កាម៉ាស់​​សណ្ដោង​​ស្រវឹង​រេ​ចង្កូត​​ធ្លាក់​ផ្លូវ​ក្រឡាប់​​ ចូល​ក្រោម​ផ្ទះ​​ឈើ​2ខ្នង​បាក់​​សសរ​ផ្ទះ​ ធ្វើ​ឱ្យ​ម្ចាស់​ផ្ទះ​​ភ័យ​លស់​​ព្រលឹង​រត់​​ ចេញ​មក​ក្រៅ​​ទាំង​មមី​​មមើ​

រាជធានីភ្នំពេញ ៖  ផ្ទះឈើ២ខ្នងបានរងការ ខូចខាតបាក់សសរ ដោយសាររថយន្ដកាម៉ាស់ សណ្ដោងដឹកអីវ៉ាន់ ពណ៌សលាយទឹកសមុទ្រ មួយគ្រឿងអ្នកបើកបរស្ថិតក្នុងសភាពស្រវឹងជោកជាំ បានបើកធ្លាក់ផ្លូវក្រឡាប់ចូលក្រោមផ្ទះ កាលពីវេលាម៉ោង ១២និង២៥នាទីរំលងអធ្រាត្រឈានចូលថ្ងៃទី២២ សីហា តាមបណ្ដោយផ្លូវជាតិលេខ៥ ស្ថិតក្នុងភូមិក្រួស សង្កាត់សំរោង ខណ្ឌពោធិ៍សែនជ័យ ធ្វើឱ្យម្ចាស់ផ្ទះដែលកំពុងលង់លក់ ក្នុងដំណេកភ័យលស់ព្រលឹង បើកទ្វារចេញមកក្រៅទាំងមមីមមើ ។ បុរសបើករថយន្ដកាម៉ាស់ខាងលើឈ្មោះ ឡាយ ស៊ុយ អាយុ៤៥ឆ្នាំ មានស្រុកកំណើតនៅភូមិឫស្សីកោង ឃុំឫស្សីកោង ស្រុកមង្គលបូរី ខេត្ដបន្ទាយមានជ័យ។

លោក ស៊ិន សុវណ្ណ នាយរងផ្នែកសណ្ដាប់ធ្នាប់ចរាចរជើង គោកខណ្ឌសែនសុខឱ្យដឹងថា មុនពេលកើតហេតុ រថយន្ដកាម៉ាស់សណ្ដោងដឹកអីវ៉ាន់ ពណ៌សលាយទឹកសមុទ្រ ពាក់ស្លាកលេខ ភ្នំពេញ3A-5738 បើកបរដោយបុរសស្រវឹងស្រាជោកជាំ រួមដំណើរដោយព្រូម្នាក់ស្រវឹងដូចគ្នា ក្នុងល្បឿនលឿនតាមបណ្ដោយ ផ្លូវជាតិលេខ៥ពីត្បូងទៅជើង ។ ពេលទៅដល់ចំណុចកើតហេតុ បានបើកវ៉ារថយន្ដមួយគ្រឿងនៅពីមុខក៏ជ្រុលចង្កូត ធ្លាក់ផ្លូវក្រឡាប់ចូលក្រោមផ្ទះឈើ២ខ្នងរបស់ ប្រជាពលរដ្ឋដែលសង់ក្បែរចិញ្ចើមផ្លូវ បណ្ដាលឱ្យបាក់សសរកៀប រថយន្ដជាប់ពីក្រោម សំណាងល្អមិនបណ្ដាលឱ្យមានអ្នកស្លាប់ ឬរងរបួសទេ តែធ្វើឱ្យម្ចាស់ផ្ទះភ័យព្រលឹងចុងសក់ នាំគ្នារត់ប្រសាចចេញមកក្រៅ ។

ប្រភពបន្ដថា រថយន្ដកាម៉ាស់សណ្ដោងដឹកអីវ៉ាន់ ចេញពីរាជធានីភ្នំពេញឆ្ពោះទៅក្រុងប៉ោយប៉ែត ។ តែមិនទាន់ចេញផុតពីរាជធានីផង ក៏ជួបគ្រោះថ្នាក់ទៅហើយ ។ ម្ចាស់ផ្ទះលោក សេង រីណា អាយុ៤៥ឆ្នាំ និងលោក សេង រ៉ាវី អាយុ៧២ឆ្នាំ ជាឪពុកនិងកូនបាននិយាយទាំងទឹកមុខស្លេកស្លាំងថា ពួកគាត់រួមទាំងគ្រួសារសឹងតែមិនជឿថាអាចមានជីវិតរស់នៅតទៅទៀតទេ ព្រោះពេលគាត់កំពុងលង់លក់ក្នុងដំណេក ស្រាប់តែឮសំឡេងដូចរន្ទះបុក ចូលក្រោមផ្ទះរបស់គាត់ ធ្វើឱ្យពួកគាត់ភ័យស្ទើរស្លាប់ សំណាងបន្ដិចដែរ ដែលរថយន្ដមិនរមៀលចូលក្នុងផ្ទះកុំអី ប្រហែលជារងទុកធំជាងនេះ ។

ក្រោយពេលកើតហេតុ ប៉ូលិសចរាចរមានបំណងស្ទូចរថយន្ដ យកទៅដោះស្រាយនៅអធិការដ្ឋាននគរបាលខណ្ឌសែនសុខ ប៉ុន្ដែម្ចាស់ផ្ទះសំណូមពរមិនឱ្យស្ទូចទេ ព្រោះខ្លាចបាក់រលំផ្ទះរបស់គាត់ទាំងកណ្ដាលយប់ រង់ចាំព្រឹកឡើងរកវិធីស្ទូចរថយន្ដចេញ ៕