បុរស​ម្នាក់​អួត​ខ្លួន​ថា​ជា​អ្នក​យក ​ព័ត៌​មាន​ឱ្យ​ទស្សនា​វដ្តីខ្មែរ​អប្សរា​ ចាក់​សាំង​កន្លះ​លីត្រ​ជេរ​ប្រមាថ​គេ​ឯង​

រាជធានីភ្នំពេញ ៖ បុរសម្នាក់ដែលអួតខ្លួនថា ជាអ្នកយកព័ត៌មានឱ្យទស្សនាវដ្តីខ្មែរអប្សរា បានបណ្តើរម៉ូតូអស់សាំងមកចាក់ សាំងដបកន្លះលីត្រ រួចជេរប្រមាថអ្នកលក់សំាង និងគំរាមចុះផ្សាយ ហើយប្តឹងសមត្ថកិច្ចឱ្យបិទ កន្លែងលក់សាំងរបស់គេ ខណៈដែលខឹងអ្នកលក់ រឿងតម្លៃសាំងថ្លៃ ដែលហេតុការណ៍នេះ បង្កឱ្យមានអាណាធិបតេយ្យ កាលពីវេលាម៉ោង ៩ និង ៣០នាទី យប់ថ្ងៃទី១៥ សីហា ២០១៣ នៅចំណុចក្រោមស្ពានអាកាស៧មករា ស្ថិតក្នុងសង្កាត់ទឹកល្អក់ទី១ ខណ្ឌទួលគោក ។

តាមប្រភពព័ត៌មាន បានឱ្យដឹងថា មុនពេលកើតហេតុ បុរសម្នាក់ដែលអះអាងថា ខ្លួនជាអ្នកយកព័ត៌មានឱ្យទស្សនាវដ្តីខ្មែរអប្សរា បានបណ្តើរម៉ូតូមកចាក់សាំងនៅកន្លែងលក់សាំងដបមួយកន្លែង ចំនួនកន្លះលីត្រ ហើយអ្នកលក់សាំងទារលុយចំនួន ៣០០០រៀល ភ្លាមៗបុរសនោះ បានស្រែកសម្លុតថា គ្រាន់តែសាំងកន្លះលីត្រហេតុអ្វីក៏ថ្លៃដល់ ៣០០០រៀល ព្រមទាំងគំរាមចុះផ្សាយព័ត៌មាន និងចង់ប្តឹងសមត្ថកិច្ចឱ្យបិទការលក់ ដូររបស់គេទៀតផង ដែលសកម្មភាពនេះ ហាក់បីដូចជាបុរសនោះ អួតអាងតែខ្លួនឯងជាអ្នកកាសែត សម្លុតគំរាម និងចង់វាយប្រជាពលរដ្ឋអ្នកលក់សាំងតាមផ្លូវ បង្កជម្លោះយ៉ាងគឃ្លើនគ្មានច្បាប់ទម្លាប់ ៕