រាជធានីភ្នំពេញ ៖ រថយន្តកាមរីឆ្លាម ពណ៌ត្រីឆ្លូញ១គ្រឿងដែលអ្នកបើកបរស្រវឹង បានរេចង្កូតទៅបុករថយន្តតាកូម៉ា ពណ៌ខ្មៅមួយគ្រឿងចតនៅមុខស្តារ៍ម៉ាត វ័នអេនវ័ន រួចជ្រុលទៅបុករះមុខផ្ទះ៤ល្វែងទៀត បណ្តាលឱ្យបែកឥដ្ឋ និងផើងផ្កា ព្រមទាំងស្លាកយីហោផង ។ ចំណែកម៉ូតូឃ្លីក ពណ៌លឿង ១គ្រឿងដែលបើកឆ្លងកាត់ផ្លូវ ឃើញរថយន្តបើកសំដៅមករកដូច្នេះក៏ផ្តួលម៉ូតូចោល ហើយរត់ព្រោះដោយខ្លាចមានគ្រោះថ្នាក់ ។
ហេតុការណ៍នេះ បានកើតឡើងកាលពីវេលាម៉ោង១១យប់ថ្ងៃទី២៨ មេសា តាមផ្លូវលេខ២៧១ កែងផ្លូវតាផុន ស្ថិតក្នុងក្រុមទី១ ភូមិ១ សង្កាត់ទួលទំពូង២ ខណ្ឌចំការមន ។សាក្សីនៅកន្លែងកើតហេតុឱ្យដឹងថា រថយន្តកាមរីឆ្លាម ពណ៌ត្រីឆ្លូញ បើកតាមផ្លូវលេខ២៧១ ពីជើងទៅត្បូង លុះមកដល់ចំណុចខាងលើមុខស្តារ៍ម៉ាត វ័នអេនវ័ន ស្រាប់តែរេចង្កូតទៅបុករថយន្តតាកូម៉ា ពណ៌ខ្មៅ មួយគ្រឿងដែលចតនៅពីមុខស្តារ៍ម៉ាត ចំកង់ក្រោយចំហៀងខាងឆ្វេងបណ្តាលឱ្យវៀចកង់ចេញក្រៅ ហើយរថយន្តឆ្លាមនោះមិនទាន់អស់ល្បឿនក៏ជ្រុលទៅបុករះមុខផ្ទះ៤ល្វែងទៀត ។
ប្រភពដដែលបន្តទៀតថា ក្នុងចំណោមមុខផ្ទះទាំង៤លែ្វងនោះ ល្វែងទី៣ខូចខាតច្រើនជាងគេ ដោយបែកផើងផ្កា និងទ្រេតបង្គោលស្លាកយីហោ ក្រៅពីនោះគ្រាន់តែបែកឥដ្ឋតិចតួចប៉ុណ្ណោះ ។ ចំណែកម៉ូតូឃ្លីក ពណ៌លឿង ជិះគ្នា២នាក់ជាយុវជន កំពុងបើកចេញពីផ្លូវតាផុនឆ្ពោះទៅផ្លូវលេខ២៧១ ឃើញរថយន្តបើកប្រុងបុកដូច្នេះក៏ផ្តួលម៉ូតូចោលនាំគ្នារត់គេចយកប្រាសអាយុ តែសំណាងល្អរថយន្តបើកទៅមុខទៀតលែងរួចឈប់ត្រឹមផ្លូវកែងតែម្តង ទើបមិនបណ្តាលឱ្យបុកម៉ូតូឃ្លីកនោះ ។ក្រោយពេលកើតហេតុ រថយន្តកាមរីឆ្លាមបែកកញ្ចក់ខាងមុខទាំងស្រុង ផ្ទុះពោងសុវត្ថិភាពទាំងពីរ និងខ្ទេចមុខផ្នែកខាងស្តាំ ។
ម្ចាស់រថយន្តតាកូម៉ាដែលខូចខាត និងម្ចាស់ផ្ទះដែលរងការខូចខាត ព្រមទាំងម្ចាស់ម៉ូតូឃ្លីក បានធ្វើការទាមទារសំណង ឯអ្នកបើករថយន្តឆ្លាមចូលទៅរាប់លុយនៅក្នុងរថយន្តមានមិនគ្រប់ក៏សន្យាថា ចាំព្រឹកគេហៅជាងមកធ្វើការជួសជុលឱ្យ ប៉ុន្តែម្ចាស់ទ្រព្យសម្បត្តិទាំងអស់ដែលខូចខាតមិនសុខចិត្ត បានឃាត់រថយន្តទុកនៅកន្លែងកើតហេតុមួយយប់សិន រង់ចាំការដោះស្រាយ ៕
ដោយ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]