ក្រុងប៉ោយប៉ែត ៖ រថយន្តដឹកជ័រកៅស៊ូធុនធំរបស់ថៃមួយគ្រឿងបានបើកកៀររថយន្តមែរសឺដេសE320 របស់លោកអគ្គកុងស៊ុលខ្មែរប្រចាំខេត្តស្រះកែវ ដែលករណីគ្រោះថ្នាក់ចរាចរណ៍នេះបានកើតឡើងកាលពីវេលាម៉ោង៣និង៤៥នាទីរសៀលថ្ងៃទី២៤ មេសា ស្ថិតនៅចំណុចរង្វង់មូលមាត់ច្រកទ្វារអន្តរជាតិប៉ោយប៉ែត ។
តាមការបំភ្លឺពីមន្ត្រីសមត្ថកិច្ចប៉ូលិសអន្តោប្រវេសន៍ប្រចាំនៅច្រកព្រំដែនបានឱ្យដឹងថា មុនពេលកើតហេតុ មានរថយន្តធុនធំសណ្តោងកន្ទុយដឹកជ័រកៅស៊ូរបស់ថៃ បានបើកពីកើតមកក្នុងគោលបំណងឆ្លងដែនចូលទៅប្រទេសថៃ តាមច្រកទ្វារអន្តរជាតិប៉ោយប៉ែត ។ លុះមកដល់ចំណុចបារ៉ាសមត្ថកិច្ចរង្វង់មូល រថយន្តនោះបានឈប់សំចតរង់ចាំសមត្ថកិច្ចត្រួតពិនិត្យឯកសារឱ្យបានត្រឹមត្រូវដើម្បីចូលទៅក្នុងទឹកដីថៃ ។ បន្ទាប់មកគេឃើញមានរថយន្តមែរសឺដេសមា៉ាកE320 ពណ៌ទឹកប្រាក់ចង្កូតស្តាំមួយគ្រឿង បើកបរដោយបុរសអាយុប្រមាណជាង៤០ឆ្នាំ និងមានបុរសម្នាក់ទៀតស្លៀកពាក់ស្អាតបាត បានបើកមកស្របទិសគ្នាហើយមកឈប់សំចតខាងឆ្វេងជាប់ពីមុខរថយន្តថៃនៅចំណុចនោះដែរ ក្នុងគោលបំណងឆ្លងដែនចូលទៅក្នុងទឹកដីថៃ ។
នៅពេលចេញដំណើររថយន្តធុនធំសណ្តោងកន្ទុយរបស់ថៃបានបួងចង្កូតឆ្លងបារ៉ាសរបស់សមត្ថកិច្ចដើម្បីចូលទៅក្នុងទឹកដីថៃក៏ស្រាប់តែជ្រុលទៅកៀររថយន្តមែរសឺដេសផែ្នកខាងមុខចំទ្វារខាងស្តាំបាក់ត្រចៀក និងកូតក្រពឹតអស់មួយចំហៀងតែម្តង។ ក្រោយពេលកើតហេតុ គេឃើញមានសមត្ថកិច្ច
ប៉ូលិសចរាចរក្រុងប៉ោយប៉ែតបានមកអន្តរាគមន៍វាស់វែងរួចក៏បានឃាត់រថយន្តដឹកជ័រកៅស៊ូរបស់ថៃ និងរថយន្តមែរសឺដេសនោះយកទៅអធិការដ្ឋាននគរបាលក្រុងប៉ោយប៉ែតដើម្បីរកដំណោះស្រាយតាមនីតិវិធី ។
តាមប្រភពពីមន្ត្រីសមត្ថកិច្ចដែលនៅកន្លែងកើតហេតុបានឱ្យកោះសន្តិភាពដឹងថា រថយន្តម៉ាកមែរសឺដេស ដែលត្រូវរថយន្តធុនធំរបស់ថៃកៀរនោះ គឺជារថយន្តរបស់លោកអគ្គកុងស៊ុលខ្មែរប្រចាំខេត្តស្រះកែវ ប្រទេសថៃ ។ ប៉ុន្តែ នៅពេលកើតហេតុនោះ គេពុំឃើញមានវត្តមានលោកអគ្គកុងស៊ុលនៅក្នុងរថយន្តនោះទេ គឺមានតែអ្នកបើកបរ និងមន្ត្រីម្នាក់ជិះនៅក្នុងនោះ ហើយករណីគ្រោះថ្នាក់នេះដែរ ពុំមានបង្កឱ្យមនុស្សណាម្នាក់រងរបួសនោះឡើយ គឺគ្រាន់តែខូចខាតរថយន្តប៉ុណ្ណោះ ៕
ដោយ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]