ខេត្តស្ទឹងត្រែង ៖ កាលពីវេលាម៉ោង៦និង៣០នាទីល្ងាចថ្ងៃទី២៦ មេសា នៅភូមិហាងខូសួន សង្កាត់ស្ទឹងត្រែង ក្រុងស្ទឹងត្រែង ប្រជាពលមានការភ្ញាក់ផ្អើលដោយសារទាហាប្រមឹកម្នាក់បាន ប្រើអំពើហិង្សាវាយប្រពន្ធកូន និងដុតផ្ទះរបស់ខ្លួនឯងចោលឱ្យឆេះគ្មានសល់ ។
ប្រភពព័ត៌មានបានឱ្យដឹងថា ទាហានប្រមឹកម្នាក់នោះឈ្មោះដន ខាំអន អាយុ៣៩ឆ្នាំ ជាឋានៈពលបាលឯក បម្រើការងារនៅក្នុងអង្គភាពសាលាពលទាហានទី១ចំណុះយោធភូមិភាគទី១ ។ នៅពេលស្រវឹងស្រាបានវាយទៅលើប្រពន្ធ កូនរបស់ខ្លួនវ័យ១៧ឆ្នាំ បន្ទាប់មកដុតផ្ទះរបស់ខ្លួនចោល ចំណែកប្រពន្ធកូនបានត្រឹមតែឈរមើលផ្ទះរបស់ខ្លួនដែលក្លាយជាចំណី ព្រះអគ្គីដោយក្តីរន្ធត់ ។
អ្នកភូមិបានឱ្យដឹងថា បុរសដែលប្រើអំពើហិង្សារហូតដុតផ្ទះរបស់ខ្លួននេះ មានប្រពន្ធឈ្មោះស៊ឹម លក្ខណា អាយុ៤០ឆ្នាំ កូនប្រុស២នាក់ និងស្រី៦នាក់នៅក្នុងបន្ទុក កូនប្រុសច្បងមានអាយុ១៩ឆ្នាំ និងកូនស្រីពៅមានអាយុ៣ឆ្នាំ។
ប្រភពពីសាច់ញាតិបានឱ្យដឹងថា ជារៀងរាល់ថ្ងៃគេតែងសង្កេតឃើញបុរសជាប្តីផឹកស្រាស្រវឹងដាបហើយបានបង្ក ទំនាស់ជាមួយក្រុមគ្រួសារដេញវាយប្រពន្ធ និងកូនស្ទើររាល់ថ្ងៃគ្មានលស់ពេលឡើយ ។ នៅថ្ងៃកើតហេតុ គេឃើញឈ្មោះដន ខាំអន ផឹកស្រាស្រវឹងស្រែកឡូឡា ជេរបញ្ចោររួចទាញដំបងឈើដេញវាយកូនស្រីច្បងទី២ឈ្មោះដន ណយ ត្រូវជាច្រើនដំបង។
នាងព្រមទាំងបងប្អូនទាំង៧នាក់ និងម្តាយបានរត់ចេញពីផ្ទះ បន្ទាប់មកគេឃើញផ្ទះរបស់គ្រួសារខាងលើនេះឆេះសន្ធោសន្ធៅឡើង ដោយគ្មាននរណាអាចពន្លត់ទាន់ធ្វើឱ្យផ្ទះដែលមានទំហំទទឹង៥ម៉ែត្រ បណ្តោយ៨ម៉ែត្រ សង់ផុតពីដីប្រមាណ៣ម៉ែត្រនោះឆេះអស់គ្មានសល់ នៅតែគំនរផេះផង់ធ្វើឱ្យប្រពន្ធ និងកូនប្រុសស្រីចំនួន៨នាក់សល់តែខោអាវមួយចង្កេះក្រហាយទឹក ដោយក្តីស្តាយរបស់ទ្រព្យ ។
ក្រោយកើតហេតុ កម្លាំងយោធា បាននាំទាហានប្រមឹកម្នាក់នោះទៅកាន់អង្គភាពសាលាពលទាហាន ទី១ដើម្បីធ្វើការដោះស្រាយ ចំណែកស្រ្តីជាភរិយាត្រូវបានកម្លាំងកងរាជអាវុធហត្ថក្រុងស្ទឹងត្រែង នាំមកសាកសួរជុំវិញករណីខាងលើ ដោយសម្លើយកសាងសំណុំរឿងបញ្ជូនទៅតុលាការ។ ចំពោះជនបង្ក គឺស្ថិតនៅក្នុងសាលាពលទាហានមិនទាន់ដឹងថា គេអនុវត្តតាមនីតិវិធីណានោះទេ៕
ដោយ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]