ខេត្តកំពង់ចាម ៖ គ្រោះថ្នាក់ចរាចរណ៍ផ្ទួនៗ លើផ្លូវជាតិលេខ៧ ចំនួន២ករណី ក្នុងថ្ងៃទី២៤ មេសា ២០១២ លើទឹកដីស្រុកត្បូងឃ្មុំ បានឆក់់យកអាយុជីវិតប្រជាពលរដ្ឋក្មេងចាស់ប្រុសស្រីចំនួន ៨នាក់ និងរបួសធ្ងន់ស្រាលចំនួន៣៥នាក់ ត្រូវបានដឹកតាមរថយន្តសាមុយទៅកាន់មន្ទីរពេទ្យបង្អែក ស្រុក មន្ទីរពេទ្យបង្អែកខេត្តនិងមន្ទីរពេទ្យ៧ដេ ស្ថិតនៅស្រុកកំពង់សៀម និងមួយចំនួនបានបញ្ជូនបន្តទៅសង្គ្រោះនៅរាជធានីភ្នំពេញផង ដែរ ។
ករណីទី១ កើតឡើងកាលពីវេលាម៉ោង២និង១០នាទីរសៀលថ្ងៃទី២៤ មេសា ស្ថិតក្នុងភូមិវាលខ្នាច ឃុំស្រឡប់ ស្រុកត្បូងឃ្មុំ ដោយសាររថយន្តម៉ាកទីតានដឹកភ្ញៀវក្មេងចាស់ប្រុសស្រីជាង ៤០នាក់ ទៅចូលរួមមង្គលការ បានបុកជាមួយនឹងរថយន្តម៉ាកហ៊ីយ៉ាន់ដាយ ចំណុះ១តោនកន្លះប្រភេទបែនដឹកដីលាន់ដូចរន្ទះ ជាហេតុ បណ្តាលឱ្យស្លាប់ភ្លាមៗចំនួន៥នាក់ និង៣នាក់ទៀត ស្លាប់ពេលបញ្ជូនទៅដល់មន្ទីរពេទ្យ ព្រមទាំងរបួសធ្ងន់ស្រាលចំនួន២៩នាក់ ។
ចំពោះករណីទី២ កើតឡើងកាលពីវេលាម៉ោង៨និង១៥នាទីយប់ថ្ងៃទី២៤ មេសា ត្រង់ចំណុចភូមិជប់ក្រៅ ឃុំជប់ ស្រុកត្បូងឃ្មុំ។ ហេតុការណ៍នេះកើតឡើង ដោយរថយន្តម៉ាកតូយ៉ូតា ពណ៌ទឹកប៊ិច បើកបរដោយឈ្មោះប៉ៃ រឿន ភេទប្រុស អាយុ៣០ឆ្នាំ ចេញពីរោងការស្រវឹងស្រាបុកគ្នាជាមួយនឹងរថយន្តហ៊ីយ៉ាន់ដាយ មិនស្គាល់អ្នកបើកបរ ខណៈកំពុងធ្វើដំណើរបញ្ច្រាសទិសគ្នា បណ្តាលឱ្យរងរបួសធ្ងន់ចំនួន៦នាក់ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ដោយ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]