យុវជនកម្ពុជាជាង ១ពាន់នាក់នាំគ្នា​ រាំលេងដើម្បី​ បំណែកឯកត្ដកម្ម នៅក្នុងកំណត់ត្រា ពិភពលោក

ភ្នំពេញៈយោងតាមទីភ្នាក់ងារព័ត៌មានចិន “ស៊ិនហួ” ចុះផ្សាយនៅរាត្រីថ្ងៃទី២៨ ខែមេសា ឆ្នាំ២០១២ ថា យុវជនកម្ពុជា ប្រមាណជាង១ពាន់នាក់ បាននាំគ្នារាំលេងកម្សាន្ដ តាមចង្វាក់ “ម៉ាឌីហ្សុន“ ដើម្បីកត់ត្រាចូលក្នុងកំណត់ត្រា ពិភពលោក ។

អ្នករៀបចំកម្មវិធីបានលើកឡើងថា មានយុវជនកម្ពុជាជាង១ពាន់នាក់ បានមកចូលរួមរាំលេងកម្សាន្ដតាមចង្វាក់ “ម៉ាឌីហ្សុន” ដើម្បីបំបែកឯកត្ដកម្ម ក្នុងកំណត់ត្រាពិភពលោក ។

នៅទល់មុខវត្ដបុទុមវត្ដី ក្នុងរាជធានីភ្នំពេញ គេឃើញក្រុមយុវជនជាច្រើន បាននាំគ្នារាំលេងកម្សាន្ដតាមចង្វាក់ ម៉ាឌីហ្សុន ដែលមានរយៈពេលប្រមាណ៥នាទី ។

នាយកកម្មវិធី “BBC Media Action “ ដែលជាអ្នករៀបំកម្មវិធីនេះ បានប្រាប់ថា ម៉ាឌីហ្សុន ត្រូវបានគេកត់ត្រាចូលក្នុងសៀវភៅ ហ្គីនណេសប៊ុក កាលពីថ្ងៃទី១៨ ខែមិថុនា ឆ្នាំ២០១១ ដោយមានអ្នកចូលរួមរាំពីបណ្ដាអ្នករាំ ៤៥៩នាក់ ដែលរៀបចំឡើងនៅក្នុងប្រទេសបារាំង ។

លោកបានប្រាប់ដល់ទីភ្នាក់ងារ ស៊ិនហួថា “នាពេលឥឡូវនេះ យើងព្យាយាមដើម្បីបំបែកឯកត្ដកម្មនៅក្នុងកំណត់ត្រា ” ។ លោកបានបន្ដថា “យើងនឹងផ្ញើឯកសារ និងវីដេអូអំពីការរាំលេងនេះ ទៅកាន់ការិយាល័យកំណត់ត្រាពិភពលោក សម្រាប់ផ្ដល់ការវិនិច្ឆ័យ” ៕

ប្រែសម្រួលៈ សុបញ្ញវ័ន្ដ

ផ្តល់សិទ្ធដោយ ដើមអម្ពិល