រដូវ​​ទឹក​ជំនន់​​ ឈ្មួញ​សប្បាយ​​លួច​ដឹក​ឈើ​ រីឯ​ការ​​បង្ក្រាប​គឺ​គ្មាន

ខេត្តក្រចេះ ៖ យោងតាមប្រភពព័ត៌មាន ពីពលរដ្ឋនៅតាមដងទន្លេមេគង្គ បានឱ្យដឹងថា ក្នុងរដូវទឹកជំនន់ លើវិសាលភាពទឹកទន្លេធំ ល្ហល្ហាចមួយរយៈពេលនេះ គឺបានអំណោយផលល្អ ងាយស្រួលលើការដឹកញ្ជូនឈើប្រណីតខុសច្បាប់ របស់ក្រុមឈ្មួញទុច្ចរិត ចេញពីប៉ែកខាងលើ នៃដងទន្លេមេគង្គនាំឆ្ពោះមកប៉ែកខាងក្រោម ។

ប្រភពបានបន្តទៀតថា មានឈើប្រណីតប្រភេទបេង និងធ្នង់មានចំនួនរាប់ពាន់កំណាត់ ជាច្រើនរយម៉ែត្រគូប គឺត្រូវក្រុមឈ្មួញទុច្ចរិត រស់នៅក្នុងខេត្តក្រចេះ បានលួចធ្វើសកម្មភាពដឹកជញ្ជូន ព្យាងសណ្តូនតាមផ្លូវទឹកពីព្រំប្រទល់ស្រុកសំបូរ ជាប់និងខេត្តស្ទឹងត្រែង នាំឆ្ពោះមកកាន់ស្រុកតំបែរ ខេត្តកំពង់ចាម ។

សកម្មភាពនៃការលួចដឹកជញ្ជូនឈើ តាមផ្លូវទឹករបស់ពួកក្រុមឈ្មួញទាំងនេះ គឺគេដឹងថា បានធ្វើឡើងក្នុងរដូវទឹកឡើងនេះ និងបានធ្វើសកម្មភាព យ៉ាងគគ្រឹកគគ្រេងនារយៈពេលពាក់កណ្តាលខែកញ្ញា រហូតដល់សព្វថ្ងៃ ខណៈដែលទឹកទន្លេមេគង្គ កំពុងតែមានសន្ទុះជន់ឡើងយ៉ាងគំហុក ដែលបង្កលក្ខណៈអំណោយផល ល្អសម្រាប់ពួកឈ្មួញ ក្នុងការព្យាងដឹកឈើរបស់គេជារៀងរាល់យប់នេះ។