ខេត្តបន្ទាយមានជ័យ ៖ ម៉ូតូ១គ្រឿងជិះគ្នា២នាក់បានបើកវ៉ារថយន្តដោយខ្វះការ ប្រុងប្រយ័ត្នមិនមើលឧបសគ្គនៅខាងមុខក៏ត្រូវរថយន្តបើក បរក្នុងទិសដៅបញ្ច្រាសគ្នាបុក ពេញទំហឹង បណ្តាលឱ្យរងរបួសធ្ងន់ម្នាក់ និងស្រាលម្នាក់ កាលពីវេលាម៉ោង៤និង១០នាទីរសៀលថ្ងៃទី២៤ មេសា នៅតាមបណ្តោយផ្លូវ ជាតិលេខ៥ ស្ថិតក្នុងភូមិធំថ្មី ឃុំអូរប្រាសាទ ស្រុកមង្គលបុរី ។
លោកវរសេនីយ៍ត្រីយ៉ត សុផល អធិការនគរបាលស្រុកមង្គលបុរីបានឱ្យដឹងថា ជនរងគ្រោះក្នុងឧប្បត្តិហេតុគ្រោះថ្នាក់ចរាចរណ៍នេះ ឈ្មោះហ្វ្រាំង សុផាណា ភេទប្រុស អាយុ២៥ឆ្នាំ រស់នៅភូមិរហាត់ទឹក ឃុំរហាត់ទឹក ស្រុកមង្គលបុរី ខេត្តបន្ទាយមានជ័យ ជាអ្នកបើកម៉ូតូម៉ាកហុងដាវ៉េវ ស៊េរី២០០៧ ឌុបឈ្មោះ ហាច តត ភេទប្រុស អាយុ១៩ឆ្នាំ រស់នៅភូមិជាមួយគ្នា ។ ចំណែករថយន្តដែលបើកបុកនោះ ម៉ាកនីស្សាន់ ពណ៌ស ក្រោយពេលកើតហេតុ បានបើករត់គេចបាត់ស្រមោល ។
លោកអធិការនគរបាលស្រុកបានបន្តថា កត្តាដែលបង្កឱ្យកើតមានគ្រោះថ្នាក់នេះ គឺអ្នកជិះម៉ូតូបានបើកវ៉ារថយន្តមួយគ្រឿងក្នុងល្បឿន លឿន មិនបានប្រុងប្រយ័ត្នពីឧបសគ្គខាងមុខក៏ត្រូវរថយន្តម៉ាកនី ស្សាន់បុកពេញទំហឹង បណ្តាលឱ្យអ្នកជិះពីក្រោយឈ្មោះ ហាច តត រងរបួសធ្ងន់បាក់ស្មងជើងឆ្វេង ត្រូវបានដឹកយកទៅព្យាបាលនៅមន្ទីរពេទ្យបង្អែកមិត្តភាព កម្ពុជា-ជប៉ុន និងឈ្មោះ ហ្វ្រាំង សុផាណា របួសស្រាល ។ ចំណែកអ្នកបើកបររថយន្ត ក្រោយពេលកើតហេតុបានបើករថយន្តគេចខ្លួនបាត់ ។ ដោយឡែក ម៉ូតូដែលរងការខូចខាតផ្នែកខាងមុខត្រូវបានសមត្ថកិច្ច ជំនាញយកទៅរក្សាទុកនៅអធិការដ្ឋានស្រុក ៕
ដោយ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]