រាជធានីភ្នំពេញ ៖ មន្ត្រីអង្គរក្សម្នាក់ត្រូវប៉ូលិសប៉ុស្តិ៍ជ្រោយចង្វាចាប់ឃាត់ខ្លួនកាលពីវេលាម៉ោង៧យប់ថ្ងៃទី១២ មករា នៅចំណុចហាងលក់គ្រឿងក្លែមតាប្រុញ គល់ស្ពានជ្រោយចង្វា ខាងកើត សង្កាត់ជ្រោយចង្វា បន្ទាប់ពីផឹកស៊ីស្រវឹងមានទំនាស់ពាក្យសម្តីជាមួយស្រីស្នេហ៍ ហើយដកកាំភ្លើងខ្លីម៉ាក CZ98 មួយដើមបាញ់គំរាម១គ្រាប់ បណ្តាលឱ្យផ្អើលឆុរពេញហាង ប៉ុន្តែពុំបង្កឱ្យមនុស្សរងរបួសឡើយ។
ជនដែលបង្កការផ្ទុះអាវុធនេះឈ្មោះអ៊ុក វណ្ណាត ភេទប្រុស អាយុ៣៦ឆ្នាំ ជាកងអង្គរក្ស មានទីលំនៅសង្កាត់វាលវង់ ខណ្ឌ៧មករា ។ តាមព័ត៌មានឱ្យដឹងថា មុនពេលផ្ទុះអាវុធ មន្ត្រីអង្គរក្សរូបនោះបានជិះម៉ូតូម៉ាកវីវ៉ា ពណ៌ខ្មៅ ពាក់ស្លាកលេខ ខ.ម មួយគ្រឿង ជាមួយស្រីស្នេហ៍ និងមិត្តភក្តិ បាននាំគ្នាទៅផឹកស៊ីនៅភោជនីយដ្ឋានតាប្រុញ ស្ថិតនៅគល់ស្ពានជ្រោយចង្វាខាងកើត ក្នុងសង្កាត់ជ្រោយចង្វា។ នៅពេលផឹកស៊ីស្រវឹង កងអង្គរក្សរូបនោះមានទំនាស់គ្នាជាមួយស្រីស្នេហ៍ ហើយត្រូវស្រីស្នេហ៍បញ្ឈឺឱ្យបាញ់ ក៏ដកកាំភ្លើងខ្លីបាញ់ចំនួន១គ្រាប់គំរាមតែម្តង។
បន្ទាប់ពីផ្ទុះអាវុធមិត្តភក្តិម្នាក់បានប្រតាយតប់យកកាំភ្លើងខ្លី ហើយបាននាំស្រីស្នេហ៍របស់កងអង្គរក្សរូបនោះទៅបាត់។ ភ្លាមៗ សមត្ថកិច្ចប៉ូលិសប៉ុស្តិ៍បានទៅអន្តរាគមន៍ចាប់ឃាត់ខ្លួនជនបង្កការផ្ទុះអាវុធ និងក្រោយមកហៅមិត្តភក្តិឱ្យយកកាំភ្លើងមកវិញ ហើយត្រូវប៉ូលិសដកហូតតែម្តង មានគ្រាប់ចំនួន១២គ្រាប់។ ជនបង្កផ្ទុះអាវុធត្រូវប៉ូលិសប្រគល់ទៅឱ្យកងរាជអាវុធហត្ថខណ្ឌឫស្សីកែវ បញ្ជូនទៅកាន់បញ្ជាការដ្ឋានកងរាជអាវុធហត្ថ រាជធានីភ្នំពេញ ។ តាមព័ត៌មានឱ្យដឹងថា នៅព្រឹកថ្ងៃទី១៣ មករា កងរាជអាវុធហត្ថក៏បានចាប់កោរសក់មន្ត្រីអង្គរក្សរូបនោះរួចបញ្ជូនទៅឱ្យអង្គភាពធ្វើការអប់រំវិញ កុំឱ្យពូកែបាញ់ទៀត ៕
ដកស្រង់ពីគេហទំព័រកោះសន្តិភាព
សូមបងប្អូនជួយចុច Add a comment ដើម្បីផ្តល់ជាមតិ និងជួយ Share នៅលើ Facebook របស់អ្នក។សូមអរគុណ ខ្មែរស្រលាញ់ខ្មែរ។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
