បុរស​ម្នាក់​តូច​ចិត្ត​នឹង​ម្តាយ​មីង​ដេញ​ចេញ​ពី​ផ្ទះ ​​​ជិះ​ម៉ូតូ​ឌុប​ទៅ​លោត​ទឹក​​សម្លាប់​ខ្លួន​ លើ​ស្ពាន​ជ្រោយ​ចង្វា​

រាជធានីភ្នំពេញ ៖ បុរសម្នាក់តូចចិត្តនឹងម្តាយមីង ដេញចេញពីផ្ទះ ក៏បានជិះម៉ូតូឌុបឡើងលើស្ពានជ្រោយចង្វា រួចលោតចូលក្នុងទឹក ប៉ងសម្លាប់ខ្លួន តែត្រូវនគរបាលយាមគោលដៅទី៣ ឃើញបានចេញទូក ទៅជួយសង្រ្គោះទាន់ពេល រួចផុតពីសេចក្តីស្លាប់ ដែលហេតុការណ៍នេះ បង្កឱ្យមានការភ្ញាក់ផ្អើល កាលពីវេលាម៉ោង ៥ និង ១៥នាទី ល្ងាចថ្ងៃទី០៦ កញ្ញា ២០១៣ ចំណុចលើស្ពានជ្រោយចង្វា ស្ថិតក្នុងសង្កាត់ជ្រោយចង្វា ខណ្ឌឫស្សីកែវ ។

បុរសលោតទឹកប៉ងសម្លាប់ខ្លួនខាងលើឈ្មោះ ឡុង តុក អាយុ ២៩ឆ្នាំ គ្មានមុខរបរ ស្នាក់នៅជាមួយម្តាយមីង នៅសង្កាត់ផ្សារកណ្តាល ។ តាមសម្តីបុរសនោះ បានប្រាប់ឱ្យដឹងថា រូបគាត់បានតូចចិត្តនឹងខ្លួនឯងដែលត្រូវម្តាយមីងបណ្តេញចេញពី ផ្ទះ ព្រោះគាត់បានលួចលុយម្តាយមីងយកទៅស៊ីផឹកចាយអស់ រួចត្រូវម្តាយមីងស្តីបន្ទោសឱ្យ ហើយម្យ៉ាងរូបគាត់មានជំងឺប្រចាំកាយទៀតផង តែមិនបានបញ្ជាក់ថា មានជំងឺអ្វីឡើយ ។