឱ្យកោះសន្តិភាពដឹងថា ការរៀបចំអាពាហ៍ពិពាហ៍កូនប្រុស-ស្រីរបស់គាត់ នេះធ្វើឡើងដោយស្របច្បាប់គឺនៅថ្ងៃទី១៦ វិច្ឆិកា ជាថ្ងៃចូលរោង និងថ្ងៃទី១៧ វិច្ឆិកា ឆ្នាំ២០១១ ជាថ្ងៃជ័យ។ កម្មវិធីនេះបានប្រព្រឹត្តទៅតាមគន្លងប្រពៃណីរហូតដល់ពិធីជប់លៀង ហើយបានរាំធុងបាស់លេងកម្សាន្តក្នុងរាត្រីថ្ងៃនោះផងដែរ ។ តែការសប្បាយនោះបានតែ១៥នាទី ស្រាប់តែមានក្រុមក្មេងទំនើងឈ្មោះផល ម៉ាប់ និងឈ្មោះហ៊ាង ចឹង និងបេក្ខពួកជាច្រើននាក់ទៀតបានកាន់កាំបិត និងដំបងដើរចូលមកអុកឡុកក្នុងពិធីរាំនោះ ។ ពេលនោះមេបាខាងកូនប្រុស-ស្រីបាននាំគ្នាទៅអង្វរក្រុមក្មេងស្ទាវទំនើងទាំងនោះកុំឱ្យធ្វើសកម្មភាពក្នុងកម្មវិធីមង្គលការកូនប្រុស-ស្រីរបស់គាត់ ហើយក្រុមក្មេងទាំងនោះក៏បានឈប់ធ្វើសកម្មភាព និងមានការរាំលេងកម្សាន្តជាធម្មតាវិញ។
តាមប្រភពព័ត៌មានពីឪពុកម្តាយកូនប្រុសបានបន្តទៀតថា លុះរាំបានប្រហែល២០នាទីក្រុមក្មេងទំនើងខាងលើបានចូលមកអុកឡុកម្តងទៀត ។
និងមានការវាយតប់គ្នានៅក្នុងវង់រាំនោះតែម្តង ។ ពេលនោះឈ្មោះសយ វុទ្ធី ហៅម៉ាប់ ជាអ្នកកំដរកូនកំលោះបានចេញទៅឃាត់ហើយនិយាយថា បើគេចាក់ធុងបាស់ឱ្យរាំលេងហើយនាំគ្នាសប្បាយទៅ ម្តេចបានជានាំគ្នាមកអុកឡុកទៅវិញ ។ ពេលនោះក្រុមក្មេងទំនើងជាច្រើននាក់បាននាំគ្នាស្ទុះមកវាយឈ្មោះសយ វុទ្ធី ហៅម៉ាប់ បណ្តាលឱ្យរងរបួសបែកមុខបែកមាត់ ហើយក៏មានការវាយតប់គ្នារហូតក្រុមក្មេងទំនើងក៏រងរបួសដែរ គឺឈ្មោះផល ម៉ាប់ ។ ដោយសារតែមានការប្រទូស្តរ៉ាយគ្នានេះ ពិធីរាំធុងបាស់នោះក៏ត្រូវបានបញ្ចប់ ។ បន្ទាប់មកសមត្ថកិច្ចប៉ូលិសផ្នែកព្រហ្មទណ្ឌមកដល់ ហើយនាំខ្លួនកូនកំលោះទាំងយប់ទៅកាន់អធិការដ្ឋានស្រុកអន្លង់វែង ដោយចោទកូនកំលោះថា ជាអ្នកបង្កការវាយតប់គេទៅវិញ ។
តាមប្រភពព័ត៌មានថា ឪពុកម្តាយកូនប្រុសកូនស្រីដែលជាអ្នកដើមការក៏នាំគ្នាទៅកាន់អធិការដ្ឋានស្រុកអន្លង់វែង ដើម្បីសុំប៉ូលិសយកកូនកំលោះមករៀបចំពិធីឱ្យបានចប់សិនចាំដោះស្រាយនៅពេលក្រោយ ហើយក៏មានការព្រមព្រៀង ។ លុះដល់ចប់ពិធី លោកកែ សំណេង អធិការរងប៉ូលិសស្រុកទទួលបន្ទុកព្រហ្មទណ្ឌក៏បានមកនាំខ្លួនកូនកំលោះយកទៅឃុំខ្លួន និងបង្ខំឱ្យផ្តិតមេដៃលើកំណត់ហេតុ រួចដាក់ខ្នោះបញ្ជូនទៅតុលាការ នៅព្រឹកថ្ងៃទី១៨ វិច្ឆិកា ២០១១ ហើយក៏ត្រូវបានឃុំខ្លួន ។ ដោយសារតែមានភាពអយុត្តិធម៌ទើបមន្ត្រីតុលាការចុះមកស៊ើបអង្កេត ហើយអ្នកភូមិគ្រប់គ្នាបានស្ម័គ្រចិត្តផ្តិតមេដៃធានាថា យុវជនឈ្មោះហ៊ាន ហាន មិនបានទាក់ទិននឹងការវាយតប់គ្នាក្នុងវង់រាំនោះទេ ទើបមានការដោះលែងពីពន្ធនាគារមកវិញ ។
ដកស្រង់ពីគេហទំព័រ កោះសន្តិភាព
សូមមិត្តទាំងអស់ជួយចុច Add a comment ដើម្បីផ្តល់ជាមតិ និងជួយ Share នៅលើ Facebook របស់អ្នក។សូមអរគុណ ខ្មែរស្រលាញ់ខ្មែរ។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]