ម៉ូតូដឹកទូ ជិះទាក់ដៃចង្កូតគ្នា ដួលរបួសធ្ងន់ ទាំងពីរនាក់

កណ្ដាល ៖ ម៉ូតូចំនួន ២គ្រឿង  ដោយម៉ូតូមួយគ្រឿង មានដឹកទូកញ្ចក់ បើកបរក្នុងទិសដៅស្របគ្នា ហើយម៉ូតូ មួយគ្រឿង បានបត់ ធ្វើឱ្យប៉ះដៃចង្កូតគ្នា ដួលបែកទូកញ្ចក់មុតអ្នកជិះម៉ូតូម្នាក់ រងរបួសធ្ងន់ និងម្នាក់ទៀតរង របួសស្រាល ។

ឧប្បត្ដិហេតុខាងលើនេះ បានកើតឡើងកាលពីវេលាម៉ោង ៥និង២០នាទី ល្ងាច ថ្ងៃទី២២ ខែសីហា ឆ្នាំ ២០១៣ កន្លងទៅនេះ ស្ថិតនៅតាមបណ្ដោយផ្លូវជាតិលេខ១ ត្រង់ចំណុចភូមិពពាលខែ ឃុំដីឥដ្ឋ ស្រុក កៀនស្វាយ ខេត្ដ កណ្ដាល ។ ម៉ូតូទាំងពីរគ្រឿង ដែលបុកគ្នានេះ ម៉ាកវេវដូចគ្នា ដោយក្នុងនោះម៉ូតូមួយ គ្រឿង មានដឹកទូកញ្ចក់ដើរ លក់ផងនោះ បានធ្វើដំណើរក្នុងទិសដៅ ពីអ្នកលឿងមកភ្នំពេញ ស្របទិសគ្នា ។

លុះពេលមកដល់ចំណុចកើតហេតុ ម៉ូតូមួយគ្រឿង ដែលជិះនៅខាងស្ដាំដៃ បានបត់ឆ្វេង ហើយក៏ទាក់ ដៃចង្កូត គ្នាជាមួយនឹងម៉ូតូមួយគ្រឿង ដែលជិះនៅខាងឆ្វេងដៃ ធ្វើឱ្យម៉ូតូទាំងពីរដួល ហើយទូកញ្ចក់បាន បែករាយប៉ាយ បណ្ដាលឱ្យបុរសម្នាក់ ដែលជិះម៉ូតូទទេរមុត នឹងអំបែងកញ្ចក់ រងរបួសធ្ងន់ធ្ងរ រីឯអ្នកជិះ ម៉ូតូដឹកទូកញ្ចក់រងរបួស ស្រាល ៕